ខេត្តបន្ទាយមានជ័យ : នៅថ្ងៃទី៨ ខែមិនា ឆ្នាំ២០២២ លោកស្រីរ៉ានី ដែលជាម្តាយជនរងគ្រោះ បានប្រាប់អ្នកសារព័ត៌មានថា សមត្ថកិច្ចមិនទាន់ចាប់បានជនល្មើសណាម្នាក់នៅឡើយទេ ។ លោកស្រីបានដាក់ពាក្យបណ្តឹងស្ទើរគ្រប់ស្ថាប័នពាក់ព័ន្ធនៅក្នុងក្រុងប៉ោយប៉ែតកាលពីថ្ងៃទី២ ខែមីនាពោលគឺក្រោយពីជនជាតិចិនមួយក្រុមព្រួតវាយកូនស្រីនិងកូនប្រសាលោកស្រីដែលជាជនជាតិចិនកាលពីថ្ងៃទី២ ខែមីនាកន្លងទៅ ។
លោកស្រីរៀបរាប់ដើមហេតុដែលនាំឲ្យកើតរឿងថាពីដំបូងមានជនជាតិថៃ អ្នកជួលហាងកាត់សក់កូនលោកស្រីកាលពីខែទី២ ខែមីនាបន្ទាប់មកមានជនជាតិចិនមួយក្រុមមានគ្នាជាង១០នាក់ ចេញពីរថយន្តបីគ្រឿងមានស្ត្រីខ្មែរម្នាក់អមមកជាមួយធ្វើជាអ្នកបកប្រែនិងក្រុមសន្តិសុខជាងម្ភៃនាក់នៅក្នុងបំណងវាយជនជាតិថៃទាំងពីរនាក់នោះពេលនោះកូនស្រីលោកស្រីបានប្រាប់ ជនល្មើសទាំងនោះថានាងមិនបានស្គាល់ជនជាតិថៃទាំងនោះទេក៏ប៉ុន្តែពួកគេមិនស្ដាប់ក៏ព្រួតគ្នាវាយគ្នា វ៉ៃលោកស្រីឲ្យរបួសធ្ងន់និងបំផ្លាញទ្រព្យសម្បត្តិសម្ភារៈនៅក្នុងផ្ទះមួយចំនួនទៀតផង ។
លោកស្រីបន្តថាក្រុមជនល្មើសគឺមានកាំភ្លើងខ្លីដំបងឆក់និងបំពង់ដែកបានព្រួតគ្នាវាយធ្វើបាបកូនស្រីលោកស្រីឈ្មោះធីតាទាំងកម្រោលនិងកូនប្រសារ បណ្ដាលឲ្យបានរងរបួសក្បាលយ៉ាងដំណំ ។
ទាក់ទងទៅនឹងបញ្ហានេះស្នងការរងនគរបាលខេត្តបន្ទាយមានជ័យទទួលបន្ទុកជនអន្តោប្រវេសន៍ លោក អេងហ៊ី បានថាមកដល់ពេលនេះសមត្ថកិច្ចនៅមិនទាន់ចាប់បានជនល្មើសណាម្នាក់នៅឡើយទេក៏ប៉ុន្តែលោកអះអាងថាអាជ្ញាធរ សហការគ្នាជាមួយអាជ្ញាធរជំនាញនៅក្នុងមូលដ្ឋានបន្តស្រាវជ្រាវរកជនល្មើសទាំងនោះជាបន្តបន្ទាប់រួមទាំងស្នើឲ្យជួយអន្តរាគមន៍ពីអាជ្ញាធរថ្នាក់ជាតិបន្ថែមទៀត ៕
