ខេត្តព្រៃវែង ៖ ក្រោយពីបិទមួយរយៈខ្លី ពេលនេះសង្វៀនជល់មាន់របស់ជនជាតិវៀតណាម ដែលចូលហ៊ុនជាមួយជនជាតិខ្មែរ នៅស្វាយអាង៉ោង ស្ថិតនៅភូមិរោង ឃុំចាម ស្រុកកំពង់ត្របែក ខេត្តព្រៃវែង បានបើកដំណើរការឡើងវិញហើយ ។
កាលពីថ្ងៃម្សិលមិញ ភ្នាក់ងារអ្នកយកព័ត៌មានយើង បានចុះទៅដល់ទីតាំងល្បែងស៊ីសងនេះផ្ទាល់តែម្តង តាមសេចក្តីរាយការណ៍របស់ពលរដ្ឋ ឃើញថា សង្វៀនបញ្ជល់មាន់នេះ បានបើកដំណើរលេងឡើងវិញ ដោយមានអ្នកញៀនល្បែងស៊ីសងទាំងជនជាតិខ្មែរ និងវៀតណាម មកលេងយ៉ាងពពាក់ពពូន ។
សេចក្តីរាយការណ៍របស់ពលរដ្ឋ បានបញ្ជាក់ថា ទីតាំងល្បែងស៊ីសងនេះ ទើបតែបើកដំណើរការឡើងវិញ៣- ៤ថ្ងៃប៉ុណ្ណោះ ក្រោយពីបិទមួយរយៈខ្លីក្នុងបរិបទឆ្លងរីករាលដាល នៃជំងឺកូវីដ-១៩ ។ តែយ៉ាងណា ពេលចាប់ផ្តើមបើកដំណើរការឡើងវិញ គេឃើញមានក្រុមអ្នកញៀនលែ្បងស៊ីសង បាននាំគ្នាស្ពាយអាគកសំណព្វចិត្តរបស់ខ្លួនស្កាត់ ទៅបញ្ជល់គ្នា ភ្នាល់ដាក់ប្រាក់ និងស្រែកហ៊ោកញ្ជ្រៀវយ៉ាងទ្រហឹងអើងកង ។
ប្រជាពលរដ្ឋបញ្ជាក់ថា តាំងពីមុនមក និងទើបតែបើកឡើងវិញថ្មីៗនេះ សង្វៀនបញ្ជល់មាន់មានបារមីខ្លាំង នៅស្វាយអាង៉ោង នេះ បានពង្វក់ពលរដ្ឋខ្មែរ ឲ្យធ្លាក់ក្នុងរណ្តៅអបាយមុខ ដោយម្នាក់ៗចាញ់ប្រាក់មិនតិចលានរៀលនោះទេ ។ ម្យ៉ាងទៀត វាក៏ជាដើមហេតុ បំបែកបំបាក់ជីវិតប្តីប្រពន្ធ អំពើហិង្សាក្នុងគ្រួសារ បទល្មើសចោរកម្ម និងបទល្មើសផ្សេងៗជាច្រើនទៀតផងដែរ។
