ខេត្តក្រចេះ ៖ តាមសេចក្តីរាយការណ៍ជាច្រើនខែមកនេះ មេឈ្មួញរត់ពន្ធធ្យូងឈើ ដ៏ធំប្រចាំស្រុកស្នួល ខេត្តក្រចេះឈ្មោះ នាង ចំរើន ដែលមានតួនាទីជាទាហានផងនោះ បានកំពុងកាក់កប ទិញនិងនាំធ្យូងចេញទៅប្រទេសវៀតណាម
យ៉ាងគគ្រឹគគគ្រេង ទាំងយប់ ទាំងថ្ងៃ
តាម ច្រករបៀងប៉ុស្តិ៍អូរតាលាវ ស្ថិត នៅភូមិមានជ័យ ឃុំស្រែចារ ស្រុកស្នួល ខេត្តក្រចេះ ដោយគ្មានការត្រួតពិនិត្យអ្វីទាំងអស់ពីសំណាក់សមត្ថកិច្ចជំនាញពាក់ព័ន្ធឡើយ ។
ប្រភពពីប្រជាពលរដ្ឋបានអោយដឹងទៀតថា៖ សកម្មភាពដឹកជញ្ជូនធ្យូងឆ្លងដែននេះ បានចរាចរណ៍យូរខែមកហើយ ដោយក្រុមមេឈ្មួញទាំងនោះ បានប្រើមធ្យោបាយដឹកជញ្ជូនតាមរថយន្តសាំងយ៉ុងកែឆ្នៃ ក្នុងមួយថ្ងៃៗ មិនក្រោមពី ២០ គ្រឿង នោះទេ។ មហាជនបាននាំគ្នារិះគន់ចំៗទៅលើលោក ខៀវ ប៉ូលីន ប្រធានច្រកការពារព្រំដែន អូរតាលាវ និងមន្រ្តីពាក់ព័ន្ធមួយចំនួនតូចថា៖ អសមត្ថភាពក្នុងបង្ក្រាប បែជានាំគ្នាសម្ងំស្ងាត់ស្ងៀមឈឹង បណ្តែតបណ្តោយអោយអោយពួកមេឈ្មួញទុច្ចរឹត ដឹកជញ្ជូនធ្យូងតាមអំពើចិត្ត ។
ពាក់ព័ន្ធនឹងការរកស៊ី របស់លោកនាង ចំរើន រួមនឹងមានតួនាទីជាទាហានផងនោះ មហាជនបានស្នើដល់រដ្ឋមន្រ្តីក្រសួងការពារជាតិ សម្តេច ទៀ បាញ់ សូមជួយពិនិត្យនឹងស្រាវជ្រាវកុំអោយខូចឈ្មោះដល់ទាហានដ៏ទៃទៀត ក្នុងការយកតួនាទីមករកស៊ីបទល្មើស ។
នៅព្រឹកថ្ងៃទី៣ ខែកក្កដា ព្រះនរាយណ៍ មិនអាចរកការបំភ្លឺពីលោក នាង ចំរើន បានទេ ។
គររម្លឹកដែរថា៖ ក្រសួងកសិកម្ម រុក្ខាប្រមាញ់ និងនេសាទ មិនអនុញ្ញាតឲ្យនាំធ្យូងចេញទៅ ក្រៅប្រទេសទេ ហើយការជួញដូរធ្យូង ឈើនេះ ធ្វើឲ្យប៉ះពាល់ដល់ព្រៃឈើ ក្រុមឧក្រិដ្ឋកម្ម ព្រៃឈើ បានលួចកាប់បំផ្លាញព្រៃឈើ យកទៅដុតធ្វើធ្យូង ដែលច្បាប់ហាមឃាត់៕
