រឿងក្តី៥ឆ្នាំ ក្របដីខ្ញុំទុក សូម្បីតែអាស្រ័យផលក៏មានបញ្ហា តើពេលណាអ្នកក្រដូចខ្ញុំទទួលបានយុត្តិធម៌ ( 18 .9.2024 )
សូមគោរពសម្តេចអ៊ំ ជាទីគោរព
សូមសម្តេចអ៊ំ ជួយកូនផង ។
ខ្ញុំបាទឈ្មោះឡាច សុខ កើតឆ្នាំ១៩៧០ បានកើតរឿងក្តីក្តាំងនៅសាលាឧទ្ធរលេខ ៦៦ ( ដ ) ចុះថ្ងៃទី ៣០.០៣.២០២២ ជាមួយបងប្អូនបង្កើត បន្ទាប់ពីឳពុក ម្តាយ បានចែកឋានទៅ ដោយមិនទាន់ទទួលបានយុត្តិធម៌។
រឿងរ៉ាវសង្ខេបថា ៖ កាលពីឆ្នាំ១៩៨១-១៩៨២ រដ្ឋបានចែកដីសេដ្ឋកិច្ចគ្រួសារមានដី ចំការ ដីស្រែប្រាំង និងដីលំនៅដ្ឋានស្ថិតនៅផ្លូវជាតិលេខ២១ ភូមិស្វាយជួរ ឃុំកោះខែល ស្រុកស្អាង ខេត្តកណ្តាល មកអោយឳពុកម្តាយខ្ញុំ រួមទាំងបងប្អូនបង្កើត៣នាក់ទៀត សរុបសមាជិក៥នាក់ ។
ដោយឡែកបងស្រីបង្អើតខ្ញុំ ឈ្មោះ ឡាចតិចលី រួមនឹងប្តីគាត់ កូនគាត់ រដ្ឋបានចែកដីអោយដូចគ្នា ។ លុះក្រោយមកបងស្រី ឈ្មោះឡាច តិចលី បានលក់ដីផ្ទះ និងបានទៅរកស៊ី នៅប៉ោយប៉ែត្រ ហើយបានមកលេងស្រុកកំណើតម្តងម្កាលក៏បានមកស្នាក់នៅជាមួយឳពុកម្តាយ ដែលជាផ្ទះខ្ញុំបាទរស់នៅតាំងពីតូច ។ លុះឳពុកម្តាយខ្ញុំបាទ បានធ្វើមរណៈកាលទៅនៅឆ្នាំ២០១២ ក្នុងរយៈពេល១ខែ ដើមខែ ចុងខែ គាត់បានចែកឋានទាំងពីរ ។ នៅឆ្នាំ២០១៩ ក៏មានការចុះបញ្ជីរដីធ្លី ជាប្រព័ន្ធ បងស្រីឈ្មោះ ឡាច តិចលី បានជំទាស់មិនអោយខ្ញុំបាទតំណាងចុះបញ្ជីបងប្អូន៣នាក់នោះទេ គឺឈ្មោះ ឡាចតិចលី ស្នើអោយមានចំណែកគាត់នៅក្នុងនោះដែរ ។ ករណីនេះខ្ញុំនឹងបងប្អូនឯទៀតបានជំទាស់ ។ ការជំទាស់នេះហើយ បងស្រី ឡាច តិចលី និងបក្សពួក នៅថ្ងៃទី២៣ មេសា ឆ្នាំ២០១៩ បាននាំគ្នារើឥវ៉ាន់ខ្ញុំបាទបោះចោលក្រៅផ្ទះ និងបានសង់របងចាក់សោរមិនអោយខ្ញុំបាទចូលផ្ទះនោះទេ រហូតដល់ថ្ងៃទី១៥ ខែឧសភា ឆ្នាំ២០២៤ ទោះមានដីកាសម្រេចពីសាលាឧទ្ធរណ៍ លេខ០៤ ក្រII ល,ដកស ចុះថ្ងៃទី២៥-០២-២០២០ ក៏ពួកគេមិនអោយខ្ញុំបាទចូលទៅរស់នៅក្នុងផ្ទះវិញដែរ ដោយពួកគេ ជាក្រុមគ្រួសារឡាចតិចលី ជាអ្នកកាន់កាប់ ។
