ខេត្តបាត់ដំបង៖រឿងដែលមិននឹកស្មានដល់ចំពោះលោកមេប៉ុស្តិ៍នគរបាល១រូបដែលធ្វើអោយពលរដ្ឋអស់ជំនឿរហូតឈានដល់ប្រជាពលរដ្ឋចំនួន២ភូមិសម្រេចចិត្តនាំគ្នាផ្តិតមេដៃប្តឹងចោទប្រកាន់លោកមេប៉ុស្តិ៍រូបនេះទៅសម្តេចក្រឡាហោមស.ខេងនិងសម្តេចតេជោហ៊ុនសែនអោយជួយអន្តរាគមន៍រកយុត្តិធម៌ដល់ជនរងគ្រោះ។ ក្រោយពីប្រជាពលរដ្ឋចំនួន២ភូមិរួមជាមួយក្រុមគ្រួសារក្មេងរងគ្រោះផងបាននាំគ្នាផ្ដិតមេដៃប្ដឹងចោទប្រកាន់លោកមេប៉ុស្ដិ៍នគរបាលរូបនេះទៅកាន់ប្រមុខថ្នាក់ដឹកនាំកំពូលៗនៃរាជរដ្ឋាភិបាលកម្ពុជាដើម្បីស្នើសុំជួយអន្តរាគមន៍និងជួយរកយុត្តិធម៌នោះនៅព្រឹកថ្ងៃទី០៤កញ្ញានេះលោកឧត្តមសេនីយទោអ៊ុច.សុខុនស្នងការខេត្តបានសម្រេចចេញលិខិតបង្គាប់ការផ្អាកការងារលោកមេប៉ុស្ដិ៍រូបនេះជាបណ្ដោះអាសន្នដើម្បីរង់ចាំការសម្រេចជាថ្មីរបស់ថ្នាក់លើបន្តទៀត។ក្នុងករណីដែលប្រជាពលរដ្ឋចំនួន២ភូមិផ្ដិតមេដៃប្ដឹងគឺដោយសាតែលោកមេប៉ុស្ដិ៍ឃុំស្ដៅឈ្មោះរាំុ.រិតបានដោះលែងតៃកុងឡានដែលបានបង្កសិស្សសាលាចំនួន៣នាក់បានស្លាប់និងរបួសកាលពីព្រលប់ថ្ងៃទី១៤ខែសីហាកន្លងទៅឋិតត្រង់ចំណុចភូមិរស្មីសង្ហាឃុំរស្មីសង្ហាស្រុករតន:មណ្ឌលខេត្តបាត់ដំបង។
ចំណែកលិខិតបង្គាប់ការរបស់លោកស្នងការខេត្តដែលបានបែកធ្លាយដល់ដៃអ្នកសារពត៌មានលេខ៤៧លបក.នបចុះថ្ងៃទី០៤កញ្ញា២០១៩អមហត្ថលេខាដោយលោកឧត្តមសេនីយទោអ៊ុច.សុខុនស្នងការខេត្តបាត់ដំបង។នៅក្នុងលិខិតបង្គាប់ការនេះដែរលោកស្នងការខេត្តបានសម្រេចលើ៣ប្រការគឺ
ប្រការ១/ត្រូវបានផ្អាកការងារជាបណ្ដោះអាសន្នចំពោះលោកអនុសេនីយ៍ឯករ៉ាំ.រិតអត្តលេខ១៩៨៦២តួនាទីជានាយប៉ុស្តិ៍នគរបាលរដ្ឋបាលស្ដៅនៃអធិការដ្ឋាននគរបាលស្រុករតនមណ្ឌលយោងលើមូលហេតុអនុវត្តការងារខុសពីនីតិវិធីធ្វើអោយពលរដ្ឋអស់ទំនុកចិត្ត។ប្រការ២/សាមីខ្លួនត្រូវបង្ហាញមុខនៅការិយាល័យបុគ្គលិករៀងរាល់ម៉ោងធ្វើការដើម្បីកែប្រែកំហុសឆ្គងនិងរង់ចាំការសម្រេចជាថ្មីពីថ្នាក់ក្រសួងនិងប្រការ៣/លោកស្នងការរងផែនការងារធនធានមនុស្សលោកនាយការិយាល័យបុគ្គលិកលោកអធិការនគរបាលស្រុករតនមណ្ឌលអង្គភាពពាក់ព័ន្ធនិងលោកអនុសេនីយ៍ឯករ៉ាំ.រិតត្រូវអនុវត្តតាមលិខិតបង្គាប់ការនេះចាប់ពីថ្ងៃចុះហត្ថលេខានេះតទៅ។
ដោយឡែកក្នុងករណីដែលពលរដ្ឋផ្តិតមេដៃប្តឹងរាប់រយនាក់រួមនិងក្រុមគ្រួសារក្មេងរងគ្រោះផងដោយបានចោទប្រកាន់ថាលោកមេប៉ុស្តិ៍រូបនេះបានដោះលែងតៃកុងរថយន្តបង្កនោះត្រូវបានលោករ៉ាំ.រិតបានឆ្លើយដោះសាថាលោកមិនបានឃើញអ្នកបើកបររថយន្តបង្កនោះទេនៅពេលដែលអ្នកភូមិស្ទាក់ចាប់បានរថយន្តតែលោកទទួលស្គាល់ថាបានឃើញតែរថយន្តបង្កប៉ុណ្ណោះខណះដែលផ្នែកចរាចណ៍ជើងគោកនៃស្នងការខេត្តហៅលោកទៅបំភ្លឺតែត្រូវបានប្រជាពលរដ្ឋច្រានចោលថាមេប៉ុស្តិ៍រូបនេះឆ្លើយជាការដោះបន្ទុកខ្លួនឯងប៉ុណ្ណោះ៕សៅ សារិទ្ធ
