ភ្នំពេញ ៖ រថយន្តទំនើបមួយគ្រឿង បានបោះពួយយ៉ាងលឿន ជ្រុលបុកបង្កាន់ស្ពាន បណ្ដាលឱ្យរថយន្តផ្នែកខាង មុខខ្ទេចទាំងស្រុង រីឯអ្នកបើកបរ បានចាកចេញបាត់ នៅវេលាម៉ោង ៨និង២០នាទីយប់ ថ្ងៃទី១២ ខែឧសភា ឆ្នាំ ២០២០ នៅតាមបណ្ដោយផ្លូវលេខ២១៧ មុខផ្ទះលក់ភេសជ្ជៈលីណា សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
រថយន្តបង្ក ម៉ាក Range Rover ពណ៌ស ពាក់ស្លាកលេខ ភ្នំពេញ 2BH-6588 បើកបរដោយបុរសម្នាក់ ចាកចេញពីកន្លែងកើតហេតុបាត់ ប៉ុន្តែនៅក្នុងរថយន្ត គេបានរកឃើញឯកសារមួយចំនួន ( កាតសម្គាល់ការងារ ដែលមានឈ្មោះ កី ម៉ានេរ៉ា មានតួនាទីជា អនុប្រធាន អង្គភាពសាលាដំបូងរាជធានីភ្នំពេញ ) ។
ប្រភពបានឱ្យដឹងថា រថយន្តបង្ក បើកបរដោយបុរសម្នាក់ មិនទាន់ស្គាល់អត្តសញ្ញាណ បានបើកតាមបណ្តាយផ្លូវ លេខ២១៧ ពីត្បូងទៅជើងយ៉ាងលឿន លុះចំណុចខាងលើក៏បុកបង្កាន់ដៃ ស្ពានថ្មព្រែកជ្រៃ បណ្ដាលឱ្យរថយន្ដ ខូចខ្ទេចមុខទាំងស្រុង និងស្ពាន រងការខូចខាតមួយចំនួន ហើយអ្នកបើកបរ បានចាកចេញទៅបាត់។
បន្ទាប់មករថយន្ត ត្រូវបានប៉ូលិសចរាចរណ៍ ស្ទូចយកទៅរក្សាទុក រង់ចាំដោះស្រាយនៅពេលក្រោយ និងស្រាវជ្រាវរកម្ចាស់រថយន្ត ដើម្បីដោះស្រាយតាមនីវិធី ៕