ខេត្តកណ្តាល ៖ មានការភ្ញាក់ផ្អើលកាលពីល្ងាចម្សិលមិញ ទាំងប្រជាពលរដ្ឋ ពិសេស អាជ្ញាធរដែនដី បានចុះដល់គោលដៅភ្ញាមៗ ក្រោយពីសាឡង់ ១គ្រឿង បានបើកបុក សសរស្ពាន ព្រែកតាមាក់ គៀបជាប់ នៅសសរទី៣ ។
វត្តមាននៅទីតាំងផ្ទាល់គេសង្កេតឃើញមានអភិបាលខេត្តកណ្តាលលោក ម៉ៅ ភិរុណ។ លោកកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល និង មន្រ្តីពាក់ព័ន្ធ ជាច្រើនទៀត ក្នុងកិច្ចសហការ អូសសាឡង់នេះ ចេញពីសសរស្ពាន និងរកចំណាត់ការផ្សេងៗ។
បើតាមលោកឧត្តមសេនីយ៍ស្នងការ ចំពោះហេតុការណ៍នេះ លោកអភិបាលខេត្ត បានបញ្ជាឲ្យផ្អាកសាឡង់ដឹកខ្សាច់ផ្សេងទៀតឆ្លងកាត់ក្រោមស្ពានជាបណ្តោះអាសន្ន រង់ចាំការទាញសាឡង់ដែល បុកនេះចេញសិន ចៀសវាងគ្រោះថ្នាក់ជាយថាហេតុបន្តទៀត។
សូមបញ្ជាក់ថា រហូតដល់ព្រឹកថ្ងៃទី ៩ ខែកញ្ញា នេះគេនៅមិនទាន់ដឹងថា សាឡង់ នោះ ជារបស់អ្នកណានោះទេ ។ តែប្រភពមួយបង្ហើបថា ក្រុមរកស៊ីខ្សាច់នៅ តំបន់នោះ កន្លងមកបមានកូនឧកញ៉ា ហ៊ឹង និង កូនរដ្ឋមន្រ្តីម្នាក់ ៕
