ខេត្តបាត់ដំបង៖មតិមហាជនបានសាទ័រចំពោះស្នងការនគរបាលខេត្តបាត់ដំបងដែលបានចាប់ផ្តើមអនុវត្តក្នុងគោលបំណងរឹតបន្តឹងលើមន្ត្រីនគរបាលចំណុះអោយស្នងការខេត្តទាំងអស់មានភាពស្អាស្អំត្រូវចូលខ្លួនដើម្បីពិនិត្យរកសារជាតិញៀននៅក្នុងខ្លួនអោយបានគ្រប់ៗគ្នាតាមរយះពិនិត្យទៅលើទឹកនោម។ ការថ្លែងសាទ័ររបស់មហាជននេះស្របពេលដែលលោកឧត្តមសេនីយ៍ទោអ៊ុច.សុខុនស្នងការនគរបាលខេត្តបាត់ដំបងបានដាក់បទបញ្ជាឲ្យមន្ត្រីជំនាញធ្វេីតេស្តទៅលើទឹកនោមរបស់មន្ត្រីនគរបាលម្នាក់ៗដើម្បីស្វែងរកសារជាតិញៀនក្រែងមានមន្ត្រីនគរបាលជាតិចំណុះអោយស្នងការដ្ឋាននគរបាលខេត្តបាត់ដំបងណាម្នាក់បានប្រព្រឹត្តនាពេលកន្លងមក។
ការពិនិត្យរកសារជាតិញៀននៅក្នុងទឹកនោមរបស់ស្នងការខេត្តទៅលើមន្ត្រីនគរបាលទាំងអស់នេះដែរបានចាប់ផ្តើមឡើងនៅថ្ងៃទី១៩ខែសីហាឆ្នាំ២០១៩នេះដែលត្រូវបានកំណត់អោយមន្ត្រីនគរបាលចំណុះស្នងការដ្ឋាននគរបាលខេត្តបាត់ដំបងទាំងអស់ត្រូវបង្ហាញមុខដេីម្បីធ្វើតេស្តទឹកនោមដើម្បីស្វែងរកសារជាតិញៀននៅក្នុងខ្លួន។ ក្នុងករណីរកឃេីញថាមន្រ្តីនគរបាលរូបណាមានផ្ទុកសារជាតិញៀននៅក្នុងខ្លួនមន្ត្រីនគរបាលរូបនោះនឹងត្រូវចាត់វិធានការជាក់ស្តែងស្របតាមវិន័យលេខ០០៦របស់កងកម្លាំងនគរបាលជាតិឬករណីធ្ងន់ធ្ងរត្រូវអនុវត្តតាមច្បាប់ជាធរមានផងដែរ។យោងតាមលិខិត៦៩/១៩ជប្រគញចុះថ្ងៃទី១៦ខែសីហាឆ្នាំ២០១៩របស់ផែនការងារប្រឆាំងគ្រឿងញៀនដែលចុះហត្ថលេខាដោយលោកឧត្តមសេនីយ៍ត្រីកុយ.ហៀងស្នងការរងផែនការងារប្រឆាំងគ្រឿងញៀនបានឲ្យដឹងថាចាប់ពីថ្ងៃទី១៩ខែសីហាឆ្នាំ២០១៩នេះទៅមន្រ្តីនគរបាលចំណុះស្នងការដ្ឋាននគបាលខេត្តបាត់ដំបងទាំងអស់ត្រូវមានវត្តមានដេីម្បីធ្វេីតេស្តទឹកនោមស្វែងកសារជាតិញៀននៅក្នុងខ្លួន។តាមមតិមហាជនក៏ដូចជាគោលបំណងរបស់លោកស្នងការផងដែរបានអោយដឹងថាការអនុវត្តបែបនេះគឺដេីម្បីបង្ហាញអោយសាធារណះជនក៏ដូចជាប្រជាពលរដ្ឋដឹងថាមន្រ្តីនគរបាលត្រូវតែជាមន្រ្តីដែលស្អាតស្អំជាពិសេសពាក់ព័ន្ធជាមួយបញ្ហាគ្រឿងញៀននេះតែម្តងដែលកំពង់ធ្វើអោយមនុស្សឬសង្គមអន្តរាយគប្បីទប់ស្កាត់និងបង្ក្រាបអោយខានតែបាន៕សៅ សារិទ្ធ
