មតិខ្វែងយោបល់គ្នានេះ បានកើតឡើងរយៈពេល៣ថ្ងៃមកហើយ ខណៈក្រសួងវប្បធម៌និងវិចិត្រសិល្បៈ បានចុះមកចរចារជាមួយព្រះសង្ឃគង់នៅវត្តព្រះនាគ និងប្រជាពលរដ្ឋនៅស្រុកអង្គស្នួលនេះ ដោយសុំយកពុទ្ធរូប២អង្គ ទៅរក្សាទុកនៅសារមន្ទីរជាតិ ដោយយោងហេតុផលថា ខ្លាចបាត់បង់ ដោយសារពុទ្ធរូប២អង្គនេះ មានតម្លៃខ្ពស់ និងជាវត្ថុបុរាណផងដែរ ។
ការចរចាមិនត្រូវគ្នានេះ ដោយសារព្រះសង្ឃនិងគណៈកម្មការវត្ត ព្រមទាំងប្រជាពលរដ្ឋចង់ទុកព្រះពុទ្ធរូប និងវត្ថុបុរាណជាច្រើននោះ សម្រាប់ជាទីសការៈបូជា និងខ្លះនិយាយថា បើសិនជាយកចេញពីវត្តនេះ ខ្លាចតែមានគ្រោះទុរភិក្សចង្រៃណាមួយកើតឡើង ប៉ុន្តែអាជ្ញាធរ និង សមត្ថកិច្ចថា បើសិនទុកវត្ថុបុរាណ និង ព្រះពុទ្ធរូបទាំងពីរអង្គនោះនៅក្នុងវត្តនេះ គឺមានការប្រឈមនឹងបាត់បង់ ។ ដូច្នេះហើយ បើតាម លោក នីម នីរ៉ាដេត អភិបាលស្រុកអង្គស្នួល បានទទូចសុំឲ្យក្រសួងវប្បធម៌យកវត្ថុបុរាណ និងព្រះពុទ្ធរូបទាំងពីរអង្គនោះទៅរក្សាទុកនៅសារៈមន្ទីរ និង សុំឲ្យក្រសួងធ្វើកំណាយដើម្បីបញ្ចប់នូវមន្ទិលសង្ស័យរបស់ប្រជាពលរដ្ឋ ។
ការចរចារជាថ្មីនឹងធ្វើឡើងនៅថ្ងៃសុក្រ ទី ៣ខែគុម្ភៈ ឆ្នាំ ២០១៧ ខាងមុខនេះ
សូមបញ្ជាក់ថាពុទ្ធរូប២អង្គនេះ ត្រូវបានគាស់ឃើញដោយបុរសម្នាក់ឈ្មោះ ម៉ៅ អំលុងឆ្នាំ
១៩៨២មកម្លេះ ហើយយកមករក្សាទុកមកដល់បច្ចុប្បន្ន ក៏ស្រាប់តែបែកធ្លាយដល់ជនសង្គមងងឹត មកសុំចរចារទិញក្នុងតម្លៃខ្ពស់ តែព្រះសង្ឃ និងពលរដ្ឋមិនព្រមលក់ដាច់ខាត ៕
ដោយ លោក ស្លៃម៉ាន ហ្សាកាតា ភ្នាក់ងារប្រចាំខេត្តកណ្តាល
