ប្រជាកសិករក្នុងស្រុកឯកភ្នំមានក្តីសង្ឃឹមលើទំនប់ស្ទាក់ទឹកថ្មីនៅសាលាតាអនថានិងមានកំណើនសេដ្ឋកិច្ចលើដំណាំស្រូវក្រោយសាងសង់រួចរាល់

បាត់ដំបង:ប្រជាកសិកររស់ក្នុងឃុំព្រែកនរិន្ទស្រុកឯកភ្នំកំពង់នាំគ្នាសាទរចំពោះគម្រោងអភិវឌ្ឍន៍ទំនប់ស្ទាក់ទឹកថ្មីដែលជាលើកដំបូងនៅតាមដងស្ទឹងសង្កែដែលជាសមិទ្ធិផលថ្មីកើតចេញពីកិច្ចខិតខំប្រឹងប្រែងអភិវឌ្ឍន៍របស់រាជរដ្ឋាភិបាលដើម្បីកាត់បន្ថយនូវភាពក្រីក្រក៏ដូចជាភាពអសកម្មផ្នែកកសិកម្មកន្លងមកផងដែរ។ប្រជាពលរដ្ឋរស់ក្នុងឃុំព្រែកនរិន្ធស្រុកឯកភ្នំបានអោយដឹងនៅថ្ងៃទី១៩ខែមិនានេះថាក្រោយពីទំនប់ស្ទាក់ទឹកសាលាតាអននេះបានសាងសង់រួចរាល់ពួកគាត់និងមានក្តីសង្ឃឹមលើផលដំណាំស្រូវរបស់ពួកគាត់អាចធ្វើបានច្រើនរដូវកាលនិងរកចំណូលសេដ្ឋកិច្ចបានល្អប្រសើជាងមុន។ឆ្លើយតបនិងក្តីសង្ឃឹមនិងសាទររបស់ប្រជាកសិករនេះដែរលោកប៉ុញ.សច្ចះអគ្គនាយកបច្ចេកទេសនៃក្រសួងធនធានទឹកនិងឧតុនិយមបានលើកឡើងក្នុងពិធីក្រុងពលីបើកការដ្ឋានស្ថាបនាជាផ្លូវការកាលពីថ្ងៃទី១៤ខែមិថុនាកន្លងទៅថា:គម្រោង​អភិវឌ្ឍន៍​ទំនប់ស្ទាក់ទឹកសាលាតាអនក្នុងស្ទឹងសង្កែនេះគឺជាសមិទ្ធិផលថ្មី១ដែលចំណាយលើទំហ៊ំទឹកប្រាក់​ប្រមាណ​ជា​៣៧.០៨៦.៣៦៣ដុល្លា។លោកបន្តថាប្រព័ន្ធធារាសាស្ត្រទំនប់ស្ទាក់ទឹកសាលាតាអនមួុយនេះគ្រោងនឹងសាងសង់អោយចប់រួចរាល់ក្នុងរយះពេលត្រឹម២៧ខែដែលក្នុងនោះមានទាំងស្ពានទំហំ១៣ម៉ែត្រ,សាងសង់ប្រឡាយពង្វាងទឹកតាមមាត់​ស្ទឹងសង្កែ​ប្រវែង​២៥០ម៉ែត្រ,សាងសង់​សំណង់ទ្វារទឹកមេកាត់​ស្ទឹងសង្កែ​ប្រវែង​៧៤​ម៉ែត្រ,សាងសង់​ប្រឡាយ​បេតុងចំនួន៤ខ្សែ​ប្រវែង​១៣.៧៨​គីឡូម៉ែត្រ,សាងសង់​សំណង់ទ្វារទឹក​ចំនួន​១២កន្លែង,សាងសង់​សំណង់ស្ទាក់ទឹក​ប្រឡាយ​រង​ចំនួន​២កន្លែង,សាងសង់​សំណង់លូ​ចែកចាយ​ទឹក​ប្រឡាយ​មេ​ចំនួន​៨កន្លែង,សាងសង់​ស្ពាន​ឆ្លងកាត់​និងស្ពាន​ថ្មើរជើង​កាត់ប្រឡាយមេ​សរុប​១៨កន្លែងនិងសាងសង់​ជណ្ដើរ​ចុះ​ប្រឡាយ​មេ​សម្រាប់អ្នកភូមិ​ប្រើប្រាស់​ជាច្រើន​កន្លែង​ទៀតផង​ដែរ។​លោកបានបន្តថាក្រោយពី​ស្ថាបនា​សាងសង់​រួចរាល់​ទំនប់ស្ទាក់ទឹកដ៏ធំមួយនៅក្នុង​ស្ទឹងសង្កែ​រួមទាំង​ប្រឡាយទាំងអស់​នៅក្នុងភូមិសាស្ត្រ​ឃុំព្រែកនរិន្ទស្រុក​ឯក​ភ្នំនេះនឹងជួយនាំទឹកទៅស្រោចស្របទាំង​ស្រូវប្រាំងនិងស្រូវវស្សាដែលមាន​ផ្ទៃដី​សរុប​ជាង១០.៤០០ហិកតានឹងអាចអោយ​ប្រជាពលរដ្ឋធ្វើស្រូវបានពីរទៅបីដងក្នុងមួយឆ្នាំផងដែរ។លោកបានបន្ថែមទៀតថាប្រព័ន្ធធារាសាស្ត្រនេះរាល់ការបិទបើកទ្វារទឹកគឺបញ្ជាដោយប្រព័ន្ធកុំព្យូទ័រហើយក៏មានធ្វើជាជណ្ដើរ សម្រាប់បំរើដល់ផ្លូវត្រីងាយស្រួលឡើងទៅពងនៅខាងលើបាន។ក្រៅពីនេះនៅពេលធ្វើហើយរួចរាល់ទំនប់សាលាតាអននេះក៏នឹងអាចទាក់ទាញភ្ញៀវទេសចរណ៍មកកម្សាន្តនៅក្នុងខេត្តបាត់ដំបងកាន់តែច្រើនហើយធ្វើឲ្យប្រជាពលរដ្ឋរស់នៅក្បែរនោះអាចបង្កើនមុខរបរទទួលទានលក់ដូរចំណីអាហារឬវត្ថុអនុស្សាវរីយ៍ដែលជួយអោយជីវភាពរបស់ពួកគាត់កាន់តែល្អប្រសើរឡើង។គួរបញ្ជាក់ផងដែរនៅក្នុងខេត្តបាត់ដំបងកន្លងទៅរាជរដ្ឋាភិបាលកម្ពុជាបានទាក់ទាញ​វិនិយោគ​និងក្នុងការអភិវឌ្ឍន៍សាងសង់ក៏ដូចជាស្ដារប្រព័ន្ធធារាសាស្ត្រធំៗជាច្រើនកន្លែងរួមមានដូចជាទំនប់ពហុបំណងសេកសកស្ថិតក្នុងស្រុករតនមណ្ឌល,ប្រព័ន្ធធារាសាស្ត្រទំនប់កាហត,ទំនប់បឹងកំពីងពួយស្ថិតក្នុងស្រុកបាណន់,ទំនប់បាសាក់ស្ថិតក្នុងស្រុករុក្ខគិរីនិងទំនប់ផ្សេងជាច្រើនទៀតដែល​សមិទ្ធផល​ទាំងអស់​នេះ​អាចមាន​សមត្ថភាព​ស្រោចស្រព​ដីកសិកម្ម​ក្នុង​ខេត្តបាត់ដំបង​បានរាប់​ម៉ឺនហិកតា៕សៅ សារិទ្ធ