នៅព្រឹកថ្ងៃទី27 ខែធ្នូ ឆ្នាំ2016 នេះ លោកហែម ដារិទ្ធិ អភិបាល ខណ្ឌពោធិ៍សែនជ័យ និង លោកសេង គន្ធ អភិបាលរងខណ្ឌពោធិ៍សែនជ័យ បានអញ្ជើញចុះសាកសួរសុខទុក្ខ ដល់ប្រជាការពារភូមិម្នាក់ បានរងរបួសធ្ងន់ ដែលកំពុងសំរាកព្យាបាលនៅមន្ទីរពេទ្យលោកសង្ឃ រួមនឹងយកថវិកាចំនួន 2លានរៀល របស់ឯកឧត្តម ប៉ា សុជាតិវង្ស អភិបាលរាជធានីភ្នំពេញ តាមរយៈឯកឧត្តម ឃួង ស្រេង អភិបាលរាជធានីភ្នំពេញស្តីទី និងថវិកា 1លានរៀល របស់សាលាខណ្ឌពោធិ៍សែនជ័យ ។លោក ហែម ដា រិទ្ធិ បានកោតសសើរចំពោះស្មារតីក្លាហាន ទទួលខុសត្រូវ ចំពោះការបំពេញភារកិច្ចជាប្រជាការពារ ក្នុងការជួយប្រជាពលរដ្ឋក្នុងភូមិ ដោយមិនខ្លាចពីការគ្រោះថ្នាក់ដល់ខ្លួន។តាមរយៈសកម្មភាពនេះ សាលារាជធានីភ្នំពេញ ក៏ដូចសាលាខណ្ឌពោធិ៍សែនជ័យ សូមថ្លែងអំណរគុណយ៉ាងជ្រាលជ្រៅ និង សូមជូនពរ អោយបានឆាប់ជាសះស្បើយ ។
សូមបញ្ជាក់ថា កាលពីវេលាម៉ោង៧ និង៤០នាទីយប់ ថ្ងៃទី២៦ ខែធ្នូ ឆ្នាំ២០១៦ នៅភូមិព្រៃក្រាយ សង្កាត់ស្នោរ ខណ្ឌពោធិ៍សែនជ័យ រាជធានីភ្នំពេញ គឺមានករណី ជនសង្ស័យប្រដាប់អាវុធមួយក្រុមមានគ្នា៧នាក់ប្រដាប់ដោយកាំភ្លើងអាកា៦ដើម ដោយពាក់ម៉ាស់គ្រប់គ្នា បានសំរុកចូលប្លន់ផ្ទះប្រជាជនមួយគ្រួសារ ដោយបានចាប់ចង និង ធ្វើការគំរាមសំលាប់ ដោយបានប្រមូលទ្រព្យសម្បត្តិ បានមួយចំនួន ។ខណៈពេលនោះ ប្រជាការពារភូមិខាងលើ កំពុងតែហូបបាយនៅក្នុងផ្ទះស្រាប់តែគាត់ឮសំឡេងប្រកាសអាសន្នរបស់មេភូមិថាមានជនសង្ស័យមួយក្រុមចូលទៅប្លន់ទ្រព្យសម្បត្តិនៅក្នុងផ្ទះអ្នកភូមិក្បែរគាត់ប្រមាណជា២០ម៉ែត្រពីគ្នា គាត់ក៏រត់សំដៅទៅផ្ទះកើតហេតុនោះបំណងចូលទៅជួយ ពេលរត់ទៅដល់ជិតផ្ទះកើតហេតុ ក៏ត្រូវខ្មាន់កាំភ្លើងបាញ់សំដៅគាត់ចំនួន៣គ្រាប់ តែត្រូវតែ២គ្រាប់ទេ គឺ១គ្រាប់ត្រូវត្រង់ពោះខាងស្ដាំបៀមគ្រាប់ និង១គ្រាប់ទៀតត្រូវចំកដៃខាងស្ដាំធ្លាយ បណ្ដាលឲ្យរបួសធ្ងន់ធ្ងរតែម្តង ។
ប្រភពពីសមត្ថកិច្ចបានឲ្យដឹងថា ភ្លាមៗនោះកម្លាំងនគរបាលខណ្ឌពោធិ៍សែនជ័យដឹកនាំដោយលោក យឹម សារ៉ាន់ អធិការនគរបាលខណ្ឌ សហការជាមួយនគរបាលនៃស្នងការរាជធានីភ្នំពេញ បានចុះទៅតាមប្រមាញ់ក្រុមប្លន់ប្រដាប់អាវុធប្រមាណជាកន្លះម៉ោងក្រោយមកក៏ឃើញជនសង្ស័យម្នាក់ឃើញមានសភាពភ័យរញីរញ័រនៅម្ដុំវត្តពោធិ៍វ័ន សង្កាត់ស្នោ ខណ្ឌពោធិ៍សែនជ័យ ទើបឃាត់ខ្លួនយកទៅសួរនាំ ប៉ុន្តែមិនទាន់បញ្ជាក់ថា ជាក្រុមចោរប្លន់ប្រដាប់អាវុធខាងលើនេះឬក៏មិនមែននៅឡើយទេ ៕