ចំនុចទី២ ៖ ខ្ញុំបាទបានប្តឹងជំទាស់ទៅសាលាឧទ្ធរណ៍ ដែលសាលាដំបូងខេត្តកណ្តាលបានកាត់ក្តីបែងចែកមរតក ជាមួយ៦ចំណែក ក្នុងនោះមានដីជាដីឯកជនរបស់ខ្ញុំបាទដែរ ។ការកាត់ក្តីជា៦ ចំនែកពិតជាអយុត្តិធម៌ណាស់សម្រាប់បងប្អូនបង្កើត៣នាក់ ដែលតុលាការដំបូងខេត្តកណ្តាល យកទៅបែងចែកជា៦ ក្នុងនោះមានអ៊ំប្រុសម្នាក់ ឈ្មោះ អ៊ុំ សារិទ្ធ សមាជិកឧត្តមក្រុមប្រឹក្សានៃអង្គចៅក្រម ក៏បានជួយសសេរដោយផ្ទាល់ដៃ ដើម្បីជំទាស់រឿងនេះ (គាត់ទទួលមរណៈភាព )។
សំណុំរឿងមកដល់សាលាឧទ្ធរណ៍ភ្នំពេញ លេខ ៦៦ ( ដ ) ចុះថ្ងៃទី ៣០.០៣.២០២២ របស់ខ្ញុំបានដំណើរការជាង២ឆ្នាំមកហើយ នៅតែមិនទាន់ថាសម្រេចយ៉ាងណាពីតុលាការ ហើយចំពោះរឿងនេះមានប្រជាជននៅក្នុងភូមិរាប់រយនាក់ បានផ្តិតមេដៃគាំទ្រដល់ខ្ញុំបាទ រូមទាំងមេឃុំចាស់ មេភូមិ គឺនៅរង់ចាំយុត្តិធម៌ខ្លាំងណាស់ ព្រោះថាបងស្រីខ្ញុំបានបោះពាក្យថា ធ្វើទាល់តែឈ្នះទោះអស់លុយប៉ុន្មានក៏មិនស្តាយដែរ ។
នៅថ្ងៃទី២៩ ខែមេសា ឆ្នាំ២០២៤ ខ្ញុំបាទនិងបងប្រុសបង្កើតម្នាក់ទៀតនៅប៉ោយប៉ែត្រ បាននាំគ្នាទៅសាលាឧទ្ធរណ៍ភ្នំពេញ ដើម្បីមកជួបក្រឡាបញ្ជី និង លោក គី ឬទ្ធី ប្រធានក្រុមប្រឹក្សាជំនុំជម្រះ ដោយខ្ញុំបាទរង់ចាំពួកគាត់ រហូតដល់ម៉ោង១១ តែពួកគាត់ថា ភាគីម្ចាងទៀតមិនមកនោះទេគឺត្រូវលើកថ្ងៃ ។ ហើយក្រឡាបញ្ជី ឈ្មោះ លីវ ដារ៉ា ថាបងឯងមិនមានមេធាវីចឹង ខ្ញុំបាទឆ្លើយថា ខ្ញុំបាទរាល់ថ្ងៃស៊ីឈ្នួលធ្វើស្មៅ និងបេះម្ទេស បេះពុទ្រា អោយគេ គឺមិនមានលទ្ធភាពជួលមេធាវីនោះទេ ។
ខ្ញុំបាទសូមជម្រាបលោកអ៊ំថា ៖ សូម្បីបងប្អូនខ្ញុំ ចង់ធ្វើស្លាកឈ្មោះ ឳពុកម្តាយនៅផ្នូរ ក៏បងស្រីឡាច តិចលី មករារាំងមិនអោយធ្វើដែរ ។
អាស្រ័យហេតុនេះ សូមសម្តេចអ៊ំ ជួយកូនចៅផង ៕
ទូរសព្ទខ្ញុំបាទ 097 5705391