ខេត្តកណ្តាល) ការចុះអង្កេតនិងពិនិត្យលើផ្ទៃដីដែលឈ្មួញទិញជាន់គ្នារបស់ក្រុមគណៈកម្មការចម្រុះខេត្តកណ្តាល ដឹកនាំដោយ លោកស្រេង លឹមហ៊ួ នាយករងរដ្ធបាលសាលាខេត្តកណ្តាល និងជាប្រធានក្រុមគណៈកម្មការ កាលពីថ្ងៃទី២៤ ខែមេសា ឆ្នាំ២០២០ នៅចំណុចដីបឹងទួលព្រែកតាមាន(អតីតឡូត៍នេសាទលេខ៦ ស្ថិតក្នុងឃុំកំពង់ភ្នំ ស្រុកលើកដែក ខេត្តកណ្តាល ហាក់បីដូចមានអាថ៍កំបាំង ។
តាមប្រភពព៌តមានពីមន្រ្តី បានបង្ហើបអោយដឹងថា ដីចំណុចនេះគឺសុទ្ធតែជាដីបឹងព្រៃលិចទឹកជម្រកត្រីពងកូននិងជាដីអតីតឡូត៍នេសាទលេខ៦សម្បត្តិសាធារណៈរបស់រដ្ធ។ស្រាប់តែដល់ពេលដីមានហាងឆេងឈ្មួញបានឃុបឃិតគ្នាជាប្រព័ន្ធប្រើរូបភាពអោយមេខ្យល់ដើរគៀងគរបំផុសបំផុលអោយប្រជាពលរដ្ធមកផ្តិតមេដៃ គុម្ពីអត្តសញ្ញាណប័ណ្ណទទួលយកលុយខ្លះម្នាក់១០០ដុល្លារឬ២០០ដុល្លារ រួចថតរូបភាពទុក ដើម្បីងាយស្រួលក្លែងបន្លំឯកសារធ្វើលិខិតទិញលក់ដីបឹងសាធារណៈរបស់រដ្ធពីប្រជាពលរដ្ធទៅវិញ។ក្រោមការយកប្រជាពលរដ្ធធ្វើជាខែលដើម្បីរំលោភយកដីរបស់រដ្ធបែបនេះហើយ ទើបធ្វើអោយឈ្មួញអ្នកមានលុយមានអំណាចមួយចំនួនតូចបានទិញ
ជាន់គ្នា២ទៅ៣នាក់ឯណោះ។
ប្រភពបន្តថា ការទិញដីជាន់គ្នានេះហើយ ដែលធ្វើអោយកើតមានករណីជម្លោះដីធ្លីផ្ទុះឡើងឥតឈប់ឈរ បង្កភាពស្មុកស្មាញដល់រាជរដ្ធាភិបាលពិបាកដោះស្រាយ។ជាក់ស្តែងដូចជាដីដែលក្រុមគណៈកម្មការចម្រុះចុះមកអង្កេតលើដីរបស់លោក ស្រី ម៉ម សុខនក្នុងថ្ងៃនេះ បើតាមប្រភពនិយាយថាគឺទិញត្រួតជាន់លើដីឈ្មួញដល់ទៅ២ម្ចាស់ទៀតឯណោះ ប៉ុន្តែគ្មានអ្នកស្គាល់ឈ្មោះទេ ព្រោះឈ្មួញដីទាំងនោះគឺសុទ្ធតែជាអ្នករស់នៅរាជធានីភ្នំពេញ មិនឃើញវត្តមានមកចូលរួមទេ គឺមានតែភាគីខាងលោកស្រី ម៉ម សុខន មកចូលរួមប៉ុណ្ណោះ។
គួររំលឹកថា សម្តេចតេជោ ហ៊ុន សែន បានកាត់រំសាយឡូត៍នេសាទចោល គឺទុកផ្ទៃបឹងអោយពលរដ្ធសម្រាប់រកនេសាទត្រីលក្ខណៈគ្រួសារចិញ្ចឹមជីវិត តែបែរជាជួបការលំបាក់ជាងកាលនៅឡូត៍ទៅទៀត ព្រោះឈ្មួញបាននាំគ្នារំលោភយកទាំងដីទាំងទឹកនិងត្រីយ៉ាងអនាធិបតេយ្យតែម្តង។ដោយបានប្រើប្រាស់គ្រឿងចក្រជីកលើកក្រវ៉ាត់ព្រំដីខ្វាត់ខ្វែងជាប្រឡាយធំមានជម្រៅជ្រៅមួយខ្សែៗរាប់គីឡូម៉ែត្រដើម្បីអោយត្រីកុំរួច ហើយពួកឈ្មួញទាំងនោះលក់ត្រីបានតម្លៃរាប់ពាន់ រាប់មុឺនដុល្លារដូចជាឡូត៍នេសាទអញ្ចឹងដែរ។មិនតែប៉ុណ្ណោះថែមទាំងដាក់កម្លាំងយាមកាមការពារខ្លាំងជាងនៅឡូត៍ទ្វេដង។ រាយការណ៍ ដោយលោក លាប់ ចាន់
