(ខេត្តស្វាយរៀង) ÷ ឯកឧត្តម យុិល សុធី ប្រធានក្រុមការងាររាជរដ្ឋាភិបាលចុះឧបត្ថម្ភឃុំកំពង់ចម្លង ឃុំកំពង់ចំឡង ស្រុកស្វាយជ្រំ ខេត្តស្វាយរៀង និងលោកជំទាវ បាននាំទៀនព្រះវស្សា និងទេយ្យវត្ថុព្រមទាំងថវិកាមួយចំនួនប្រគេនព្រះសង្ឃគង់ចាំព្រះវស្សាអស់ត្រីមាសចំនួន ៤ វត្តក្នុងស្រុកស្វាយជ្រំ ខេត្តស្វាយរៀង ។
ពិធីប្រគេនទៀនព្រះវស្សា និងទេយ្យវត្ថុព្រមទាំងថវិកានេះធ្វើឡើងនៅព្រឹកថ្ងៃទី ៣០ ខែមិថុនា ឆ្នាំ ២០២០ ក្នុងវត្តត្នោតជ្រុំ ឃុំកំពង់ចំឡង ស្រុកស្វាយជ្រំ ខេត្តស្វាយរៀង ដែលមានការអញ្ជើញចូលរួមពីក្រុមការងារ អាជ្ញាធរដែនដី និងពុទ្ធបរិស័ទជាច្រើននាក់ផងដែរ ។
ឯកឧត្តមបានផ្ដាំសួរសុខទុក្ខដោយក្តីនឹករលឹកពីសំណាក់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចគតិព្រឹទ្ធបណ្ឌិតប៊ុន រ៉ានីហ៊ុន សែន ជូនបងប្អូនប្រជាពលរដ្ឋទាំងអស់នៅទូទាំងខេត្តស្វាយរៀងដោយសម្ដេចទាំងទ្វេរតែងតែគិតគូរចំពោះជីវភាពប្រចាំថ្ងៃរបស់ប្រជាពលរដ្ឋ ។
ឯកឧត្តមក៏បានក្រើនរំលឹកដល់បងប្អូនប្រជាពលរដ្ឋ លោកយាយ លោកតា ពុទ្ធបរិស័ទចំណុះជើងវត្តទាំងអស់ ឲ្យបន្តការប្រុងប្រយ័ត្នខ្ពស់ពីជំងឺឆ្លងដ៏កាចសាហាវកូវីដ១៩ ដោយបង្កើនការធ្វើអនាម័យដើម្បីសុខភាពរស់នៅឲ្យបានល្អ ជាពិសេសត្រូវពាក់ម៉ាស ឬក្រមា នឹងទៅដុសលាងសម្អាតដៃឱ្យបានស្អាតជាប្រចាំ ជាមួយសាប៊ូ ទឹកអាកល់ ឬក៏ជែលកម្ចាត់មេរោគផងដែរ ។
ឯកឧត្តមបានបញ្ជាក់ថា ការចូលព្រះវស្សាគឺជាព្រះវិន័យដែលព្រះសម្មាសម្ពុទ្ធទ្រង់បញ្ញត្តិឡើងដើម្បីឲ្យព្រះសង្ឃសាវ័កគ្រប់អង្គប្រតិបត្តិតាមដែលមានរយៈពេល ៣ ខែគឺចាប់ពីថ្ងៃ ១រោចខែអាសាធ ដល់ថ្ងៃ ១៥ កើតខែអស្សុជគឺព្រះពុទ្ធជាម្ចាស់ទ្រង់មានព្រះបំណងចង់ឲ្យព្រះសង្ឃមានភាពងាយស្រួលក្នុងរដូវវស្សារយៈពេល ៣ ខែដែលជារដូវភ្លៀងធ្លាក់ជោកជាំពិធីបុណ្យចូលព្រះវស្សាគឺជាពិវិធីមួយដែលមានសារៈសំខាន់ក្នុងព្រះពុទ្ធសាសនាជាពេលវេលាដ៏សំខាន់សម្រាប់ភិក្ខុសង្ឃ និងសាមណេរបានរៀនសូត្រ និងវិន័យយ៉ាងខ្ជាប់ខ្ជួនតាមពុទ្ធឱវាទ ។
ឯកឧត្តមបន្តថាពិធីបុណ្យនេះដែលកំពុងមានការជួបជុំពុទ្ធបរិស័ទ នមស្សាការព្រះរតនត្រ័យ និងនិមន្តព្រះសង្ឃចម្រើនព្រះបរិត្ត ដើម្បីឧទ្ទិសមហាកុសលផលបុណ្យជូនញាតិការទាំង ៧ សន្តាន និងបុព្វការីជន ដែលបានចែកឋានទៅកាន់បរលោកខាងមុខ មកទទួលយកផល្លាអានិសង្ឃ ដែលកើតចេញអំពីបុណ្យក្នុងថ្ងៃនេះ តាមបែបប្រពៃណីព្រះពុទ្ធ សាសនាដែលជាសាសនារបស់រដ្ឋ ។
(សូមបញ្ជាក់ថា) ថវិកាដែលទិញសម្ភារៈ និងគ្រឿងបរិក្ខារជូនក្នុង១វត្តៗមានចំនួនសរុប ៥៤០,០០០រៀល និងថវិកាសម្រាប់កសាងចំនួន ៤០០,០០០រៀលផងដែរ ។
ដោយ=សុខហ៊រ