រតនគីរី៖ ក្រុមហ៊ុន តាយ សេង មិនទទួលខុសត្រូវ ចំពោះការបំរើសេវាទឹកស្អាតក្នុងក្រុងបានលុង ខេត្តរតនគីរីបើទោះជាទឹកនោះ បូមកមពីប្រភពណាក៏ដោយ។ក្រោយពីក្រុមហ៊ុនទឹកស្អាត តាយ សេង បានបូមទឹកក្នុងបឹងកំសាន្តរីងមកនោះ ក្រុមហ៊ុននេះត្រឡប់មកបូមទឹកក្នុងបឹងកន្សែងវិញ ដោយមិនមានលិខិតអនុញ្ញាតិណាមួយ ចេញពីអាជ្ញាធរនោះទេ។ត្រូវបានប្រជាពលរដ្ឋចំនួន៣៩គ្រួសារ ក្នុងក្រុងបានលុង នាំគ្នាផ្ដិតមេដៃ ទាមទារឲ្យក្រុមហ៊ុនមួយនេះផ្អាក ការបូមទឹកក្នុងបឹងកន្សែង។
យោងតាមការរអ៊ូរទាំ របស់ប្រជាពលរដ្ឋក្នុងក្រុងបានលុងថា ក្រុមហ៊ុនម៉ៅការបំរើសេវាទឹកស្អាតមួយ មិនគួរអត់ប្រភពទឹកស្អាតដោយខ្លួនអញ្ចឹងសោះ។ កាលពីមុនពួកគាត់មិនដឹងថាក្រុមហ៊ុននេះបូមទឹកក្នុងបឹងកំសាន្ត អញ្ចឹងសោះ ទើបតែពេលនេះទឹករីង ពួកគាតឃើញទុយយោក្នុងបឹងកំសាន្ត គាត់ភ្ញាក់ព្រើត ហើយលាន់មាត់ថា មិនគួរប្រើសោះ ពីព្រោះលើផ្ទៃទឹកបឹងកំសាន្ត និងនៅមាត់បឹង មានភូមិគ្រិះ ផ្ទះសំណាក់ ព្រមទាំងមានមីកាដេនលើនោះទៀតផង។ ឥឡូវគេផ្លាស់មកបូមទឹកបឹងកន្សែងទៀត ក៏កាន់តែលើសមុនទៅទៀត។ ម្យ៉ាងទៀតអាចទឹកបឹងប្រឈមនិងការរីង ហើយបឹងតាំងពីដូនតា មក មិនដែលមានប្រវត្តិ។
ប្រជាពលរដ្ធមួយគ្រួសារសុំមិនបញ្ចេញឈ្មោះ រស់នៅក្នុងភូមិភ្នំស្វាយសង្កាត់បឹងកន្សែងក្រុងបានលុងបានអោយភ្នាក់ងារទូរទស្សន៍ព្រះនរាយណ៍ដឹងនៅព្រឹកថ្ងៃទី31/07/2018នេះអំពីសេវ៉ាកម្ម បង់ប្រាក់ តំកល់ប្រាក់ជូនដល់ក្រុមហ៊ុនទឹកស្អាតតាយសេង :
ទី១: គុណភាពទឹកស្អាតក្រុមហ៊ុនតាយសេង មានប្រមាណ50%ប៉ុណ្ណោះ ពេលខ្លះទឹកចេញមកល្អក់ ភក់សុទ្ធ ពេលដែលមុជធ្វើអោយរមាសពេញខ្លួន ចំពោះស្ត្រីភេទអាចបណ្តាលអោយអាឡាក់សុីស្បែក។
ទី២: ទឹកនេះពុំអាចយកមកដាំស្លបានទេ។
ទី៣: វិក័យបត្តិគិតក្នុង១ម៉ែត្រគូបស្មើ(1900រៀល)។
ទី៤: សេវ៉ាសុំតភ្ជាប់តំបូងតម្រូវអោយតំកល់ប្រាក់ចំនួន50,0000រៀលក្នុងក្រុមហ៊ុនតាយសេង។
ទី៥: ការចំណាយក្នុង១ខែ មានចាប់ពី8មុឺនរហូតដល់20មុឺនរៀលតាមការប្រើប្រាស់តិចច្រើន។
ទី៦: ក្នុង១សប្តាហ៍ប្រព័ន្ធទឹកស្អាតក្រុមហ៊ុនមួយនេះមានដាច់ទឹកចំនួនពីរដងទៀងទាត់ជានិច្ច។
