ខេត្តកណ្តាល ៖ គំនរសំរាមជាច្រើនជាពិសេសនៅខាងមុខកាស៊ីណូព្រីនជាប់ផ្លូវ ២១ ក្នុងតំបន់ជ្រៃធំ អតីតស្ថិតក្នុងភូមិជ្រៃធំ ឃុំសំពៅពូន ស្រុកកោះធំ បច្ចុប្បន្នហៅសង្កាត់សំពៅពូន ក្រុងសំពៅពូន ខេត្តកណ្តាល បាននិងកំពុងបង្កផលប៉ះពាល់បរិស្ថានលើជនបរទេស អ្នកដំណើរ និងប្រជាពលរដ្ឋ ដោយសារតែភាពយឺតយ៉ាវចំពោះក្រុមហ៊ុនប្រមូលសំរាមរបស់លោក លឹម សុផា ។
ប្រជាពលរដ្ឋនិយាយថា ភ្នំសំរាមនៅមុខកាស៊ីណូព្រីនេះ ត្រូវបានគេយកមកដាក់គរចោលជាច្រើនថ្ងៃមកហើយ មិនឃើញខាងក្រុមហ៊ុនប្រមូលសំរាមមកដឹកយកទៅចាក់ចោលនោះទេ ។ បញ្ហានេះបានធ្វើឲ្យកាកសំណល់នៅក្នុងថុងផ្លាស្ទិកដែលគេចងវេចខ្ចប់រលួលស្អុយជះក្លិនមកក្រៅ ។ ចំណែកកាកសំណល់រឹងផ្សេងទៀត ពួកគាត់សង្ស័យថា ជាសារធាតុគីមីមានជាតិពុលអាចបង្កគ្រោះថ្នាក់ដល់ពួកគាត់នៅដែលមានគេដុតកាកសំណល់នោះ ។
ប្រជាពលរដ្ឋនិយាយទៀតថា ភាពយឺតយ៉ាវក្នុងការប្រមូលសំរាមរបស់ក្រុមហ៊ុននេះ គឺចាប់តាំងពីទទួលបានសិទ្ធិធ្វើអាជីវកម្ម ០០ជាង ២ ឆ្នាំមកនេះ ជាញឹកញាប់តែងធ្វើឲ្យសំរាមកកស្ទះគរទុកចោលគ្រប់ទីកន្លែងតាមផ្ទះសម្បែងរបស់ប្រជាពលរដ្ឋ តាមបណ្តារោងចក្រសហគ្រាស ទីផ្សារ ជាក់ស្តែងដូចនៅមុខកាស៊ីណូព្រីនជាដើម ។
ប្រជាពលរដ្ឋស្នើដល់អាជ្ញាធរ ជាពិសេសមន្ត្រីជំនាញមេត្តាពិនិត្យរឹតបន្តឹងធ្វើយ៉ាងណាឲ្យក្រុមហ៊ុននេះ ប្រមូលសំរាមឲ្យបានលឿនទាន់សភាពការណ៍ និងធ្វើយ៉ាងណាឲ្យក្រុមហ៊ុនប្រើប្រាស់រថយន្តប្រភេទដឹកសំរាម កុំប្រើប្រាស់គោយន្តកែច្នៃ និងរថយន្តដែលមិនមានទ្រង់បិទជិតជាមធ្យោបាយដឹកជញ្ជូនសំរាមបណ្តាលឲ្យសំរាមជ្រុះធ្លាក់រប៉ាត់រប៉ាយនៅតាមដងផ្លូវ និងស្នើជួយពិនិត្យគំនរសំរាមតាមបណ្តារោងចក្រ និងកាស៊ីណូដែលពួកគាត់សង្ស័យថា មានកាកសំណល់គីមីអាចបង្កគ្រោះថ្នាក់ដល់ពួកគាត់ ស្របពេលដែលក្រុមហ៊ុនប្រើប្រាស់រថយន្តដឹកជញ្ជូនមិនត្រូវតាមច្បាប់បានកំណត់ ។