ខេត្តព្រះសីហនុ៖ ថ្មីៗនេះមានការលេចធ្លាយព័ត៌មាន ដ៏សំបើមមួយ ទាក់ទងនិង ឯកឧត្ដម យន្ត មីន អភិបាល នៃគណៈអភិបាលខេត្តព្រះសីហនុ ពីការចេញផ្សាយតាមរយៈទូរទស្សន៍ អនឡាញ និង ប្រព័ន្ធផ្សព្វផ្សាយសង្គម facebook លើកឡើងថា ( ដែលល្បីឈ្មោះបោះសម្លេងគឺលោក ញ៉ក់ គឹមតុង ដែលប្រព័ន្ធផ្សព្វផ្សាយទាំងនោះ ផ្សាយថា លោក ញ៉ក់ គីមតុង បានយកឈ្មោះ ថ្នាក់ដឹកនាំខេត្តព្រះសីហនុជាច្រើន ពិសេស ឯកឧត្ដម យន្ត មីន តែម្ដងដែលថា នៅពីក្រោយខ្នងរបស់លោក ញ៉ក់ គីមតុង ក្នុងការរំលោភបំពាន់ដីធ្លី របស់អ្នកមានដូចគ្នា ថែមទាំងមានដីប្រជាពលរដ្ឋខ្លះទៀតផង)។
រហូតដល់មកថ្ងៃទី ១១ ខែឧសភា ឆ្នាំ ២០១៨ ឯកឧត្ដម យន្ត មីន អភិបាលខេត្តព្រះសីហនុបានធ្វើការបដិសេធយ៉ាងដាច់អហង្ការ ចំពោះការចោទប្រកាន់បែបគ្មានប្រភពច្បាស់លាស់នេះ ឯកឧត្ដមបាន ធ្វើបទសម្ភាសន៍ជាមួយអ្នកសារព័ត៌មានក៏ដូចជា ទូរទស្សន៍នៅមុខសាលាខេត្តព្រះសីហនុថា «រឿងនេះ លោកមិនដែលបានដឹងនោះទេ ហើយក៏មិនដែលស្គាល់ លោក ញ៉ក់ គីមតុង ដូចការចោទប្រកាន់តាមប្រព័ន្ធផ្សព្វផ្សាយនោះដែរ លោកបានបន្តថា លោកមិនដឹងថា ឈ្មោះ ញ៉ក់ គីមតុងនេះ មុខយ៉ាងមិចនោះទេ ហើយក៏មិនបានដឹងថា លោក ញ៉ក់ គីមតុងនេះ បាននិយាយមែនឬយ៉ាងណានោះទេ បើនិយាយមែននិងត្រូវដោះស្រាយតាមផ្លូវច្បាប់ តែបើឈ្មោះ ញ៉ក់ គីមតុង មិនបាននិយាយនោះទេ ការបំផុសព័ត៌មានចោទប្រកាន់ទាំងនោះ សង្ស័យធ្វើឡើងដើម្បីជាគោលបំណងអ្វីមួយ ឬជាផលប្រយោជន៍អ្វីមួយលោកមិនដឹងនោះដែរ ហើយអ្នកដែលបានផ្សព្វផ្សាយនេះគួរតែបង្ហាញឯកសារជាសំអាងមក…។ ជាចុងក្រោយ ឯកឧត្ដម យន្ត មីន បានស្នើសុំឲ្យថ្នាក់ដឹកនាំក្នុងខេត្តព្រះសីហនុទាំងមូលជួយតាមដានមើលកុំឲ្យមានអ្នកយកឈ្មោះថ្នាក់ដឹកនាំខេត្តទៅប្រើក្នុងផ្លូវមិនល្អបែបនេះទៀត។
ទាក់ទងនិងរឿងព័ត៌មានខ្លះយកឈ្មោះថ្នាក់ដឹកនាំខេត្តទៅប្រើក្នុងទំនាស់ដីធ្លីនេះ លោក នងឌី ណារ៉ា ជាមន្ត្រីប្រតិកម្មរហ័ស របស់រដ្ឋបាលខេត្តព្រះសីហនុ បានថ្លែងថា (ចំពោះរឿងនេះគឺជារឿងទំនាស់គូបដិបក្ខអ្នកប្រកបមុខរបរទិញលក់ដីដូចគ្នានោះទេ មិនមែនដូចការចោទប្រកាន់របស់បណ្ដាញសង្គមខ្លះនោះឡើយ លោកថែមទាំងបានជួបសួរនាំ លោក ញ៉ក់ គីមតុង ផ្ទាល់ទៀតផង)។
