ភ្នំពេញ៖ ល្បែងអ៊ិនធឺណិតដ៏ល្បីល្បាញមួយកន្លែង នៅហាងម្លប់ជ្រៃ ផ្លូវលេខ៤៧៤ សង្កាត់បឹងត្របែក ត្រូវបានអាជ្ញាធរចុះបិទជាបណ្តោះអាសន្ន នៅរសៀលថ្ងៃទី៣ ខែមេសា ឆ្នាំ២០២០ នេះ ។
ទីតាំងមួយនេះ ត្រូវបានប្រភពព័ត៌មានបង្ហើបអោយ ដឹងថា បានដំណើរលេងជាយូរមកហើយ ដោយមានឈ្មោះ គឹមជាតិ ដ៏មានឥទ្ធិពលម្នាក់ ជាអ្នកកាងនៅពីក្រោយខ្នង ។
សូមបញ្ជាក់ថា ដោយបានការអនុញ្ញាតពីលោក ថេង សុថុល អភិបាលខណ្ឌចំការមន ,
គណៈបញ្ជាការឯកភាពខណ្ឌចំការមន ដឹកនាំដោយលោក កែវ សំណាង អភិបាលរងខណ្ឌចំការមន បានចុះត្រួតពិនិត្យទីតាំងអាជីវកម្មសេវាអ៊ិនធឺណេតមួយកន្លែងនេះ ។
គណៈបញ្ជាការឯកភាពខណ្ឌចំការមន បានត្រួតពិនិត្យឃើញថា ទីតាំងមួយនេះ មានបង្កប់លេងល្បែងស៊ីសងតាមអ៊ិនធឺណិត ។ ចំពោះសម្ភារៈដែលមានក្នុងទីតាំងនេះ អាជ្ញាធរពុំបានដកហូតនោះទេ ។ ចំណែកមនុស្សចំនួន៥នាក់ មានស្រីម្នាក់ និងម៉ូតូចំនួន១២គ្រឿង ត្រូវបានប្រគល់ទៅអោយអធិការដ្ឋាននគរបាលខណ្ឌចំការមន ដើម្បីអនុវត្តបន្តតាមនីតិវិធី ៕
