ខេត្តកោះកុង : តំបន់ការពារធម្មជាតិជ្រោយស្វាយ មានផ្ទៃដីជាង ៥០០ហិកតា (៥២២) ដែលជាកន្លែងនេសាទត្រីយ៉ាងសំខាន់របស់អ្នកស្រុករាប់ពាន់គ្រួសារ នៅខេត្តកោះកុង ត្រូវបានជនល្មើសលបកាប់ អស់១០០ហិកតា រយៈពេល៥ខែ ចុងក្រោយនេះ ។
ការកាប់ទន្ទ្រានដីព្រៃលិចទឹក ដើម្បីយកធ្វើជាកម្មសិទ្ធិ នេះនឹងបង្កគ្រោះថ្នាក់ខ្លាំងដល់ជម្រក ត្រីពងកូន ក្តាម បង្កង ជម្រកសត្វស្លាប និងជីវចម្រុះសមុទ្រ ដែលអ្នកស្រុកអាស្រ័យផល រកប្រាក់ចំណូលចិញ្ចឹមជីវិតជាច្រើនឆ្នាំមកហើយ៖ «ប៉ះពាល់ច្រើនជីវចម្រុះ ពលរដ្ឋអាស្រ័យផលនៅកន្លែងហ្នឹងក៏មាន ហើយជីវចម្រុះគ្រប់ប្រភេទដែលវាអាចរស់នៅក្នុងហ្នឹង។
ប្រភពអះអាងថា នៅគ្រាដែលជនល្មើសកាប់ទន្ទ្រានព្រៃកោងកាងឱ្យក្លាយជាវាល អាជ្ញាធរភូមិ និងឃុំបានចុះហត្ថលេខា ធ្វើពាក្យស្នើសុំកាន់កាប់ដីធ្លីជូនពួកគេ ដោយបន្លំកាលបរិច្ឆេទ ក្នុងលិខិតនោះ។
ពួកគាត់ថា អត្តសញ្ញាណជន ដែលលបកាប់ព្រៃលិចទឹក មានគ្នា៤ នាក់ រួមនឹង ភស្តុតាង បាន
បញ្ចួនឈ្មោះពួកគេទៅមន្ត្រីជំនាញ ដើម្បីអនុវត្តច្បាប់ ប៉ុន្តែនៅតែគ្មានចំណាត់ការពីអាជ្ញាធរពាក់ព័ន្ធនោះទេមកទល់ពេលនេះ រីឯជនល្មើសនៅតែបន្តលួចកាប់ព្រៃលិចទឹកដដែល។
ពាក់ព័ន្ធនឹងការកាប់ដីព្រៃលិចទឹកខាងលើ លោក សុខ វុទ្ធី អភិបាលរងខេត្តកោះកុង ធ្លាប់បានប្រាប់អ្នកសារព័ត៌មានថា ចាំលោកឲ្យកម្លាំងរបស់ស្រុកចុះទៅពិនិត្យមើលហើលទ្ធផលយ៉ាងណានោះ ចាំមើលខាងសាលាស្រុកផ្ដល់ព័ត៌មានមកវិញ ។
គួររំលឹកថា : តំបន់ព្រៃលិចទឹក ឬសហគមន៍តំបន់ការពារធម្មជាតិជ្រោយស្វាយ បានចុះបញ្ជីទទួលស្គាល់ដោយក្រសួងបរិស្ថាន កាលពីឆ្នាំ២០១១ មានផ្ទៃដីជាង៥០០ហិកតា(៥២២) ឋិតនៅភូមិឈើនាង ភូមិសារ៉ាយ ភូមិភ្នំស្រឡៅ ភូមិកំពង់ស្តាំ ភូមិជ្រោយស្វាយខាងលិច និងភូមិជ្រោយស្វាយខាងកើត ឃុំជ្រោយស្វាយ ស្រុកស្រែអំបិល។
