ខេត្តកណ្តាល ៖ អធិការរងក្រុងតាខ្មៅម្នាក់ឈ្មោះ ចំរើន បញ្ញា ដែលត្រូវជាកូនលោកស្នងការខេត្ត អ៊ាវ ចំរើន ត្រូវបានប្រជាពលដ្ឋ៣នាក់ប្តឹងទៅក្រសួងមហាផ្ទៃពីបទរារាំងមិនឲ្យប្រជាពលរដ្ឋរងគ្រោះដាក់ពាក្យបណ្តឹងទៅអធិការដ្ឋាន និងកសាងសំណុំរឿងបំភ្លៃខុសការពិត ។ ពលរដ្ឋដែលប្តឹងអធិការរងក្រុងតាខ្មៅត្រូវបានគេស្គាល់ឈ្មោះ ទី១/ ឈ្មោះ កៅ ម៉ាណា ភេទស្រី អាយុ២៥ឆ្នាំ មានទីលំនៅភូមិទូលរការ សង្កាត់ចាក់អង្រែក្រោម ខ័ណ្ឌមានជ័យ រាជធានីភ្នំពេញ ។ ទី២/ ឈ្មោះ សាយ ស៊ីណា ភេទស្រី អាយុ៤៥ឆ្នាំ មានទីលំនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល និងទី៣/ ឈ្មោះ សុខ ជា ភេទស្រី អាយុ៧៧ឆ្នាំ មានទីនៅភូមិទួលរការ សង្កាត់ចាកអង្រែក្រោម ខ័ណ្ឌមានជ័យ រាជធានីភ្នំពេញ។
យោងតាមពាក្យបណ្តឹងក្រសួងមហាផ្ទៃ ពលរដ្ឋដែលជាជនរងគ្រោះបានរៀបរាប់ថា កាលពីថ្ងៃទី១៥ ខែតុលា ឆ្នាំ២០១៦ នាងខ្ញុំទាំងអស់គ្នាជាជនរងគ្រោះ ដោយអំពើហិង្សាបង្កឡើងពីក្រុមមនុស្សមួយក្រុមដែលបានព្រួតគ្នាវាយតប់មកលើនាងខ្ញុំទាំង៣នាក់ បណ្តាលឲ្យរងរបួសយ៉ាងដំណំ ។ ហេតុការណ៍នោះបានកើតឡើងនៅក្នុងផ្សារតាខ្មៅចាស់ ស្ថិតក្នុងសង្កាត់តាខ្មៅ ក្រុងតាខ្មៅ ខេត្តកណ្តាល ។ មូលហេតុដែលនាំឲ្យក្រុមជនបង្កវាយតប់មកលើនាងខ្ញុំ ដោយគ្រាន់តែទំនាស់ពាក្យសំដីបន្តិចបន្ទួចប៉ុណ្ណោះ ។ ប៉ុន្តែក្រុមជនបង្កហាក់មានគំនុំជាមួយនាងខ្ញុំ ពីពេលណាមកអញ្ចឹង ហើយបានមកព្រួតវាយនាងខ្ញុំទាំងកំរោលតែម្តង ។
ប្រជាពលរដ្ឋបានបញ្ជាក់ទៀតថា បន្ទាប់ពីរងរបួសដោយអំពើវាយប្រហាររបស់ក្រុមជនបង្ក នាងខ្ញុំទាំងអស់គ្នាបានព្យាយាមដាក់ពាក្យប្តឹងទៅអធិការដ្ឋាននគរបាលក្រុងតាខ្មៅ ដើម្បីជួយរកយុត្តិធម៌ ។ ប៉ុន្តែខណដែលមន្ត្រីនគរបាលក្រុងតាខ្មៅកំពុងតែធ្វើកំណត់ហេតុ និងទទួលពាក្យបណ្តឹងក៏ស្រាប់តែឈ្មោះ ឡុង បរិញ្ញា មន្ត្រីនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាល បានទៅរារាំងមិនឲ្យមន្ត្រីនគរបាលទទួលពាក្យបណ្តឹងរបស់នាងខ្ញុំ ។ ទន្ទឹមនោះលោក ចំរើន បញ្ញា អធិការងនគរបាលក្រុងតាខ្មៅ បែរជាឃុបឃិតជាមួយមន្ត្រីនគរបាល ឡុង បរិញ្ញា រៀបចំសំណុំរឿងខ្លួនឯង ដោយបង្វែសំណុំរឿងព្រហ្មទណ្ឌនេះទៅព្រហ្មទណ្ឌមួយនេះទៅវិញ ខណដែលមន្ត្រីនគរបាលទាំង២រូបនោះបានឃុបឃិតជាមួយភាគីជនបង្ក ហើយបង្វែសំណុំរឿងឲ្យជនបង្កទៅជាជនរងគ្រោះទៅវិញ ។
