ខេត្តកណ្តាល : បន្ទាប់ពីប្រមុខរាជរដ្ឋាភិបាលបានកាត់រំសាយឡូនេសាទ ដើម្បីប្រយោជន៍ទុកអោយប្រជាជនបានអាស្រ័យផល ជាលក្ខណគ្រួសារនោះមក គឺក្រុមឈ្មួញបានប្រើល្បិចកល ទិញបឹងមួយចំនួនពីប្រជាជន ។ ដីរបស់រដ្ឋ បឹងរបស់រដ្ឋបានធ្លាក់ចូលកណ្តាប់ឈ្មួញធំៗ មួយចំនួន យ៉ាងត្រជាក់ចិត្ត ។
បើយើងក្រឡេកមកមើល អំពីដែនអតីតឡូនេសាទនៅក្នុងខេត្តកណ្តាល ឯណោះវិញ គឺមានរឿងស្មុកស្មាញកើតជាជំលោះរវាងឈ្មួញនិងឈ្មួញ ។ ឈ្មូញនិងប្រជាជន មិនអស់មិនហើយ ។
អ្វីដែលជារឿងចំឡែក គឺនៅជារៀងរាល់ឆ្នាំ ក្រុមឈ្មួញធំៗ បានសំរុកលើកទំនប់ ជីប្រឡាយហៅថាជីកបៀរ ក្រោមហេតុផល ដើម្បីរក្សាត្រីធម្មជាតិនៅពេលទឹកតំឡើង ។
បៀរនិមួយៗ នៅក្នុងស្រុកគៀនស្វាយ
ត្រូវបានគេរាយការណ៍មកថា ត្រូវបានចាប់ត្រីលក់បានរាប់ម៉ឺនដុល្លា ចូលទៅក្នុងហោប៉ាវក្រុមឈ្មួញ និង មន្រ្តីខិលខូច មួយចំនួន ។
គួររំលឹកថា សម្តេចតេជោ ហ៊ុន សែន បានកាត់រំសាយឡូត៍នេសាទចោល គឺទុកផ្ទៃបឹងអោយពលរដ្ធសម្រាប់រកនេសាទត្រីលក្ខណៈគ្រួសារចិញ្ចឹមជីវិត តែបែរជាជួបការលំបាក់ជាងកាលនៅឡូត៍ទៅទៀត ព្រោះឈ្មួញបាននាំគ្នារំលោភយកទាំងដីទាំងទឹកនិងត្រីយ៉ាងអនាធិបតេយ្យតែម្តង។ដោយបានប្រើប្រាស់គ្រឿងចក្រជីកលើកក្រវ៉ាត់ព្រំដីខ្វាត់ខ្វែងជាប្រឡាយធំមានជម្រៅជ្រៅមួយខ្សែៗរាប់គីឡូម៉ែត្រ។មិនតែប៉ុណ្ណោះថែមទាំងដាក់កម្លាំងយាមកាមការពារខ្លាំងជាងនៅឡូត៍ទ្វេដង ទៅទៀត ។
មន្រ្តីរាជការ និង ប្រជាជន ភាគច្រើនកំពុងរង់ចាំមើល អភិបាលខេត្តកណ្តាល ឯកឧត្តម គង់ សោភណ្ឌ តើមានឥទ្ធិពលកំរិតណាក្នុងការវ៉ៃបំបែកក្រុមឈ្មួញខិលខូចចាស់វស្សា ទាំងនេះ អោយឈប់រកស៊ីក្រោមលេសជីកបៀរ នេះតទៅទៀត ។
