បាត់ដំបង ៖ កុមារតូចៗដែលជាសិស្សថ្នាក់មត្តេយ្យសិក្សាចំនួន១០៣នាក់ ក្នុងសង្កាត់អូរចារកណ្តាលក្រុងបាត់ដំបង ដែលបានយកដើមឆត្រ័រួតធ្វើជាដំបូលសាលារៀនជាច្រើនជំនាន់ជិត២០ឆ្នាំមកហើយ ខណៈសិស្សបឋមសិក្សាមានថ្នាក់រៀនសមរម្យ ។
អ្នកស្រី គៀន យិន ជាគ្រូបន្ទុកបង្រៀនសិស្សមត្តេយ្យសាលាបានអោយដឹងនៅថ្ងៃទី២៦ ខែមករា ឆ្នាំ២០១៧នេះថា សិស្សកុមារដែលរៀននៅក្រោមដើមឆត្រ័រួតមានចំនួន៣ថ្នាក់ និង៣កំរិតក្នុងនោះ មានកំរិតទាប កំរិតមធ្យម និងកំរិតខ្ពស់ សរុបទាំងអស់ចំនួន១០៣នាក់ រួមទាំងអ្នកគ្រូចំនួន៤នាក់ផងដែរ ។ បន្ទាប់ពីសាលាមត្តេយ្យហ៊ុនសែនអូរចារមានសភាពចាស់ទ្រុឌទ្រោម ហើយលេចទឹក និងមានភក់ទៀតនោះ តាំងពីនៅឆ្នាំ២០០០អ្នកគ្រូទាំងអស់បានសម្រេចចិត្តមកស្នើរសុំទីតាំងសាលាបឋមសិក្សាហ៊ុនសែនអូរចារ ដើម្បីបង្រៀនសិស្សវិញទោះ ជាគ្មានបន្ទប់រៀននៅក្រោមដើមឈើក៍ដោយ ។
អ្នកគ្រូ សួ ផារី បានអោយដឹងដែរថា រយៈពេល១៧ឆ្នាំមកនេះ ពួកគាត់តស៊ូបង្រៀនសិស្សប្រឈមនិងបញ្ហាលំបាកជាច្រើន ព្រោះតែអាណិតក្មេងៗនិងឪពុកម្តាយសិស្ស ។ ចំពោះការបង្រៀនពេលថ្ងៃវិញ គឺប្រឈមនិងកំដៅថ្ងៃ ត្រូវនាំសិស្សរត់ទៅជ្រកនៅតាមសំយាបមុខថ្នាក់គេ ឬចូលរៀននៅក្នុងឃ្លាំងដាក់សម្ភារៈសាលា ជាពិសេសនៅរដូវវស្សាពេលមេឃភ្លៀង ត្រូវរត់រកកន្លែងជ្រកភ្លៀង ហើយបញ្ចូលថ្នាក់គ្នាតែ១ឬត្រូវរំសាយលេងបានបង្រៀនបន្ដរទៅទៀត ។ ពួកគាត់បន្តថា ពួកគាត់ដែលជាអ្នកគ្រូបានស្នើទៅកាន់មន្ទីរអប់រំច្រើនលើកច្រើនសារដែរ តែមិនទទូលបានលទ្ធផល ។
ឆ្លើយតបនិងបញ្ហានេះ លោក យី សុគី អនុប្រធានមន្ទីរអប់រំខេត្តបាត់ដំបងបានបញ្ជាក់ថា ខាងមន្ទីរបានបញ្ជូនសំណើជុំវិញបញ្ហាខាងលើនេះ ជាយូរមកហើយដែរទៅដល់ក្រសួង ក្រោយមក ក្រសួងក៏បានដាក់គម្រោងសាងសង់អតីតសាលាមត្តេយ្យ ហ៊ុន សែន អូរចារនេះម្តងរួចមកហើយដែរ ប៉ុន្តែផ្ទៃដីសាងសង់មិនមានគ្រប់គ្រាន់ ក៏បង្វែរគម្រោងដែលមាននេះទៅសាងសង់សាលាផ្សេងវិញ ហើយសាលាមតេយ្យក៏ត្រូវបានខកខាន ។ ទោះជាយ៉ាងណាក៏ដោយ បច្ចុប្បន្ននេះ ក្រសួងអប់រំក៏កំពុងរកទីតាំងក្នុងមូលដ្ឋានក្នុងភូមិអូរចារ សង្កាត់អូរចារ ក្រុងបាត់ដំបង ឲ្យបានសមរម្យ ដើម្បីបានសាងសង់សាលាមត្តេយ្យអោយសិស្សបានសិក្សារៀនសូត្រសមរម្យដូចក្មេងដ៍ទៃទៀត ។
ក្រុមអ្នកគ្រូព្រមទាំងមាតាបិតាសិស្សសាលាមតេយ្យដ៏កំសត់នេះសង្ឃឹមថា មន្ទីរឬក្រសួងពាក់ព័ន្ធនិងរកដំណោះស្រាយនេះឲ្យបានឆាប់សម្រាប់ឲ្យពួកគេទទួលបានសាលារៀនសមរម្យដូចសិស្សដ៏ទៃទៀតក្នុងពេលដ៏ខ្លីខាងមុខ ៕
សៅ សារិទ្ធ
