ភ្នំពេញ ៖ ក្រោយពីមានបាតុភាពរិះគន់មិនសំចៃ លើបណ្តាញសង្គមហ្វេសបុក ករណីឯកឧត្តម ឈាង វុន តំណាងរាស្រ្តជាប់ឆ្នោតមណ្ឌលខេត្តបាត់ដំបង មកពីគណៈបក្សប្រជាជនកម្ពុជា ដែលបាន ថា បងប្អូន កម្មករ កម្មការិនី ធ្វើពុតជាឈឺ បណ្តាលអោយបាត់បង់ថវិការដ្ឋ និងមិនមានចំណាត់ការបែបណាមួយពីថ្នាក់ដឹកនាំរបស់ខ្លួននោះ ។លោក ហ៊ាង គឹមស្រឿន ជាប្រជាជនម្នាក់រស់នៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ បានធ្វើពាក្យបណ្តឹងទៅកាន់សាលាដំបូងរាជធានីភ្នំពេញ ដើម្បីប្តឹង ឯកឧត្តម ឈាង វុន ពាក់ព័ន្ធការចោទប្រកាន់ថា បងប្អូន កម្មករ កម្មការិនី ធ្វើពុតជាឈឺ បណ្តាលអោយបាត់បង់ថវិការដ្ឋ ។
នៅក្នុងលិខិតប្តឹង ចុះថ្ងៃទី ៧ ខែតុលា ឆ្នាំ ២០១៩ របស់លោក ហ៊ាង គឹមស្រឿន និងបានវ៉ៃត្រាចូលអយ្យការអមសាលាដំបូងរាជធានីភ្នំពេញ លេខ 7006 ថ្ងៃទី៧ ខែតុលា ឆ្នាំ ២០១៩ វេលាម៉ោង 3 និង 15នាទីល្ងាចនោះ។បានសសេរឡើងមានចំនួន៨ បទល្មើស និង បានសំណូរពរចំនួន៣ចំណុច ៖
ទី១,សុំអោយលោក ឈាង វុន បង្ហាញឯកសារ គ្រប់ការចោទប្រកាន់មកលើបងប្អូន កម្មករ កម្មការិនី និង គ្រូពេទ្យ ដែលថាបានចេញវេជ្ជបញ្ជាក្រោមហេតុផល ថា ធ្វើពុតជាឈឺចំពោះមុខតុលាការ និង បង្ហាញជាសាធារណៈដល់មហាជន ។ទី២,សុំអោយឈ្មោះ ឈាង វុន សុំទោសដល់បងប្អូន កម្មករ កម្មការិនី និងគ្រូពេទ្យជាសាធារណៈ ។ទី៣,សុំអោយមានការចោទប្រកាន់ឈ្មោះ ឈាង វុន ទៅតាមនីតិវិធីច្បាប់ជាធរមាន ។
យើងសង្កេតឃើញថា ប៉ុន្មានឆ្នាំចុងក្រោយនេះ ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានខិតខំចុះជួបកម្មករ កម្មការិនី ទូទាំងប្រទេស រកពេលសំរាកគ្មាន ។ សកម្មភាពនោះ បានធ្វើអោយបងប្អូន កម្មករ កម្មការិនី រិតតែអាណិត និង គោរព ពីវីរភាពនៃការដឹកនាំរបស់សម្តេច ដែលបានលះបង់ គ្រប់សព្វបែបយ៉ាង ដើម្បីប្រទេសជាតិមួយនេះអោយរីកចំរើន និង បានសុខសប្បាយ ។ តែក្រោយពីមានបាតុភាព នៃឧត្តមមន្រ្តីម្នាក់ បានហាស្តី ហាក់មិនសមរម្យ កាលពីប៉ុន្មានថ្ងៃកន្លងមកនេះ បានធ្វើអោយពួកគេ មួយចំនួនហាក់ស្រងាកចិត្ត និង អន់ចិត្ត អន់ថ្លើម ជាពន់ពេក ៕
