ខេត្តរតនគិរី៖ ជាខេត្តតំបន់ភ្នំព្រំដែនភាគខាងជើងប្រទេសកម្ពុជា ភាគខាងជើងជាប់ព្រំប្រទល់ប្រទេសឡាវ ខាងកើតជាប់ប្រទេសវៀតណាម ខាងត្បូងជាប់ខេត្តមណ្ឌលគិរី និងខាងលិចជាប់ខេត្តស្ទឹងត្រែង។ ខេត្តនេះលាតសន្ធឹងពីតំបន់ជួរភ្នំ ភាគខាងជើងកាត់តំបន់ខ្ពង់រាបរវាងទន្លេសេសាន្តនិងទន្លេស្រែពក។ វាលស្រែចំការជាសម្រស់ធម្មជាតិរបស់ខេត្តនិងមានជនជាតិភាគផ្សេងៗគ្នាជាច្រើន ហើយរតនគិរីពោរពេញទៅដោយសម្បត្តិធម្មជាតិ និងវប្បធម៌ដែលកំពុងរងចាំការស្វែងរក។ ទីក្រុងរបស់ខេត្តនេះគឺបានលុង។
រតនគិរីមានទេសភាពស្អាតបំផុតនៅតំបន់ដែលផ្តល់ជូននិងជាតំបន់នៃជនជាតិដើមភាគតិច តំបន់ភ្នំមួយចំនួន។ ក្នុងចំណោមកន្លែងវិចិត្រករធម្មជាតិ ខេត្តនេះមានដូចជាបឹងបន្ទុះភ្នំភ្លើងហៅបឹងយក្ខឡោម ទឹកជ្រោះដ៏ស្រស់ស្អាតមិនគួរអោយជឿរ និងព្រៃឈើដ៏ក្រាស់ជាមួយពពួកសត្វ និងរុក្ខជាតិក្រៅស្រុកមួយចំនួន ផ្ទុយទៅនឹងភាពស្តុកស្តម្ភសម័យទំនើបខាងលើ ភ្ញៀវទេសចរណ៍ភាគច្រើនទៅខេត្តនេះជ្រើសរើសការស្នាក់នៅទីក្រុងបានលុង ដំណើរកំសាន្តអាចរៀបចំទៅទស្សនាភូមិខ្មែរលើ កន្លែងបែបធម្មជាតិ។
រម្មណីយដ្ឋានបឹងយក្ខឡោមស្ថិតនៅក្នុងភូមិឡូន សង្កាត់យក្ខឡោម ក្រុងបានលុង មានចំងាយពីក្រុងបានលុងប្រមាណ៥០០០ម៉ែត្រ ដល់រម្មណីយដ្ឋាននេះតែម្តង។
រម្មណីយដ្ឋានមួយនេះមានទំហំផ្ទៃដីសរុប២២៥,៤៤ហិកតា ហើយផ្ទៃបឹងយក្ខឡោមមានចំនួន៤៤,១២ហិកតា។ រម្មណីយដ្ឋានបឹងយក្ខឡោមស្ថិតនៅក្រោមការគ្រប់គ្រងរបស់សហគមន៍៥ភូមិ រួមមានភូមិឡូន ភូមិភ្នំ ភូមិឡាប៉ូ ភូមិសិល្ប៍ និងភូមិជ្រី តាមកិច្ចសន្យាកុងត្រារបស់សាលាខេត្តរតនគិរីចុះថ្ងៃទី០៦ ខែកញ្ញា ឆ្នាំ១៩៩៨ ដែលមានកំណត់ចំនួន២៥ឆ្នាំ រហូតមកដល់ទល់ពេលបច្ចុប្បន្ននេះបាន១៨ឆ្នាំមកហើយ។