ប្រជាពលរដ្ឋដែលជាជនរងគ្រោះបានបញ្ជាក់ប្រាប់ក្រសួងមហាផ្ទៃថា ពួកគាត់សុំប្តឹងឈ្មោះ ចំរើន បញ្ញា អធិការរងក្រុងតាខ្មៅ និងឈ្មោះ ឡុង បរិញ្ញា មន្ត្រីនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្តកណ្តាលពីបទរារាំងដំណើរការស្វែងរកយុត្តិធម៌របស់នាងខ្ញុំ ហើយបានឃុបឃិតជាមួយជនបង្ក រួមទាំងមន្ត្រីនគរបាលមួយចំនួន ធ្វើកំណត់ហេតុផ្ទុយពីការពិត ។ ទន្ទឹមនោះសុំប្តឹងឈ្មោះ ឡុង បរិញ្ញា ពីបទយកតួនាទីជាមន្ត្រីនគរបាលមកការពារជនបង្កអំពើហិង្សាដោយចេតនា ។
ទាក់ទងនិងពាក្យបណ្តឹងខាងលើនេះ គេក៏ឃើញមានមន្ត្រីនគរបាលម្នាក់បានចេញមុខធ្វើជាសាក្សីឲ្យប្រជាពលដ្ឋ ដែលជាជនរងគ្រោះខាងលើ ហើយទាំងបានធ្វើលិខិតភ្ជាប់ជាមួយពាក្យបណ្តឹងនិងក្នុងនាមជាសាក្សីជូនទៅក្រសួងមហាផ្ទៃផងដែរ ។ មន្ត្រីរូបនោះឈ្មោះ ស្រី យ៉ា ភេទប្រុស អាយុ៥៧ឆ្នាំ ជាមន្ត្រីនគរបាលក្រុងតាខ្មៅ ដោយគាត់បានរៀបរាប់ក្នុងលិខិត បញ្ជាក់ក្នុងនាមជាសាក្សីថា ៖ ខ្ញុំបាទសូមធ្វើការបញ្ជាក់ក្នុងនាមសាក្សីថា កាលពីថ្ងៃទី១៥ វេលាម៉ោង ៨,៣០នាទ មានប្រជាពលរដ្ឋចំនួន៣នាក់ គឺទី១/ ឈ្មោះ កៅ ម៉ាណា ភេទស្រី អាយុ២៥ឆ្នាំ មានទីលំនៅភូមិទូលរការ សង្កាត់ចាក់អង្រែក្រោម ខ័ណ្ឌមានជ័យ រាជធានីភ្នំពេញ ។ ទី២/ ឈ្មោះ សាយ ស៊ីណា ភេទស្រី អាយុ៤៥ឆ្នាំ មានទីលំនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល និងទី៣/ ឈ្មោះ សុខ ជា ភេទស្រី អាយុ៧៧ឆ្នាំ មានទីនៅភូមិទួលរការ សង្កាត់ចាកអង្រែក្រោម ខ័ណ្ឌមានជ័យ រាជធានីភ្នំពេញ។ អ្នកទាំង៣បានមកអធិដ្ឋាននគរបាលក្រុងតាខ្មៅ ដើម្បីដាក់ពាក្យប្តឹងជនបង្កមួយក្រុមដែលរួមគ្នាធ្វើសកម្មភាពវាយដំពួកគាត់រហូតមានរបួសស្នាមធ្ងន់ធ្ងរ ។
មន្ត្រីនគរបាលជាសាក្សីបានបញ្ជាក់ថា អំឡុងពេលដែលប្រជាពលរដ្ឋទាំង៣នាក់មកដាក់ពាក្យបណ្តឹងនោះក៏ស្រាប់តែឈ្មោះ ឡុង បរិញ្ញា មន្ត្រីនគរបាលព្រហ្មទណ្ឌកម្រិតស្រាល ស្នងការដ្ឋាននគរបាលខេត្តបានដឹកនាំជនដៃដល់មកដល់ព្រមគ្នាដែរ ហើយបានបង្កសកម្មភាពអុកឡុកផ្អើលពេញអធិការដ្ឋានរំខានមិនឲ្យជនរងគ្រោះដាក់ពាក្យបណ្តឹងបាន។ ទន្ទឹមនោះមន្ត្រីនគរបាលដែលទទួលពាក្យបណ្តឹងក៏បញ្ឈប់ទទួលពាក្យពីជនរងគ្រោះ ព្រោះតែមន្ត្រីនគរបាលឈ្មោះ ឡុង បរិញ្ញា បង្កការអុកឡុកខ្លាំងពេក ។
តាមព័ត៌មានទទួលបានពាក្យបណ្តឹងរបស់ជនរងគ្រោះបានទៅដល់អគ្គាធិការដ្ឋានក្រសួងមហាផ្ទៃហើយ ហើយកំពុងត្រូវបានដាក់ជូនទៅរដ្ឋលេខាធិការទទួលបន្ទុកចាត់ការបន្តតាមនិតិវិធី ។
ទាក់ទិនព័ត៌មានខាងលើនេះ ព្យាយាមទំនាក់ទំនងទៅលោក ចំរើន បរិញ្ញា អធិការរងក្រុងតាខ្មៅ និងលោក ឡុង បរិញ្ញា មន្ត្រីនគរបាលព្រហ្មទណ្ឌខេត្តកណ្តាលផងដែរ ប៉ុន្តែមិនទាន់អាចទាក់ទងបាន ដើម្បីសុំការបំភ្លឺករណីពាក្យបណ្តឹងនោះ ៕