ឆ្លើយតបទៅនិងព័ត៌មានចោទប្រកាន់ទាំងនេះ លោក ញ៉ក់ គីមតុង ដែលមានឈ្មោះល្បីទាក់ទងនិងការប្រកបមុខរបរ (ទិញលក់ដី) ក្នុងខេត្តព្រះសីហនុ លោកបានធ្វើការបំភ្លឺជុំវិញព័ត៌មាននិងបណ្ដាញសង្គម facebook នៅព្រឹកថ្ងៃទី១៣ ខែឧសភា ឆ្នាំ២០១៨ ថា (លោកឃើញព័ត៌មានទាំងនោះបានសរសេរវាយប្រហារលោក ផ្អែកលើគូទំនាស់ ដែលប្រកបមុខរបរដូចគ្នា លោកមិនដឹងថា នរណាជាអ្នកធ្វើរឿងនេះ នោះទេ បើមានទំនាស់ជាមួយរូបលោកសូមដាក់ពាក្យបណ្ដឹងមកចុះ កុំប្រើបណ្ដាញព័ត៌មានឬ facebook វាយប្រហារលោកពីក្រោយខ្នងបែបនេះ។
ហើយព័ត៌មានទាំងនោះបានសរសេរថា រូបលោកផ្ទាល់ មានអភិបាលខេត្ត ឯកឧត្ដម យន្ត មីន និង មេបញ្ជាការកងរាជអាវុធហត្ថ ក៏ដូចជា លោកស្នងការខេត្ត នៅពីក្រោយលោកទៀតផង វាមិនពិតនោះទេ លោកមានអំណាចឯណាដល់ថ្នាក់នេះ លោកគ្រាន់តែអ្នករកសុីទិញលក់ដីបន្តិចបន្តួចប៉ុណ្ណោះ។ លោកក៏បានបន្ថែមថា ដីដែលលោកទិញលក់រាល់ថ្ងៃនេះ គឺជាដីរបស់ប្រជាពលរដ្ឋខ្វះខាតគាត់លក់មកឲ្យលោក ដើម្បីដោះស្រាយជីវភាពរបស់ពួកគាត់នោះទេ ហើយលោកក៏មិនបានទៅរំលោភបំពាន់ដីរបស់ពួកគាត់នោះដែរ។
ជាចុងក្រោយលោក ញ៉ក់ គីមតុង បានសំណូមពរដល់ថ្នាក់ដឹកនាំខេត្តសូមមេត្តា ជួយរកយុត្តិធម៌ដល់រូបលោកផង លោកមិនបានប្រើពាក្យសម្ដីបែបនេះ ចំពោះថ្នាក់ដឹកនាំខេត្តនោះទេ ទាំងនេះគឺជាការចោទប្រកាន់រូបលោក ព្រោះតែរឿងទំនាស់រវាងអ្នកប្រកបមុខរបរទិញលក់ដីដូចគ្នានោះទេ។
បើតាមការលើកឡើងរបស់ប្រជាពលរដ្ឋដែលរស់នៅ ភូមិគគីរ ឃុំអូរត្រេះ សង្កាត់លេខ៤ ខេត្តព្រះសីហនុ បានប្រាប់ព័ត៌មានយើងខ្ញុំថា ពួកគាត់មករស់នៅទីនេះយូរណាស់មកហើយ កន្លងមកគាត់បានសុំឲ្យលោក ញ៉ក់ គីមតុង ទិញដីរបស់គាត់ ដោយមិនមែនជាការរំលោភបំពាន់លើដីរបស់ពួកគាត់នោះទេ។
ជុំវិញនិងរឿងរ៉ាវខាងលើនេះ ប្រជាពលរដ្ឋក្នុងខេត្តព្រះសីហនុក៏ដូចជា មហាជន ដាក់ការសង្ស័យផងដែរថា (ហាក់មានក្រុមទំនាស់ផ្សេងទៀតជាមួយនិងលោក ញ៉ក់ គីមតុង ទើបប្រើមធ្យោបាយខ្ចីដៃសារព័ត៌មានវាយប្រហារលោក ញ៉ក់ គីមតុង ដើម្បីរុញលោក ឲ្យធ្លាក់ក្នុងសំណាញ់ច្បាប់។ ទោះជាយ៉ាងណាក៏ដោយ ថ្នាក់ដឹកនាំខេត្តព្រះសីហនុពេលនេះកំពុងតែដុតដៃដុតជើងរកប្រភពពីការចោទប្រកាន់យកឈ្មោះ ថ្នាក់ដឹកនាំខេត្តទៅប្រើទាំងទទឹងទិសនោះទេរ)៕ រាយការណ៍ដោយ៖(ទុយ ហ៊ួត)ប្រចាំខេត្តព្រះសីហនុ
