ខេត្តព្រះសីហនុ៖ ពិធីចម្រើនព្រះបរិត្តជាពុទ្ធជ័យមង្គល ថ្វាយព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងគម្រប់ព្រះជន្ម ៦៥ យាងចូល ៦៦ ព្រះវស្សា ថ្ងៃសុក្រ ១២រោច ខែពិសាខ ឆ្នាំច សំរីទ្ធិស័ក ព.ស២៥៦២ ត្រូវនិងថ្ងៃទី១១ ខែឧសភា ឆ្នាំ២០១៨។
ក្នុងឱកាសនោះឯកឧត្ដម យន្ត មីន អភិបាល នៃគណៈអភិបាលខេត្តព្រះសីហនុ បានថ្លែងសារលិខិតថ្វាយ ព្រះពរសូមក្រាបថ្វាយបង្គំទូលថ្វាយ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា សូមក្រាបថ្វាយបង្គំព្រះករុណាជីវិតតម្កល់លើត្បូង នាឱកាសដ៏មហានក្ខត្តឫក្សបវរថ្លៃថ្លា នៃព្រះរាជពិធីចំរើនព្រះជន្ម គម្រប់ព្រះជន្ម ៦៥ យាងចូល ៦៦ ព្រះវស្សា ព្រះករុណាជាម្ចាស់ជីវិតតម្កល់លើត្បូង ជាទីគោរសក្ការ:ដ៏ខ្ពង់ខ្ពស់បំផុត និងប្រព្រឹត្តនៅថ្ងៃទី១៣-១៤និង១៥ ខែឧសភា ឆ្នាំ២០១៨នេះ ទូលព្រះបង្គំយើងខ្ញុំទាំងអស់គ្នា ជាថ្នាក់ដឹកនាំក្រុមប្រឹក្សាខេត្ត គណៈអភិបាលខេត្ត មន្ត្រីរាជការគ្រប់លំដាប់ថ្នាក់ និយោជិក បុគ្គលិក កម្មករ ព្រមទាំងកងកម្លាំងប្រដាប់អាវុធ ព្រះសង្ឃ លោកគ្រូ អ្នកគ្រូ សិស្ស និស្សិត ប្រជាពលរដ្ឋគ្រប់ជនជាតិ នៃខេត្តព្រះសីហនុ និងក្នុងនាមទូលព្រះបង្គំជាខ្ញុំ និងក្រុមគ្រួសារ សូមព្រះបរមរាជានុញ្ញាត សម្ដែងថ្វាយនូវព្រះសព្ទសាធុការ បវរសួស្ដី សិរីមង្គលមហាប្រសើរ ថ្វាយព្រះករុណាព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា សូមព្រះអង្គមានបញ្ញាញានឈ្លាសវៃ ព្រះកាយពលមាំមួន ព្រះរាជសុខភាពល្អបរិបូរណ៍ និងព្រះជន្មាយុយឺនយូរ ដើម្បីគង់ប្រថាប់នៅក្នុងព្រះបរមរាជសម្បត្តិ ជាម្លប់ត្រជាក់ត្រជុំដល់ប្រជារាស្ត្រខ្មែរគ្រប់រូប យូរអង្វែងតរៀងទៅ ។
ឆ្លៀតក្នុងឱកាសដ៏មហានក្ខត្តឫក្សបវរថ្លៃថ្លានេះ ទូលថ្វាយបង្គំយើងខ្ញុំ សូមធ្វើអភិវន្ទន៍កិច្ចថ្លែងព្រះពរបវរ មហាប្រសើរ និងព្រមលើកហត្ថទាំងទ្វេរ ប្រណម្យបួងសួងដល់គុណបុណ្យព្រះរតនត្រ័យកែវទាំងបី មហិទ្ធិឫទ្ធិទេវតា រក្សាព្រះមហាស្វេតច្ឆត្រ ទេវតាឆ្នាំថ្មី និងវត្ថុស័ក្ដិសិទ្ធក្នុងលោក ព្រមទាំងវិញ្ញាណក្ខន្ធអតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ និងដូងវិញ្ញាណក្ខន្ធព្រះបរមរតនៈកោដ្ឋ សូមតាមប្រោះព្រំ ទ្រទ្រង់គាំពារថ្វាយព្រះពរជ័យ សិរីមង្គលវិបុលសុខ គ្រប់ប្រការថ្វាយព្រះករុណាជាម្ចាស់ជីវិតតម្កល់លើត្បូង សូមព្រះអង្គទ្រប្រកបដោយព្រះពុទ្ធពរ ដ៏ឧត្ដុង្គឧត្ដម ថ្លៃថ្លាទាំងបួនប្រការ គឺអាយុវណ្ណៈ សុខៈ ពលៈ ជាភិយ្យោភាពតរៀងទៅ។ រាយការណ៍ដោយ៖(ទុយ ហ៊ួត)ប្រចាំខេត្តព្រះសីហនុ
