រាជធានីភ្នំពេញ : ជម្លោះរវាងផលិតកម្មថោន ជាមួយតារាចម្រៀង ខេម ដែលបានអូសបន្លាយរយៈពេលប៉ុន្មានថ្ងៃមកនេះ និងកំពុងធ្វើឲ្យមហាជនមានការចាប់អារម្មណ៍គ្រប់គ្នានោះ ត្រូវបានបញ្ចប់ហើយ ដោយភាគីទាំងសងខាងយល់ព្រមបញ្ចប់ជម្លោះ បញ្ឈប់ការវាយប្រហារគ្នា បន្តរាប់អានគ្នាជាបងប្អូនខ្មែរតែមួយ។
លោក ហេង ឡុង ប្រធានសមាគមអ្នកសិល្បៈស្ម័គ្រចិត្តជួយសង្គម បានថ្លែងប្រាប់ សារព័ត៌មានក្នុងស្រុកថា នៅព្រឹកថ្ងៃទី២៧ ខែសីហា ឆ្នាំ២០២០ ថា ភាគីទាំងសងខាង (ផលិតកម្មថោន និងតារាចម្រៀងខេម) បានយល់ព្រមលុបចោលអ្វីដែលបានបង្ហោះរាងខ្លួន និងអធ្យាស្រ័យគ្នាទៅវិញទៅមក និងបន្តការរាប់អានគ្នាទៅមុខទៀត។
លោកបន្តថា «បន្ទាប់ពីចំណាយពេលជាង៣ម៉ោងរហូតដល់ម៉ោង១យប់ ខ្ញុំបាទបានរកដំណោះស្រាយឈ្នះឈ្នះ ដើម្បីបញ្ចប់ជម្លោះរវាងផលិតកម្មថោន និង តារាចម្រៀង ខេម។ ទីបំផុតភាគីទាំងពីរបានទទួលយកដំណោះស្រាយរួមមួយ ដោយបញ្ចប់ជម្លោះ អត់ឱនអធ្យាស្រ័យឲ្យគ្នា បញ្ចប់ការវាយប្រហារគ្នា បន្តការរាប់អានគ្នាជាបងប្អូនខ្មែរដូចគ្នា ក្រោមគោលការណ៍ឈ្នះឈ្នះ ដើម្បីបន្តជ្រកក្រោមម្លប់សន្តិភាព ក្រោមការដឹកនាំដ៏ខ្ពង់ខ្ពស់របស់សម្តេចតេជោ ហ៊ុន សែន។ អរគុណសន្តិភាព»។
ពាក់ព័ន្ធរឿងនេះមហាជនបានកោតសសើរដល់គូរភាគីទាំង២ ពិសេសផលិតកម្មថោន ដែលមានទឹកចិត្តសណ្តោះប្រណីមិនប្រើអំណាច និង ប្រើច្បាប់មកធ្វើបាបកូនចៅ ។