លោក វេន ចឹ ប្រធានគណៈកម្មាធិការគ្រប់គ្រងទូទៅនៅក្នុងតំបន់អភិរក្សយក្ខឡោមបានអោយPNTVទូរទស្សន៍ព្រះនរាយណ៍ដឹងនៅថ្ងៃទី២០ ខែធ្នូ ឆ្នាំ២០១៦នេះថា ហេដ្ឋារចនាសម្ព័ន្ធគិតជាមធ្យមចំណូលប្រចាំខែមានពី១០០០ដុល្លាទៅ១៥០០ដុល្លា ក្នុង១ខែ (ដោយគិតចំណូល-ចំណត រថយន្ត ម៉ូតូនិងការលក់ដូរគ្រប់តូបដែលដាក់តាំងលក់ក្នុងបឹងយក្ខឡោម និងភ្ញៀវជាតិ អន្តរជាតិចូលទស្សនាកំសាន្ត។
លោកបន្តថា ការចំណាយប្រាក់ជាប្រចាំខែដល់អាជ្ញាប័ណ្ណថ្នាក់ខេត្តតាមរយៈមន្ទីរទេសចរណ៍ខេត្តចំនួន៥លានរៀលក្នុង១ខែ។ បង់ក្រុមហ៊ុនស៊ីនទ្រីផ្នែកអនាម័យ១៣៥០ដុល្លាក្នុង១ខែ បង់សេវ៉ាសហគមន៍ទាំងប្រាំភូមិ និងលោកចៅសង្កាត់យក្ខឡោមចំនួន១៥០០ដុល្លាក្នុង១ខែ។ ប្រាក់បៀវត្សន៍បុគ្គលិកបំរើការងាររម្មណីយដ្ឋាន និងការជួសជុលចំណតផែមិនអាចកំណត់នៃអាត្រាប្រាក់ដែលចំណាយនោះឡើយ។
ថវិកាដែលនៅសល់បានយកទៅតំកល់ទុកនៅធនាគារសម្រាប់ទ្រទ្រង់ និងដោះស្រាយជីវភាពប្រជាពលរដ្ឋទាំងប្រាំភូមិដែលជួបការលំបាកខ្លាំងជាចាំបាច់ អោយខ្ចីប្រើប្រាស់ចាប់ពី១០០ដល់៥០០ដុល្លាក្នុង១គ្រូសារ គិតការប្រាក់ទាប១០០ដុល្លា ការប្រាក់១០០០០រៀលក្នុង១ខែ។ ចាប់ពី៥០០ដុល្លាឡើងទៅប្រធានក្រុមប្រឹក្សាចៅសង្កាត់ជាអ្នកសម្រេច។
លោកស្រីហា វិនតូញ អាយុ៤៨ឆ្នាំ ជាអាជីវករលក់ដូរនៅរម្មយណីដ្ឋានលោកស្រីបានអោយដឹងថា លោកស្រីលក់ដូរសិប្បកម្មតំប្បាញ…ដែលជាស្នាដៃរបស់បងប្អូនជនជាតិដើមភាគតិចពិតៗដែលមានក្រម៉ា ខោ អាវ សំពត់ កផាជាដើម។ល។ ហើយលោកលក់ដូរដោយពុំមានបង់ ផាស៊ី ឬប៉ាតង់ជូន គណៈកម្មាធិការបឹងយក្ខឡោមនោះឡើយ។ ដោយសារសមទ្ធិផល មកលក់នេះគឺជាស្នាដៃរបស់សមាគមន៍ក្នុងភូមិយើងទាំងប្រាំភូមិ។
ទាក់ទិននឹងរម្មណីយដ្ឋានខាងលើលោកទិន លួង ចៅសង្កាត់យក្ខឡោមបានអោយដឹងថាក្នុងផ្ទៃដីសរុប២២,៥៤៤ហិកតារម្មណីយដ្ឋានបបឹងយក្ខឡោមមានដី៤ហិកតាដែលជាដីទំនាស់ស្ថិតនៅក្នុងភូមិជ្រី។ លោកចៅសង្កាត់ក៏បានផ្តល់ដំណឹងទៅសាលាដំបូងខេត្តរួចហើយដែរ មិនដឹងថាគេមានដំណោះស្រាយយ៉ាងណានោះឡើយរហូតមកទល់ពេលនេះ ៕
ខ្ញុំបាទលីវណ្ណះ PN/TVរាយការណ៍ ពីខេត្តរតនគិរី