ជាចុងក្រោយប្រជាពលរដ្ធធ្វើការសំណូមពរដល់ក្រុមហ៊ុនតាយសេងទឹកស្អាតមេត្តាចុះពិនិត្យនាឡិការស្ទង់ដល់ពួកគាត់ផង ដោយសារវាដើរលឿនខុសប្រក្រតីស្ទើរតែមិនអាចទទួលយកបាន។ពាក់ព័ន្ធនិងបញ្ហានេះ
លោក ចាន់ ប៊ុនធឿន ប្រធានមន្ទីរ ធនធានទឹក និងឧតុនិយម ថា អោយគេបូមបណ្ដោះអាសន្នសិន ដើម្បីដោះទាល់ ឆ្នាំក្រោយមិនអនុញ្ញាតិទៀតទេ ត្រូវអោយក្រុមហ៊ុននេះ ដោះស្រាយប្រភពទឹកដោយខ្លួនឯង។
លោក ងិនណែលអភិបាលក្រុងបានលុងថា ចំពោះលូ ដែលគេឃើញបង្ហូរចូលបឹងកន្សែងនោះ ជាលូបញ្ជៀសទឹកភ្លៀង ក្នុងក្រុង បើចង់ច្បាស់ទាល់តែសួរទៅ ខាងសធារណៈការណ៍ ពីព្រោះប្រព័ន្ធលូក្នុងក្រុង គឺសាធារណៈការណ៍ជាអ្នកសាងសង់។
ដើម្បីបញ្ជាក់ពីលូទឹកបង្ហូរ ចូលបឹងកន្សែងនោះ អ្នកសាព័ត៌មានយើងមិនអាចសុំការបំភ្លឺ ពីលោក ស៊ុន ប៉ូលិន ប្រធានមន្ទីរសាធារណៈការណ៍បានទេ ដោយទូរស័ព្ទចូល ពុំមានអ្នកលើក។
ដោយឡែកលោក សយ សូណា ប្រធានមន្ទីរកសិកម្មខេត្ត ក៏មិនអាចសុំការបំភ្លឺបានដែរ ដោយលោកថា ជាប់រវល់ប្រជុំ មិនដឹងថា ប៉ុន្មានថ្ងៃចប់នោះទេ។
ជុំវិញការបូមទឹកក្នុងបឹងកន្សែងនេះ ឯកឧត្ដន ប៊ូ ឡាំ តំណាងរាស្ត្រមណ្ឌលរតនគិរី បានអោយដឹងថា: ចំពោះឯកឧត្ដម មិនឯកភាពក្នុងការបូមទឹកនេះយកទៅប្រើប្រាស់ទេ ពីព្រោះទឹកនេះ មានជាតិពុល បើតាមការសិក្សាស្រាវជ្រាវរបស់ជនជាតិជប៉ុន កាលពីឆ្នាំ២០០៦។ ហើយក្រុមហ៊ុន តាយ សេង គ្រាន់តែបូមទឹកលក់យកលុយដាក់ហោប៉ៅ មិនគិតពីសុខភាពប្រជាពលរដ្ឋ និងក្រុមហ៊ុននេះ មិនមានលក្ខណៈបច្ចេកទេសគ្រប់គ្រាន់ក្នុងការបំរើសេវាទឹកស្អាតជូន ប្រជាពលរដ្ឋនោះទេ។ ម្យ៉ាងវិញទៀត នៅជុំវិញមាត់បឹងកន្សែងនោះ មានភូមិគ្រឹះ ផ្ទះសំណាក់ បំរើសេវាផ្សេងៗ ជាពិសេសនិង មានមន្ទីរពេទ្យផងដែរ។
ទោះជាយ៉ាងណាក៏ដោយ ក្រុមហ៊ុន តាយ សេង ដែលទទួលសិទ្ធិ ម៉ៅការ បំរើសេវាទឹកក្នុងក្រុងបានលុង ត្រូវតែ ទទួលខុសត្រូវ ចំពោះបញ្ហាកង្វាស់ទឹកហើយទឹកនោះត្រូវមានគុណភាពខ្ពស់ជូនប្រជាពលរដ្ឋ បើទោះជាក្នុងកាលៈទេសៈ ណាក៏ដោយ ពីព្រោះក្រុមហ៊ុន បំរើសេវាទឹកស្អាតក្នុងក្រុងបានលុង ជាច្រើនឆ្នាំមកហើយ ៕ រាយការណ៍ ពីក្រុងបានលុង ខ្ញុំបាទ លី វណ្ណះ ទូរទស្សន៍ព្រះនរាយណ៍
0
ទឹកស្អាតក្រុមហ៊ុនតាយសេងរតនគីរីប្រជាពលរដ្ឋរអូរទាំថាយកទៅហូបមិនកើត ?
Filed in: Uncategorized