រាជធានីភ្នំពេញ ៖ ល្បែងស៊ីសង ( ហ្គេមអនឡាញ )គ្រប់ប្រភេទក្នុងផ្ទះមួយកន្លែង ផ្លូវ១៥៤ សង្កាត់ផ្សារកណ្តាល២ ខណ្ឌដូនពេញ កំពុងបើកទទួលអតិថិជនយ៉ាងសប្បាយ មិនឃើញស្រមោលសមត្ថកិច្ចទៅបង្ក្រាសោះ សង្ស័យតែតែត្រូវថ្នាំសណ្តំអស់ហើយមើលទៅ ។
.ប្រជាពលរដ្ឋ បានបង្ហើបឲ្យដឹងថា÷ ទីតាំងល្បែងស៊ីសង ( ហ្គេមអនឡាញ )គ្រប់ប្រភេទក្នុងផ្ទះមួយនេះ បានបើកលេងយូរណាស់ មកហើយ និងសុខសាន្តបំផុត ព្រោះមិនមានកម្លាំងសមត្ថកិច្ចណា!ចុះបង្រ្កាប ដោយបណ្តោយឲ្យពង្វក់យុវជន! ជាសសរទ្រូងប្រទេសជាតិ ឲ្យដើរក្នុងផ្លូវមិនល្អ ខ្ជីខ្ជាក្នុងការរៀនសូត្រ បំប៉ងចំណេះដឹង។
ប្រភពបន្តថា÷ ទីតាំងនេះ បើមើលតែបន្តិច គឺសាមញ្ញណាស់ ប្រៀបដូចជាផ្ទះសម្រាប់រស់នៅធម្មតា តែនៅខាងក្នុងវិញ អ្នកដឹង!បានដឹង! ហើយមួយថ្ងៃៗ ឃើញយុវជននាំគ្នាមកពពាក់ពពូនសម្ងំលេងល្បែងស៊ីសងនៅទីនោះ ជាពិសេសក្មេងសមាសភាពក្មេងមិនល្អ ក្រុមបងតូចបងធំ ក្មេងញៀនថ្នាំ និងមុខសញ្ញាចោរកម្មជាដើម។
.ប្រជាពលរដ្ឋ បញ្ជាក់ថា÷ ពួកគេគ្មានយោបល់អ្វីច្រើនជាងនេះទៀត គ្រាន់ចង់សំណូមពរលោកឃួង ស្រេង អភិបាល នៃគណៈអភិបាលសាលារាជធានីភ្នំពេញ និងលោក ស ថេត ស្នងការនគរបាលរាជធានីភ្នំពេញ មេត្តាជួយបង្រ្កាបទីតាំងល្បែងស៊ីសងនេះផង ស្របតាមគោលនយោបាយភូមិ-ឃុំមានសុវត្ថិភាព របស់រាជរដ្ឋាភិបាល ព្រោះវាជាប្រភពនាំឲ្យកើតមានអំពើចោរកម្ម និងបទល្មើសផ្សេងៗក្នុងសង្គម៕
