បន្ទាយមានជ័យ៖ ប្រជាពលរដ្ឋរស់នៅ ខេត្តបន្ទាយមានជ័យ បានឲ្យដឹងថា ចាប់តាំងពីលោក ឆែ សុធា ត្រូវបានថ្នាក់លើ ប្រកាសតែងតាំងជា ប្រធានសាខាគយ ខេត្តបន្ទាយមានជ័យ កាលពីថ្ងៃទី២៣ ខែធ្នូ ឆ្នាំ២០១៥ ជំនួសលោក ថោង សុខាំភូ រហូតមកដល់ពេលនេះ មានការរិះគន់ខ្លាំងៗ ពីមជ្ឈដ្ឋានជាច្រើនថា ការដកលោក ថោង សុខាំភូ ដាក់លោក ឆែ សុធា ឌាតែខ្នូច… ដូចតែគ្នា… ដែលវាមិនខុសពីការដក អគ្គនាយកគយដុះស្លែ ប៉ែន ស៊ីម៉ន ដាក់អគ្គនាយកគយថ្មី គុណ ញឹមប៉ុន្មានទេ… ។
ពួកគាត់បាននិយាយថា បន្ទាប់ពីបានចូលទៅ កាន់កាប់តំណែងខ្លាញ់ ជាប្រធានសាខាគយ ខេត្តបន្ទាយមានជ័យ រយៈពេលប្រមាណជាង ១ ឆ្នាំមកនេះ លោកប្រធានសាខា ឆែ សុធា កាន់តែមានឈ្មោះ ល្បីខ្លាំងឡើងៗហើយ ក្នុងការប្រើប្រាស់តួនាទី និងជំនាញរបស់ខ្លួន ដើម្បីរកផលប្រយោជន៍ ពីពួកឈ្មួញទាំងខុសច្បាប់ ទាំងត្រូវច្បាប់ខ្លះខុសខ្លះ យកធ្វើមានបាន ជាមួយបក្ខពួកមួយក្ដាប់តូច ធ្វើឲ្យខូចខាតដល់ ផលប្រយោជន៍ជាតិ មិនតិចទេក្នុង ១ ខែៗ ដូចជា ករណីកន្លងមក គាត់បណ្ដោយឲ្យកូនចៅ បង្កើតកុងត្រូលជជុះ គាបយកលុយពី រថយន្តដឹកទំនិញចេញ-ចូល និងការឃុបឃិត បើកដៃឲ្យឈ្មួញនាំចូល ទំនិញគេចពន្ធផង ទំនិញខុសច្បាប់ផង យ៉ាងអនាធិបតេយ្យ ដោយអាងមានលោក គុណ ញឹម អគ្គនាយកថ្មី នៃអគ្គនាយកដ្ឋានគយ និងរដ្ឋាករ ជាខ្នងបង្អែកដ៏រឹងមាំ។
ឈ្មួញខ្លះបានឲ្យដឹងថា ខេត្តបន្ទាយមានជ័យសព្វថ្ងៃ មានកុងត្រូលជជុះ របស់គយចំនួន ៣កន្លែង និងក្រុមគយចល័ត ១ក្រុម មានរថយន្តប្រដេញ យ៉ាងប្រសេចប្រសាច ផ្ទុយពីបទបញ្ជា របស់សម្តេចតេជោ ហ៊ុន សែន ដែលកុងត្រូលជជុះទី១ នៅចំណុច ផ្លូវលេខ ៥០ ភូមិកូនដំរី សង្កាត់និមិត្ត ក្រុងប៉ោយប៉ែត, កុងត្រូលជជុះទី២ នៅចំណុច សាលាក្រហម ឃុំសុភី ស្រុកអូរជ្រៅ និងកុងត្រូលជជុះទី៣ នៅចំណុចក្បែរកន្លែងលក់ក្រឡាន ផ្លូវជាតិលេខ៥ ឃុំគោកទន្លាប់ ស្រុកមង្គលបុរី ខេត្តបន្ទាយមានជ័យ ។ មន្ត្រីគយតូចតាច បានខ្សិបប្រាប់ថា ការដែលលោក ឆែ សុធា ហ៊ានធ្វើអ្វីៗតាមអំពើចិត្ត ដោយសារអាងមានឧកញ៉ា ដ៏មានឥទ្ធិពល ម្នាក់ជាមិត្តភក្តិ និងមានលោក គុណ ញឹម អគ្គនាយកថ្មី នៃអគ្គនាយកដ្ឋានគយ និងរដ្ឋាករ កម្ពុជា ធ្វើជាខ្នងបង្អែក លែងខ្វល់ដល់បទបញ្ជា របស់សម្តេចតេជោ ហ៊ុន សែន នាយករដ្ឋមន្ត្រីទៅហើយ…។
គួររំលឹកដែរថា កន្លងមក សម្តេចតេជោ នាយករដ្ឋមន្ត្រី ហ៊ុន សែន ធ្លាប់ប្រកាសព្រមាន ដល់ពួកមន្ត្រីៗ អាងខ្នងទាំងឡាយ រួចមកហើយថា …សូមកុំអាងខ្នងឲ្យសោះ… កុំថាឡើយ ខ្នងអ្នកឯង ពាក់ត្រឹមផ្កាយ ប៉ុន្មាននោះ… ទោះពាក់ដល់លោកខែ ក៍ដកបានភ្លាមដែរ គឺយកល្អ ត្រូវតែអាងខ្នង ហ៊ុន សែន ម្នាក់ទៅបានហើយ… ហើយអ្នកដែលមានខ្នង ឲ្យគេអាងអីនោះ ក៍ត្រូវតែបញ្ឈប់ដែរ… ប្រយ័ត្នអស់ខ្នង ខានឲ្យគេអាង… ។ ពាក្យសម្ដីនេះ ប្រជាជនម្ចាស់ឆ្នោត គោរពគាំទ្រ ១០០% ចំពោះសម្តេចតេជោ នាយករដ្ឋមន្ត្រី ហ៊ុន សែន និងសន្យាថា នឹងបោះឆ្នោតជូន គណបក្ស ប្រជាជនកម្ពុជា ឲ្យបានឈ្នះឆ្នោត ភ្លូកទឹកភ្លូកដី ដើម្បីបាន សម្តេចតេជោ ហ៊ុន សែន បន្តធ្វើនាយករដ្ឋមន្ត្រី ចាប់ពីឆ្នាំ២០១៨ តទៅទៀត ក្នុងគោលបំណង ចង់ឲ្យសម្តេចតេជោ ហ៊ុន សែនជួយចាត់ការពួកមន្ត្រីៗ ចូលចិត្តអាងខ្នង ក្នុងការប្រព្រិត្ត អំពើមិនគប្បីទាំងឡាយឲ្យអស់ តួយ៉ាងដូចករណីលោក ឆែ សុធា អាងខ្នងមេគយធំ… ជាដើម៕