ស្វាយរៀង ៖ នៅព្រឹកថ្ងៃទី ២០ខែសីហាឆ្នាំ ២០១៩ នេះ លោកជំទាវកិត្តិសង្គហបណ្ឌិត ម៉ែន សំអន ប្រធានក្រុមការងាថ្នាក់ជាតិចុះជួយខេត្តស្វាយរៀង បានថ្លែងថា មន្ទីរពេទ្យបង្អែក “សាមគ្គីស្រុករំដួល” ដែលទើបប្រសូតថ្មីសន្លាងអស់ថវិកាជិត៦០ដុល្លារសហរដ្ឋអាមេរិក ពិតជាមានសារៈសំខាន់ណាស់សម្រាប់បម្រើសេវាជូនពលរដ្ឋកំពុងតែមានតម្រូវការចាំបាច់បំផុត។
លោកជំទាវកិត្តិសង្គហបណ្ឌិតថ្លែងបែបនេះខណៈដែលលោកជំទាវបានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឲ្យប្រើប្រាស់ជា ផ្លូវការមន្ទីរពេទ្យបង្អែកសាមគ្គីស្រុករំដួល ស្ថិតនៅ ឃុំកំពង់ចក ស្រុករំដួល ខេត្ត ស្វាយរៀង។ មន្ទីរពេទ្យនេះចំណាយថវិកាអស់ ប្រមាណ ៥៦ម៉ឺនដុល្លារ ជាថវិកាកសាងរបស់សម្តេចអគ្គមហាសេនាបតីតេជោ ហ៊ុន សែន តាមរយៈ លោកនាយឧត្តមសេនីយ៍ ខ្វាន់ ស៊ាម និង សប្បុរសជន។
ក្នុងឱកាសសំណេះសំណាលក្នុងពិធីនោះផងដែរ ក្នុងនាមរាជរដ្ឋាភិបាលកម្ពុជា ក្រុមការងារ គណៈកម្មាធិការកណ្តាល ចុះជួយខេត្ត ស្វាយរៀង និងក្នុងនាម លោកជំទាវកិត្តិសង្គហបណ្ឌិតផ្ទាល់ សូមគាំទ្រចំពោះ សម្តេចតេជោ នាយករដ្ឋមន្ត្រី ដែលបានយកចិត្តទុកដាក់អំពីសុខុមាលភាពរបស់ប្រជាពលរដ្ឋនៅតាមមូលដ្ឋាន ដោយបាន បង្កើតឲ្យមានមន្ទីរពេទ្យ ឬមណ្ឌលសុខភាពឲ្យ នៅជិតផ្ទះរបស់លោកអ្នក ដើម្បីចូលរួមចំណែក ក្នុងការកាតប់បន្ថយនូវភាពក្រីក្រ ស្របតាម យុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលមានវិស័យសុខាភិបាលជាវិស័យអាទិភាព។
លោកជំទាវកិត្តិសង្គហបណ្ឌិតម៉ែន សំអនបានណែនាំដល់បុគ្គលិកពេទ្យទាំងអស់ជាពិសេសមន្ទីរពេទ្យបង្អែកនេះ ដែល កំពុងធ្វើប្រតិបត្តិការផ្ដល់សេវាលើការសង្គ្រោះ និងពិនិត្យ ព្យាបាលជំងឺជូន ប្រជាជន សូមប្រកាន់ភ្ជាប់នូវក្រមសីលធម៌វិជ្ជាជីវៈ និងតម្កល់នូវទឹកចិត្ដ អាណិត ស្រលាញ់អ្នកជំងឺ ដែលជាអ្នកមកទទួល និងប្រើប្រាស់សេវានៅ មន្ទីរពេទ្យ។ មន្ត្រីរាជការ បុគ្គលិកសុខាភិបាល នៅគ្រប់ជាន់ថ្នាក់ទាំងអស់ ត្រូវ បន្តការខិតខំអនុវត្តភារកិច្ចរបស់ខ្លួនដោយស្មារតីទទួលខុសត្រូវខ្ពស់ ជាពិសេស ការលុបបំបាត់សេវាសុខាភិបាលខុសច្បាប់ និងឱសថក្លែងក្លាយដើម្បីផ្ដល់សេវាសុខភាពឱ្យកាន់តែមានគុណភាព សំដៅលើកកម្ពស់ប្រសិទ្ធភាពនៃការ ការពារ-សុខភាព និងព្យាបាលឱ្យកាន់តែប្រសើរឡើងថែមទៀត៕ ដោយ=សុខ ហ៊រ