រាជធានីភ្នំពេញ : មានការភ្ញាក់ផ្អើល សឹងមិនគួរអោយជឿថា ក្លឹបកំសាន្តរ៉ាក់ ដែលជាកន្លែងអតីតសំបុកចែកចាយគ្រឿងញៀន ដែលត្រូវប៉ូលីសចាប់បានទាំងអ្នកចែកចាយ អ្នកប្រើប្រាស់ ក៏ដូចអ្នកផ្តល់ទីតាំង នូវគ្រឿងញៀនជិត៥០គីឡូក្រាម
ក្នុងអំឡុងខែមីនា ឆ្នាំ២០១៩ នោះមក ឥឡូវនេះ កន្លែងនេះ ត្រូវបានវ៉ៃកំទេចចោល ហើយ ។
ការវ៉ៃកំទេចចោល នូវទីតាំង ខាងលើ អង្គភាពគេហទំព័រ ទូរទស្សន៍ព្រះនរាយណ៍ នៅមិនទាន់អាចរកការបញ្ជាក់ពីប្រភពខាងណាបាននៅឡើយនោះទេ ។ តែតាមសំដីប្រជាជនបានបង្ហើបថា មិនគួរណា វ៉ៃចោល រឺលុបចោល ភស្តុតាង ដ៏សំខាន់១នេះទេ ព្រោះថាតុលាការកំពុងសើរើ សំណុំរឿងនេះផង។
គួររម្លឹកថា លោកឧកញ៉ា គិត ធាង ត្រូវកម្លាំងនគរបាលចម្រុះនាំខ្លួនទៅស្នងការដ្ឋាននគរបាលរាជធានីភ្នំពេញ នៅព្រលប់ថ្ងៃទី១១ ខែមីនា ឆ្នាំ២០១៩ ពីភូមិគ្រឹះរបស់លោក ស្ថិតនៅផ្លូវលេខ២៨៩ ក្នុងសង្កាត់បឹងកក់១ ខណ្ឌទួលគោក។ ការនាំខ្លួនលោកឧកញ៉ា គិត ធាង ម្ចាស់ទីតាំងអតីតមជ្ឈមណ្ឌលកំសាន្តរ៉ុក”Club Rock”ដោយអនុវត្តតាមដីការបស់សាលាដំបូងរាជធានីភ្នំពេញ បន្ទាប់ពីមានប្រតិកម្មខ្លាំងៗពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ បន្ទាប់មកនៅល្ងាចថ្ងៃទី១២ ខែមិនា ឆ្នាំ២០១៩ ចៅក្រមស៊ើបសួរនៃតុលាការក្រុងភ្នំពេញបាន ចេញដីកាបង្គាប់ឲ្យឃុំខ្លួនឧកញ៉ារូបនេះដាក់ពន្ធនាគារជា បណ្តោះអាសន្នហើយ ពីបទ សម្រួលឱ្យប្រើប្រាស់ដោយខុសច្បាប់នូវសារធាតុញៀន តាមមាត្រាមាត្រា៤៤ ច្បាប់ស្តីពីការត្រួតពិនិត្យគ្រឿងញៀន ។
មាត្រា៤៤ កថាខណ្ឌទី២ ច្បាប់ស្តីពីការត្រួតពិនិត្យគ្រឿងញៀនចែងថា អំពើជួលទីកន្លែង ផ្តល់ទីកន្លែង ឬ អំពើផ្សេងទៀត ដែលបង្កលក្ខណៈងាយស្រួលដល់ការប្រើប្រាស់ដោយខុសច្បាប់នូវសារធាតុញៀន គឺ ជាបទសម្រួលឱ្យប្រើប្រាស់ដោយខុសច្បាប់នូវសារធាតុញៀន ត្រូវផ្តន្ទាទោសពី៥ឆ្នាំទៅ១០ឆ្នាំ និង ពិន័យជាប្រាក់ពី១០លានរៀលទៅ២០លានរៀល ។
