ខេត្តព្រះសីហនុ៖ នៅព្រឹកថ្ងៃទី១៧ ខែកញ្ញា ឆ្នាំ២០១៨នេះ អ្នកលេងបណ្ដាញសង្គមគ្រប់មជ្ឈដ្ឋាន មានការភ្ញាក់ផ្អើលភ្លូកទឹកភ្លូកដី ដោយសារលោកឧញ៉ាទៀ វិចិត្រ ក្មួយប្រុសបង្កើតសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ ។
បានបង្ហោះសារថា ឥឡូវនេះខ្ញុំ កំពុងរងគ្រោះដោយសារអ្នកមានអំណាចនៅភ្នំពេញមកប្លន់យកដីចំការរបស់ខ្ញុំហើយ បងៗ !!!! អស់អ្នករករឿង បែរជាមកប្លន់ដីគ្នាឯងទៅវិញ ចប់ កប់ អស់យោបល់ !!!!។
លោកឧញ៉ាទៀ វិចិត្រ ដែលស៊ូទ្រាំសម្ងំស្ងៀមលែងបានតទៅទៀតចំពោះការរំលោភបំពាននោះ បានបង្ហាញលិខិតស្នាមជាក់ស្ដែងថា មានបងប្អូនអ្នកមានអំណាចនៅភ្នំពេញ ម្នាក់ បានមកចុចGPS យកដីចម្ការដាំឫស្សី របស់លោកចំនួន១៤ហិកតារ នៅក្នុងភូមិពូធឿង ឃុំបិតត្រាំង ស្រុកព្រៃនប់ ក្រុងព្រះសីហនុ ខណៈដីចំនួន១៤ហិកតារ លិខិតស្នាមពីអាជ្ញាធរមូលដ្ឋានត្រឹមត្រូវ។
លោកឧញ៉ាទៀ វិចិត្រ បញ្ជាក់ថា លោកបានកាន់កាប់ដីខាងលើនេះ អស់រយៈពេល៩ឆ្នាំមកហើយ តែបងប្អូនអ្នកមានអំណាចនៅភ្នំពេញ ម្នាក់ បានមករំលោភបំពានយកកម្រោល ដោយឃុបឃិតធ្វើប្លង់គ្របដណ្ដប់លើលិខិតស្នាមរបស់អាជ្ញាធរមូលដ្ឋានទៅវិញ។
ជាមួយនឹងការឈឺចាប់ រកអ្វីថ្លែងស្ទើរតែមិនបាននោះ លោកឧញ៉ាទៀ វិចិត្រ បន្ថែមថា នៅព្រឹកថ្ងៃទី១៧ ខែកញ្ញា ឆ្នាំ២០១៨នេះដែរ បងប្អូនអ្នកមានអំណាចនៅភ្នំពេញ ម្នាក់នោះ បានបញ្ជាឲ្យកូនចៅគេ ទៅកម្ទេចផ្ទះចាំចម្ការដាំឫស្សីរបស់លោកនោះ ខ្ទេចខ្ទីអស់។ តែយ៉ាងណា លោកមិនបានតបត ឬធ្វើអ្វីផ្ដេសផ្ដាសទៅលើពួកគេវិញដែរ ព្រោះមិនចង់ឲ្យខូចកេរ្តិ៍ឈ្មោះមេដឹកនាំប្រទេស។
ដីចំការមានទំហំ១៤១,១៨៥ម៉ែត្រការ៉េ ស្មើនឹងជាង១៤ហិចតា ហើយករណីនេះទើបតែកើតឡើងប្រមាណ១-២សប្ដាហ៍កន្លងទៅនេះ ខណៈដែលលោកមានឯកសារកាន់កាប់ស្របតាមច្បាប់ទាំងអស់។
ដីខាងលើនេះ គឺលោកឧកញ៉ា ទៀ វិចិត្រ ទិញពីឈ្មោះ ឡុង សុធា មានទីលំនៅភូមិ២ សង្កាត់លេខ១ ក្រុងព្រះសីហនុ ខេត្តព្រះសីហនុ កាលពីថ្ងៃទី៣០ ខែធ្នូ ឆ្នាំ២០១០ ដែលមានស្នាមមេដៃភាគីទាំងសង្ខាង និងត្រាទទួលស្គាល់ពីលោកមេឃុំបិតត្រាំង ឈ្មោះ ឡាក់ គៀន ផងដែរ។
គេនៅមិនទាន់ដឹងថា ភាគីដែលអះអាង ថា ជាដីរបស់គេជានរណាទេ ។ ហើយករណីនេះប្រហែលគេមានឯកសារគ្រប់គ្រាន់ហើយ បានជាគេហ៊ានធ្វើដល់ថ្នាក់នឹង ?
តែទោះជាយ៉ាងណា អ្នកមាន ប្តឹងអ្នកមាន គឺជារឿងចំណែកមួយ ក្នុងប្រព័ន្ធដីធ្លី ដែលគេតែងលឺ អ្នកមាន អ្នកធំ ធ្វើបាបរាស្រ្តខ្សត់ខ្សោយ តែនេះមិនចឹងឯណា ៕
