ខេត្តតាកែវ ៖ ប្រជាពលរដ្ឋស្រុកអង្គរបុរី ខេត្តតាកែវបានរាយការណ៍ថា មេទាហានខេត្តតាកែវនិងមេទាហានស្រុកអង្គរបុរីបានឃុបឃឹតគ្នាកាត់យកដីបន្ទាយទាហានលក់អោយឈ្មួញអស់មួយកំណាត់ដោយឈ្មួញយកមកសង់តូបជួលលក់ដូរយ៉ាងរំភើយ ហើយរឿងនេះគេមិនដឹងថាចៅហ្វាយខេត្តតាកែវដឹងឬក៏អត់ទេ ។
ប្រភពខាងលើបានបញ្ជាក់ទៀតថា ទីតាំងបន្ទាយយោធានេះស្ថិតនៅជាប់មាត់ស្ទឹងខាងកើតស្ពានដែកស្ទឹងអង្គរបុរីស្ថិតក្នុងឃំុព្រែកផ្ទោល ស្រុកអង្គរបុរី ហើយដីបន្ទាយទាហានដែលកាត់លក់នេះមានប្រហែលកន្លះហិកតាឯណោះ។
ប្រភពបានអោយដឹងថាការលក់ដូរដីបន្ទាយទាហានស្រុកបានយ៉ាងរលូននេះដោយមានការបើកភ្លើងខៀវពីលោកឌឹមគឹមសានចៅហ្វាយស្រុកអង្គរបុរីទើបគេហ៊ានលក់ បើមិនដូច្នោះទេត្រឹមមេទាហានមិនអាចទៅរួចឡើយ ព្រោះគេអាចឃុបឃិតគ្នាជាលក្ខណៈប្រពន្ធ័ទើបបានរលូន ។
ប្រជាពលរដ្ឋដែលដឹងរឿងនេះបានលើកឡើងទៀតថា បន្ទាប់ពីពួកគេឃុបឃិតគ្នាលក់បន្ទាយមួយកំណាត់នោះ គេបានសាងសង់ស្តង់ថ្មីចែសអង្កន់ជាកង់ៗ សម្រាប់ជួលលក់ឥវ៉ាន់អស់រួចទៅហើយ ប៉ុន្តែគេមិនទាន់វាយរបងនិងខ្លោងទ្វារចាស់ដែលមានសរសេរថា តំបន់ប្រតិបត្តិការសិកតាកែវ ផ្នែកអង្គរបុរីចេញនៅឡើយទេ ។
ប្រជាពលរដ្ឋស្រុកអង្គរបុរី ក៏បានធ្វើការសំណូមពរទៅលោកអភិបាលនៃគណៈអភិបាលខេត្តតាកែវមានវិធានការទប់ស្កាត់ក្នុងរឿងនេះផង បើមិនដូច្នោះទេ ជនខិលខូចច្បាស់ជា រកវិធីលក់ដីរដ្ឋ ដីអង្គភាពអស់ខ្ទេចខ្ទីមិនខាន ។
