ខេត្តកណ្តាល : ដោយសារមានថ្នាំងថ្នាក់ពីប្រជាពលរដ្ឋ ពិសេសអ្នកធ្វើដំណើរ កាត់តាមផ្លូវលេខ២១បេ ពិសេសអ្នករស់នៅក្បែរៗ ឡានដឹកខ្សាច់ចេញចូល បានធ្វើសេចក្តីរាយការណ៍ មក ព្រះនរាយណ៍ ថា ពួកគាត់សំណូមសូមអោយក្រុមឡានដឹកខ្សាច់ ទាំងឡាយមេត្តាគោរពសិទ្ធិ ការរស់នៅពួកគាត់ និង ការធ្វើដំណើរ ព្រោះថា មុខផ្ទះពួកគាត់ក្លាយជង្ហុកទឹកដក់ និង ហុយ ពេលខ្លះរកមើលផ្លូវ មិនឃើញ ។
ប្រជាជនបន្តថា ទីតាំងនោះ នៅក្បែរស្ពានលេខ៩ ក្នុងស្រុកស្អាង ខេត្តកណ្តាល គឺនៅក្បែរសាលាស្រុកស្អាង ក្បែរមន្ទីរពេទ្យ និង ក្បែរសាលារៀន តែម្តង។
ទាក់ទងបញ្ហានេះ មេការខ្សាច់ នៅស្ពានលេខ៩ បានបញ្ជាក់នៅព្រឹកថ្ងៃទី៣១ ខែឧសភា ឆ្នាំ២០២១ នេះថា លោកបានបង់លុយអោយស្រុក ហើយការសំអាតថ្នល់ ជាការងាររបស់ស្រុក ។ ដោយឡែកចំពោះឡាន ខ.ម ដែលចេញចូលដឹកខ្សាច់កន្លែងលោក លោកថាជារឿងរបស់ មេៗ (បាយទឹកចិញ្ចឹមជីវិត ) ។
លោក ញឹម វណ្ណឌិន អភិបាលស្រុកស្អាង បានប្រាប់ លោក លី វណ្ណៈ អង្គភាពព្រះនរាយណ៍ នៅព្រឹកថ្ងៃទី៣១ ឧសភា នេះថា ខាងស្រុកមានឡាន១គ្រឿងសំរាប់បោសថ្នល់ ។ លោកថា ពេលខ្លះមានឡាន ខ្លះ ដឹកមិនគោរពបទដ្ឋានបច្ចេកទេស ដូចជាមិនគ្រប នឹង មានទឹកហូរលើថ្នល់ជាដើម ។
ទោះថា យ៉ាងនេះក្តី ប្រជាពលរដ្ឋ នៅតែសំណូម សូមមេត្តាសំអាតថ្នល់អោយបានជាប់ជាប្រចាំ ពោលគឹកុំអោយមានខ្សាច់កក ក្រាំងពេញថ្នល់ ទើបបានមកសំអាត ។ការទុកអោយកកក្រាំង យ៉ាងនេះគឺ អាចបណ្តាលអោយគ្រោះ ជាយថាហេតុដល់អ្នកធ្វើដំណើរ នឹងប៉ះពាល់សុខភាព ៕
