(ខេត្តស្វាយរៀង)៖ ព្រឹកថ្ងៃទី ២០ ខែកក្កដា ឆ្នាំ២០២០នេះ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងពិធីបញ្ចុះបឋមសិលាសាងសង់អគារប៉ុស្តិ៍នគរបាលរដ្ឋបាលសង្កាត់គយត្របែក នៃនៃអធិការដ្ឋាននគរបាលក្រុងស្វាយរៀង ។ ដោយមានការអញ្ជើញចូលរួមពីលោក លោកស្រីប្រធានមន្ទីរ អង្គភាពនានាជុំវិញខេត្ត លោកប្រធានក្រុមប្រឹក្សាក្រុង លោកអភិបាល នៃគណៈអភិបាលក្រុងស្វាយរៀង លោកអធិការនគរបាលក្រុង លោក លោកស្រីអធិការរងនគរបាលក្រុងស្វាយរៀង លោក លោកស្រីក្រុមប្រឹក្សាសង្កាត់គយត្របែក និងនាយប៉ុស្តិ៍នគរបាលរដ្ឋបាលទាំង៧ ក្នុងក្រុងស្វាយរៀង ។
អគារប៉ុស្តិ៍នគរបាលរដ្ឋបាលសង្កាត់គយត្របែក ដែលធ្វេី
ពិធីបញ្ចុះបឋមសិលាសាងសងនាពេលនេះគឺជាអំណោយដ៏ថ្លៃថ្លារបស់ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀង នឹងត្រូវកសាងពីបេតុងដែលមានទំហំ១៥,២០x ៦ម៉ែត្រ ស្ថិតក្នុងភូមិតារាងបាល់ សង្កាត់គយត្របែក ក្រុងស្វាយរៀង ។
ឯកឧត្ដមអភិបាលខេត្តក៏បានបញ្ជាក់ថាអំណោយ ទាំងនេះគ្រាន់តែអាចជួយសម្របសម្រួលការខាតរបស់បងប្អូនបានមួយរយៈពេលប៉ុណ្ណោះ ហើយរដូវវស្សាបានឈានចូលមកដល់ត្រូវរួសរាន់ត្រៀមលក្ខណៈបង្កបង្កើនផល ដើម្បីទ្រទ្រង់ជីវភាពប្រចាំថ្ងៃ ឯកឧត្តមក៏បានក្រើនរំលឹកដល់ប្រជាពលរដ្ឋទាំងអស់ មិនត្រូវធ្វេសប្រហែសអំពីជំងឺកូវីដ១៩ ដែលជាបញ្ហាប្រឈមរួមទូទាំងសកលលោកនាពេលនេះឡើយ បើទោះបីចំនួនអ្នកឆ្លងនៅក្នុងប្រទេសយើងមានតិចក្តី តែយើងត្រូវបង្កើនការយកចិត្តទុកដាក់ឲ្យបានខ្ពស់នឹងត្រៀមទប់ស្កាត់គ្រប់ពេលវេលា ដោយត្រូវធ្វើអនាម័យសុខភាពឱ្យបានជាប្រចាំ ដើម្បីការពារអាយុជីវិតសម្រាប់ខ្លួនឯង និងក្រុមគ្រួសារកុំឱ្យមានឆ្លងមេរោគកូវីដ១៩ នេះឲ្យសោះ ក្នុង ការចូលរួមប្រយុទ្ធប្រឆាំងទប់ស្កាត់ជាមួយរាជរដ្ឋាភិបាលយើង ។
ក្នុងឱកាសនោះដែរឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង ក៏បានធ្វើការសំណេះសំណាលសាកសួរសុខទុក្ខ និងចែកអំណោយដល់ប្រជាពលរដ្ឋក្រីក្រចំនួន ៥០ គ្រួសារ ដោយក្នុងមួយគ្រួសារទទួលបានអង្ករ ១៥គីឡូក្រាម សាប៊ូម្សៅ ០១កញ្ចប់ ទឹកស៊ីអ៊ីវ ០១យូ សាប៊ូដុសខ្លួន ០១ដុំ ម៉ាស់ចំនួន ១០ សារ៉ុង ០១ និងថវិកា ២ ម៉ឺនរៀល ព្រមទាំងឧបត្ថម្ភដល់ក្រុមប្រឹក្សាសង្កាត់ ចៅសង្កាត់ ពេទ្យមណ្ឌលសុខភាព មេភូមិ កម្លាំងប៉ុស្តិ៍នគរបាលរដ្ឋបាលសង្កាត់គយត្របែក កម្លាំងប្រជាការពារ ក្នុងម្នាក់ៗថវិកា ៥ ម៉ឺនរៀល និងឧបត្ថម្ភអង្ករចំនួន ១០០គីឡូក្រាម ដល់ប៉ុស្តិ៍នគរបាលរដ្ឋបាលសង្កាត់គយត្របែក ។ ដោយ=សុខហ៊រ