បាត់ដំបង ៖ ថ្លែងក្នុងពិធីបិទសន្និបាតបូកសរុបលទ្ធផលការងារ ឆ្នាំ២០១៦ និងលើកទិសដៅការងារឆ្នាំ២០១៧ របស់រដ្ឋបាលខេត្តបាត់ដំបង កាលពីព្រឹកថ្ងៃទី២៦ មករា សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានជំរុញឲ្យអាជ្ញាធរខេត្តបន្តការបង្ក្រាបបទល្មើសនេសាទឲ្យបានខ្លាំងក្លាថែមទៀត ក្នុងដែនសមត្ថកិច្ចរបស់ខ្លួនកុំឲ្យមាននៅសេសសល់ ។
សម្តេចក្រឡាហោមបន្តថា ៖ ដោយកន្លងមកសម្តេចបានជិះយន្តហោះមើលពីលើបឹងទន្លេសាប ឃើញមានបទល្មើសនេសាទដាក់បរណរ៉ាវ និងឧបករណ៍ខុសច្បាប់ផ្សេងៗព្រោងព្រាត ធ្វើឲ្យធនធានមច្ឆាជាតិរងការអន្តរាយដាច់ពូជយ៉ាងធ្ងន់ធ្ងរ ។ ក្រោយពីមានបទបញ្ជាអាជ្ញាធរខេត្តបាត់ដំបងបានបង្ក្រាបមួយប្រាវ ។ តែពេលនេះ សម្តេចក្រឡាហោមបានជិះយន្តហោះពិនិត្យមើលម្តងទៀតឃើញថា បទល្មើសនេសាទទាំងនោះមានការថយចុះខ្លះ អាចនៅមានសេសសល់ចំនួនតិចតួច ទើបសម្តេចជំរុញឲ្យបន្តការបង្ក្រាបថែមទៀតអ្វីដែលនៅសេសសល់នោះ ។
សម្តេចក្រឡាហោមបន្តថា ៖ ការចុះបង្ក្រាបរបស់អាជ្ញាធរខេត្តបាត់ដំបងអាចអនុវត្តបាន ជាមួយកងកម្លាំងប្រដាប់អាវុធក្នុងមូលដ្ឋាន ដោយមិនចាំបាច់ប្រើកម្លាំងអន្តរាគមន៏ជំនួយពិសេសពីលើទេ ។ សម្តេចថា កម្លាំងបង្ក្រាបមានគ្រប់គ្រាន់សមល្មមហើយ សម្រាប់អនុវត្តន៍នៃការបង្ក្រាបក្នុងខេត្តបាត់ដំបង ។
សម្តេចថា ដោយឡែក ចំពោះខេត្តផ្សេងដូចជាខេត្តកំពង់ឆ្នាំង ឬពោធិសាត់២ ខេត្តនេះ ពិតជាត្រូវការកម្លាំងជំនួយជួយក្នុងការបង្ក្រាប ។ បន្ថែមពីនេះទៀត សម្តេចក្រឡាហោមបានជំរុញឲ្យអាជ្ញាធរខេត្ត មន្ទីរ អង្គភាពនានានិងកងកម្លាំងប្រដាប់អាវុធទាំងអស់រួមគ្នាដោះស្រាយទប់ស្កាត់ឲ្យខានតែបាន នូវបញ្ហាសេសសល់នានា ដូចជា ករណីគ្រឿងញៀន ល្បែងស៊ីសងគ្រប់ប្រភេទ គ្រោះថ្នាក់ចរាចរណ៍ វិស័យព្រៃឈើ កសិកម្ម ការអប់រំកុមារតូចៗ នៅតាមមូលដ្ឋាន វិស័យទេសចរ បរិស្ថាន ការងារផ្តល់សេវាសាធារណៈ សន្តិសុខ សណ្តាប់ធ្នាប់សាធារណៈ និងភាពយុត្តិធម៌ជូនដល់ប្រជាពលរដ្ឋ ដែលពាក់ព័ន្ធករណីដីធ្លីឲ្យបានល្អប្រសើផងដែរ ។
ឆ្លើយតបនិងការជំរុញបន្ថែមលើករណីបទល្មើសនេសាទរបស់សម្តេចក្រឡាហោម ស ខេង លោក ច័ន្ទ សុផល អភិបាលនៃគណអភិបាលខេត្តបាត់ដំបងបានលើកយករបាយការណ៍ដែលអាជ្ញាធរខេត្តបានអនុវត្តន៍កន្លងមកបង្ក្រាបបទល្មើសលើវិស័យជលផលបានចំនួន២៧០ករណី ក្នុងនោះ ពិន័យអន្តរការចំនួន១៨ករណី បំផ្លាញវត្ថុតាងចោលមានចំនួន២៥១ករណី និងបញ្ជូនទៅតុលាការ០១ករណី ហើយបន្ទាប់ពីនេះ អាជ្ញាធរខេត្តក៏បានប្តេជ្ញាបន្តការបង្ក្រាបនេះឲ្យកាន់តែមានប្រសិទ្ធិភាពខ្ពស់ ៕
សៅ សារិទ្ធ