ខេត្តកណ្ដាល ៖ ទីតាំងសង្វៀនជល់មាន់មួយកន្លែងដែលគេស្គាល់ច្បាស់ថាមានម្ចាស់ឈ្មោះ វៃ ស្ថិតនៅភូមិសិត្បូ សង្កាត់សិត្បូ ក្រុងតាខ្មៅ កំពុងបើកលេងយ៉ាងអាណាធិបតេយ្យតែមិនទាន់មានសមត្ថកិច្ចបង្ក្រាបសោះឡើយ។
យោងតាមសេចក្តីរាយការណ៍ពីពលរដ្ឋដែលរស់នៅទីតាំងខាងលើបានបង្ហើបអោយដឹងថា សង្វៀនជល់មាន់មួយកន្លែងនេះគឺតែងតែបើកលេងជារៀងរាល់អាទិត្យតែគេមិនដែលឃើញមានសមត្ថកិច្ចណាម្នាក់ចុះមកបង្ក្រាបសោះឡើយនេះជាហេតុដែលធ្វើអោយពួកគាត់មានការព្រួយបារម្ភចំពោះការរស់នៅរបស់ពួកគាត់ក្នុងមូលដ្ឋាន។
ប្រភពដដែលបានបន្តថា មូលហេតុដែលពួកគាត់រាយការណ៍ជូនដល់អ្នកសារព័ត៌មានគឺចង់ឱ្យអាជ្ញាធរក្នុងមូលដ្ឋានបានជ្រាបអំពីរឿងនេះនិងចាត់វិធានការបង្ក្រាបដល់ក្រុមញៀនល្បែងទាំងនេះព្រោះថាបើទីតាំងណាមានល្បែងស៊ីសងហើយទីតាំងនោះមិនយូរទេនឹងអាចកើតមានអំពើចោរកម្មផ្សេងៗជាក់ជាមិនខានជាពិសេសអំពើហិង្សាក្នុងគ្រួសារតែម្ដង។
ដូច្នេះសូមសំណូមពរដល់មន្ត្រីមានសមត្ថកិច្ចក្នុងមូលដ្ឋានជាពិសេសលោកអធិការក្រុងតាខ្មៅ សូមមានវិធានការទប់ស្កាត់នឹងបង្ក្រាបដល់ក្រុមញៀនល្បែងទាំងនេះផងដើម្បីចូលរួមរក្សាការពារដល់សុខទុក្ខប្រជាពលរដ្ឋក្នុងមូលដ្ឋានយើងទាំងអស់គ្នា៕