សម្ដេចតេជោ សែន បានលើកឡើងនៅក្នុងសារមួយដែលសំដៅជាសំខាន់ទៅកាន់ ក្រុមអ្នកសារព័ត៌មាន និងពលរដ្ឋខ្មែរទូទាំងប្រទេសថា ដោយមើលឃើញពីភាពចាំបាច់ និងសារសំខាន់ នៃការបញ្ចេញមតិ និងសេរីភាពសារព័ត៌មាន រាជរដ្ឋាភិបាលបានសម្រេចលុបចោលទោសជាប់ពន្ធនាគារ នៃបទបរិការកេរ្តិ៍ចេញពីក្រមព្រហ្មទណ្ឌ និងបានធានាថា មិនមានពលរដ្ឋណាម្នាក់ ត្រូវជាប់ពន្ធនាគារដោយសារការបញ្ចេញមតិឡើយ។
ដោយសារតែការផ្ដល់នូវសេរីភាពទូលំទូលាយ ខាងបញ្ចេញមតិ និងសារព័ត៌មាននេះ បើតាមសម្ដេចនាយករដ្ឋមន្ត្រីថា រហូតមកដល់ពេលនេះ មានមានអង្គរភាពសារព័ត៌មានជាតិ និងអង្គភាពសារព័ត៌មានបរទេស ទាំងមាននិន្នាការគាំទ្របក្សប្រឆាំង ក៏ដូចជាសារព័ត៌មានដែលគាំទ្ររាជរដ្ឋាភិបាលដែលកំពុងធ្វើការផ្សព្វផ្សាយ នៅក្នុងប្រទេសកម្ពុជា មានចំនួន៥៣០អង្គភាព ក្នុងនោះមានកាសែតផ្សាយជាភាសាបរទេសចំនួន៤៣អង្គភាព ទស្សនាវដ្ដី៣០៦អង្គភាព ព្រឹត្តិបត្រ៤២អង្គភាព ការិយាល័យតំណាងភ្នាក់ងារសារព័ត៌មានបរទេស និងការិយាល័យតំណាងវិទ្យុ-ទូរទស្សន៍បរទេសប្រចាំអចិន្ត្រៃនៅកម្ពុជា មានចំនួន២១អង្គភាព សា្ថនីយវិទ្យុចំនួន២២១ ស្ថានីយទូរទស្សន៍ចំនួន២២ និងទូរទស្សន៍ផ្សាយបន្តមានចំនួន១១២ស្ថានីយ ស្ថានីយទូរទស្សន៍ផ្កាយរណបតេជោធីវីមាន១ស្ថានីយ ទូរទស្សន៍ឌីជីថល (Pay-TV) មាន៤ស្ថានីយ និងទូរទស្សន៍អនឡាញមានចំនួន៥៨អង្គភាព កំពុងដំណើរការធ្វើអាជីវកម្ម នៅកម្ពុជា។
ថែមលើនេះដើម្បីសម្រួលការងារដល់អ្នកសារព័ត៌មាន និងផ្ដល់ឲ្យពលរដ្ឋទទួលបានព័ត៌មានទូលំទូលាយ សម្ដេចក៏បានអះអាងផងដែរថា រាជរដ្ឋាភិបាលបានប្រគល់ភារកិច្ចឲ្យក្រសួងព័ត៌មាន សហការជាមួយការិយាល័យសិទ្ធិមនុស្ស របស់អង្គការសហប្រជាជាតិ នៅកម្ពុជា អង្គការយូណេស្កូ អង្គការសង្គមស៊ីវិល ព្រមទាំងដៃគូរពាក់ព័ន្ធនានា រៀបចំសេចក្ដីព្រាងច្បាប់ ស្ដីពីសិទ្ធិទទួលព័ត៌មាន ឲ្យបានរួចរាល់នៅក្នុងនីតិកាលទី៥ នៃរដ្ឋសភា ដើម្បីធានាការផ្ដល់ជូនប្រជាពលរដ្ឋក្នុងការទទួលបានព័ត៌មានពីស្ថាប័នរដ្ឋជាអតិបរមា ដែលជាកត្តាជម្រុញឲ្យការអនុវត្តប្រជាធិបតេយ្យនីយកម្មសង្គមកម្ពុជា របស់រាជរដ្ឋាភិបាលទទួលបានជោគជ័យ ដោយមានការចូលរួមពីប្រជាពលរដ្ឋ និងអ្នកសារព័ត៌មានព្រមទាំងដៃគូរពាក់ព័ន្ធផ្សេងទៀត ៕
