ខេត្តស្វាយរៀង៖ សង្វៀនមាន់មួយកន្លែងនៅក្បែរច្រករបៀង កម្ពុជា-វៀតណាម ស្ថិតក្នុងភូមិក្រសាំងជ្រុំ ឃុំគ្រួស ស្រុកស្វាយជ្រុំ ខេត្តស្វាយរៀង បើកឡើងដុះស្លែហើយមិនដែលឃើញមានសមត្ថកិច្ចខាងណាចេញមុខបង្ក្រាបសោះ តើសង្វៀនមួយនេះមានខ្នងប៉ុណ្ណាទៅបានជាសមត្ថកិច្ចមិនហ៊ានបង្ក្រាបសោះ!!??
កន្លងមកធ្លាប់មានសារព័ត៌មានជាច្រើនបានចេញផ្សាយ ពីទីតាំងខាងលើនេះដែរ តែមិនឃើញមានចំណាត់ការណាមួយពីសមត្ថកិច្ចម្តងណាសោះ។ មានប្រភពជាច្រើនបានលើកឡើងថា ទីតាំងសង្វៀនមាន់មួយកន្លែងនោះបានបើកជាយូណាស់មកហើយ ហើយអ្នកចូលទៅលេង មានទាំងជនជាតិវៀតណាម និងជនជាតិខ្មែរ អ្នកខ្លះហេតុតែញៀននឹងល្បែងជល់មាន់ សុខចិត្តធ្វើដំណើរមកពីរាប់សិបគីឡូឯណ្ណោះ ហើយមាន់ដែលយកទៅលេងជាមាន់ប្រភេទតខ្នាយដែកទៀតផង។
មានមតិខ្លះទៀតលើកឡើងថា ពួកគាត់មានការព្រួយបារម្ភយ៉ាងខ្លាំងចំពោះទីតាំងសង្វៀនមួយនេះ ដោយសារតែពេលខ្លះមានដូចជាប្តី ជាកូន ជាក្មួយ បានទៅចាក់ភ្នាល់ផងដែរ ហើយពេលពួកគាត់ហាមឃាត់ ប្តី កូន ក្មួយ មិនអោយទៅលេង ពេលខ្លះក៏បង្កជាការឈ្លោះប្រកែកគ្នាក៏មាន ។ រីឯអ្នកលេងខ្លះទៀតក៏កើតជារឿងក្តៅក្រហាយ ហើយរករឿងប្រពន្ធកូន ពេលចេញពីលេងវិញ ដោយសារតែពួកគេចាញ់ល្បែងនេះតែម្តង។
ប្រជាពលរដ្ឋជាច្រើន បានសំណូមពរដល់សមត្ថកិច្ចក្នុងមូលដ្ឋាន លោកអភិបាលស្រុក លោកអធិការស្រុក ជាពិសេសឯកឧត្តមអភិបាលខេត្ត និងលោកឧត្តមសេនីយ៍ទោ ស្នងការខេត្តស្វាយរៀង សូមជួយចាត់កម្លាំងចុះត្រួតពិនិត្យទីតាំងសង្វៀនខាងលើនេះផង៕