ខេត្តព្រះសីហនុ :កាលពីវេលាម៉ោង១៦និង៣០នាទី ថ្ងៃទី២៩ ខែកញ្ញា ឆ្នាំ២០២០ លោក ប្រាក់ សុវណ្ណ អភិបាលរងស្រុកកំពង់សិលា បានចុះទៅដល់ចម្ការ ម្ចាស់ឈ្មោះ ខាន់ សុវណ្ណ ស្ថិតក្នុងភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ ដើម្បីសួរនាំពាក់ព័ន្ធករណីបាញ់បោះសេរីក្នុងចម្ការ។
ក្រោយពីស្តាប់ការបំភ្លឺរួច ឈ្មោះ ខាន់ សុវណ្ណ បានប្រាប់ថា គឺពិតជាមានករណីបាញ់បោះសេរីក្នុងចម្ការរបស់ខ្លួនចំនួន០៣គ្រាប់ ពិតប្រាកដមែន។ ក្នុងនោះ ក៏បន្សល់សំបកការទុស្សចំនួន០៣គ្រាប់ ផងដែរ។
ករណីនេះ បង្កដោយ ឈ្មោះ សាំង សុង ភេទប្រុស អាយុ៤៨ឆ្នាំ ជាអ្នករាប់អានគ្នា បានចូលមកលេងចម្ការ។ បន្ទាប់ពីហូបបាយរួច ឈ្មោះ សាំង សុង បានយកកាំភ្លើងខ្លី (មិនស្គាល់ម៉ាក) ពីក្នុង ឡាន បាញ់សាកលេងចំនួន០៣គ្រាប់ ហើយក៏ជិះរថយន្តចេញទៅវិញបាត់អស់។
បន្ថែមពីនោះ រហូតដល់ម៉ោង២០និង១០នាទី ថ្ងៃខែឆ្នាំដដែល កម្លាំងគណៈបញ្ជាការឯកភាពស្រុក បានចុះទៅទីតាំងចម្ការម្តងទៀត ដែលដឹកនាំផ្ទាល់របស់ លោក សៅ បុរីវឌ្ឍនះ អភិបាលស្រុក និងជាប្រធានគណៈបញ្ជាការឯកភាពស្រុកកំពង់សិលា ដើម្បីអញ្ជើញ លោក ខាន់ សុវណ្ណ មកកាន់ប៉ុស្តិ៍នគរបាល។
បច្ចុប្បន្ន លោក ខាន់ សុវណ្ណ បានមកកាន់ប៉ុស្តិ៍រដ្ឋបាលឃុំចំការហ្លួង និងកំពុងសាកសួរបន្ត៕
