ខេត្តរតនគិរី: ពលរដ្ឋបានឲ្យដឹងថា បារីម៉ាក៥៥៥ និងJET ត្រូវបានគេនាំចេញពីឃ្លាំងដែលមានទីតាំងនៅចំណុចក្បែរប៉ុស្តិ៍នគរបាលការពារព្រំដែនគោក៦០១ ចំណុះវរការពារព្រំដែនគោក៦២៣ ស្រុកអូរយ៉ាដាវ ខេត្តរតនគិរី ដូចព្យុះ ខណ:ដែលថៅកែបារីក្លែងក្លាយ ម៉ាក់៥៥៥ និងJET នេះ ត្រូវបានតុលាការសម្រេចឃុំ ខ្លួននៅឯទីក្រុងភ្នំពេញ។
តាមសេចក្ដីរាយការណ៍ថា បារីម៉ាកល្បីដែលសង្ស័យថាក្លែងក្លាយទាំងនោះត្រូវបានគេដឹកដោយរថយន្តកែច្នៃតាមកំណាត់ផ្លូវជាតិលេខ78.A ឆ្ពោះទៅច្រកទ្វារអូរ
យ៉ាដាវ ចូលក្រុមហ៊ុនកៅស៊ូ ៧៤ របស់វៀតណាម ដែលគ្រប់គ្រងដោយនគរ បាលប៉ុស្តិ៍៦០១ ភ្នំក្រហម។
ប្រភពបញ្ជាក់ថា ឃ្លាំងបារីនោះគ្រប់គ្រងដោយឈ្មោះកយ ជាមន្ត្រីនគរបាលការពារព្រំដែនគោកប៉ុស្តិ៍ឡុំ ជាប់ប៉ុស្តិ៍ ៦០១ ភ្នំក្រហម និងម្នាក់ទៀតឈ្មោះ ងួន សុវណ្ណា ហៅអូនធំ អតីតជាមេវរការពារព្រំដែនគោក៦២៣ ។
គួររម្លឹកថា ស្ថានភាពបែបនេះបានកើតឡើងបន្ទាប់ ពីឈ្មោះ ង៉ូវ ម៉ុក ជានាយិកាក្រុមហ៊ុន ហុងអ៊ិនធើណេសសិនណល (ហុង អន្តជាតិ)ត្រូវបានសាលាដំបូងធានីភ្នំពេញសម្រេចឃុំខ្លួនកាលពីថ្ងៃទី០៦ មករា ២០២២ បន្ទាប់ពីរកឃើញថា មានជាប់ពាក់ព័ន្ធទៅនឹងការផលិត វេចខ្ចប់ ចែកចាយបារីម៉ាក JET និង៥៥៥ ក្លែងក្លាយ៕
