ក្រចេះ ៖ ឈ្មួញច្រើននាក់បានសម្រុកដឹកជញ្ជូនឈើពីខេត្តស្ទឹងត្រែង ឆ្លងកាត់ខេត្តក្រចេះ ចូលខេត្តត្បូងឃ្មុំ យ៉ាងគគ្រឹកគគ្រេងដោយមិនមានការទប់ស្កាត់ នោះទេ ។
ប្រភពបានឲ្យដឹងថា កាលពីវេលាទៀបភ្លឺយប់ថ្ងៃទី០៣ ឆ្លងចូលថ្ងៃទី០៤ ខែកញ្ញា ឆ្នាំ២០១៨ មានឈ្មួញច្រើននាក់ដឹកជញ្ជូនឈើតាមក្បួនរថយន្តសាំយ៉ុងនិងរថយន្តច្រើនប្រភេទទៀតទាំងខ្សែៗពីខេត្តស្ទឹងត្រែង ឆ្លងកាត់ខេត្តក្រចេះ ចូលខេត្តត្បូងឃ្មុំ យ៉ាងរាលដាល។
មន្ត្រីរដ្ឋបាលព្រៃឈើក្នុងខេត្តស្ទឹងត្រែង និងខេត្តក្រចេះ ក៏ដូចជានៅខេត្តត្បូងឃ្មុំ ហាក់មិនចាត់វិធានការបង្ក្រាបក្រុមឈ្មួញដឹកជញ្ជូនឈើខុសច្បាប់នោះទេ ?
ឈ្មួញដែលកំពុងធ្វើសកម្មភាពដឹកជញ្ជូនឈើពីខេត្តស្ទឹងត្រែង ឆ្លងកាត់ខេត្តក្រចេះ ចូលខេត្តត្បូងឃ្មុំ ហើយចេញទៅស្រុកយួនតាមច្រកព្រំដែនក្នុងស្រុកមេមត់ មានដូចជាឈ្មួញឈ្មោះ ចែមុំ ឈ្មួញឈ្មោះ តានី ឈ្មួញឈ្មោះ ពៅ និងឈ្មួញឈ្មោះ ហាក់។ ឈ្មួញទាំង៤នាក់នេះមានខ្នងបង្អែកយ៉ាងរឹងមាំទើបអាចធ្វើសកម្មភាពដឹកជញ្ជូនឈើពីខេត្តស្ទឹងត្រែង ឆ្លងកាត់ខេត្តក្រចេះ ចូលខេត្តត្បូងឃ្មុំ ដោយគ្មានការរំខានពីសំណាក់មន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធណាឡើយ។
សមត្ថកិច្ចតូចតាចក្នុងខេត្តស្ទឹងត្រែង ខេត្តក្រចេះ និងខេត្តត្បូងឃ្មុំ បានឲ្យដឹងថា មេរដ្ឋបាលព្រៃឈើក្នុងខេត្តទាំង៣នេះគិតតែពីរឿងផលប្រយោជន៍ផ្ទាល់ខ្លួន ហើយឃុបឃិតបើកដៃឲ្យឈ្មួញដឹកជញ្ជូនឈើខុសច្បាប់យ៉ាងពេញបន្ទុកដើម្បីជាថ្នូរនឹងផលប្រយោជន៍ អ្វីមួយ ?
ប្រភពបានឲ្យដឹងទៀតថា ឈ្មួញមួយចំនួនបានដឹកជញ្ជូនឈើប្រភេទលេខ២ ឈើក្រហម ឬឈើគ្រឿងផ្ទះពីខេត្តស្ទឹងត្រែង និងខេត្តក្រចេះ មក
លក់ចែកចាយតាមដេប៉ូច្រើនកន្លែងក្នុងខេត្តត្បូងឃ្មុំ ខេត្តព្រៃវែង និងខេត្តស្វាយរៀង ដោយគ្មានសមត្ថកិច្ចណាទប់ស្កាត់ឡើយ។ បើតាមការអះអាងពីសមត្ថកិច្ចពាក់ព័ន្ធបានឲ្យដឹងទៀតថា លោក មាស សុផុន មេរដ្ឋបាលព្រៃឈើខេត្តស្ទឹងត្រែង លោក ទ្រី សុភ័ក្ត្រ មេរដ្ឋបាលព្រៃឈើខេត្តក្រចេះ និងលោក គឹម ឈុនលី មេរដ្ឋបាលព្រៃឈើខេត្តត្បូងឃ្មុំ កំពុងសប្បាយចិត្តខ្លាំងណាស់ ព្រោះអាចជិះសេះលេងដៃបាន ?
