(ខេត្តស្វាយរៀង)÷ នាព្រឹកថ្ងៃអាទិត្យ ១៥កើត ខែពិសាខ ឆ្នាំខាល ចត្វាស័ក ព,ស ២៥៦៥ ត្រូវនិងថ្ងៃទី១៥ ខែឧសភា ឆ្នាំ២០២២នេះ ឯកឧត្តម នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ អនុប្រធានការងាររាជរដ្ឋាភិបាលចុះមូលដ្ឋានខេត្តស្វាយរៀង និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកចន្ទ្រា បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់អគារសិក្សាសាលាបឋមសិក្សាត្រពាំងធ្លក ស្ថិតក្នុងឃុំច្រេស ស្រុកចន្ទ្រា ខេត្តស្វាយរៀង ។
ថ្លែងក្នុងឱកាសនោះដែរ ឯកឧត្តម នាយឧត្តមសេនីយ៍ មុឹង សំផន បាននាំនូវសេចក្តីនឹករលឹក និងការផ្តាំផ្ញើរសាកសួរសុខទុក្ខពីសំណាក់សម្តេចតេជោ ហ៊ុន សែន ប្រធានគណ:បក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចទាំងទ្វេរ តែងតែយកចិត្តទុកដាក់ខ្ពស់ក្នុងការគិតគូរពីសុខទុក្ខប្រជាពលរដ្ឋទូទាំងប្រទេស ។
អគារសិក្សាសាលាបឋមសិក្សាត្រពាំងធ្លកដែលសម្ពោធដាក់ឱ្យប្រើប្រាស់នៅថ្ងៃនេះ គឺជាសមិទ្ធផលថ្មីមួយនៅក្នុងស្រុកចន្រ្ទា គឺបង្ហាញពីភាពរឹងមាំ និងជាគណបក្សដែលមានភាពចាស់ទុំខាងនយោបាយ ក្នុងការដឹកនាំប្រទេស ដែលមានសម្តេចតេជោ ហ៊ុន សែន ជាស្ថាបនិកមគ្គុទេ្ទសឯក និងប្រតិបត្តិករ នយោបាយ ឈ្នះ ឈ្នះ ដែលបាននាំមកនូវសន្តិភាព និងការឯកភាពជាតិពេញលេញ ។
ឯកឧត្តមក៍បានអំពាវនាវដល់ប្រជាពលរដ្ឋ ដែលបានចុះឈ្មោះបោះឆ្នោតរួចហើយ សូមអញ្ជើញទៅពិនិត្យផ្ទៀងផ្ទាត់ឈ្មោះនៅតាមការិយាល័យ គ.ជ.ប ដែលបានកំណត់នៅតាមមូលដ្ឋានឲ្យបានគ្រប់ៗគ្នា ព្រោះការបោះឆ្នោតនៅពេលនេះមានសារ:សំខាន់ណាស់សំរាប់អភិវឌ្ឍន៍មូលដ្ឋាន ពិសេសក៏ជាការចូលរួមថែរក្សាសុខសន្តិភាពដែលមាននាពេលបច្ចុប្បន្ន ឱ្យនៅគង់វង្ស យូរអង្វែង ដើម្បីឱ្យប្រទេសជាតិកាន់តែមានការអភិវឌ្ឍន៍រីកចម្រើនថែមទៀត ។
បន្ថែមលើនេះឯកឧត្តម នាយឧត្តមសេនីយ៍បានសុំឲ្យលោកគ្រូ អ្នកគ្រូ និងសមាជិកបក្សប្រជាជនកម្ពុជាយើង ត្រូវចូលរួមថែក្សាសមិទ្ធិផលទាំងឡាយដែលកើតចេញពីការខិតខំរបស់យើងទាំងអស់គ្នាឲ្យបានគង់វង់ ត្រូវប្រឆាំងដាច់ខាតជនទាំងឡាយណាដែល មានគំនិតចង់បំផ្លាញសុខសន្តិភាពនៅក្នុងប្រទេស និងត្រូវបន្តចូលរួមគាំទ្រការអនុវត្តន៍កម្មវិធីចតុកោណ ដំណាក់កាលទី៦ របស់រាជរដ្ឋាភិបាល ។
ក្នុងពិធីនេះ ឯកឧត្តមប្រធានបានប្រគេនបច្ច័យសម្រាប់កសាងឧបដ្ឋានសាលាវត្តត្រពាំងធ្លក ចំនួន ៤,០០០,០០០រៀល ជួយកសាងសាលា បឋមសិក្សា ១០,០០,០០០០រៀល ឧបត្ថម្ភសាលាស្រុក ២,០០០,០០០ រៀល អ្នកចូលរួមទាំងអស់ ម្នាក់ៗទទួលបានសារុង០១ ក្រមា០១ កងកម្លាំងការពារសន្តិសុខ ចំនួន ៥០នាក់ ក្នុងម្នាក់ៗទទួលបាន ២០,០០០រៀល សិស្សានុសិស្ស ១៥៦នាក់ក្នុងមួយនាក់ សៀវភៅ ២ក្បាល ប៊ិក ០១ដើមខ្មៅដៃ ០១ដើម ថវិកា ២,០០០រៀល សរុបការចំណាយគិតជាថវិកា ៣០,០០០,០០០ រៀល ។ ដោយ= សុខហ៊រ
