ខេត្តកណ្តាលៈ គេនៅចាំបានថា
ឯកឧត្តមបណ្ឌិត ម៉ៅ ភិរុណ បច្ចុប្បន្នជាប្រធានក្រុមប្រឹក្សាខេត្តកណ្តាល កាលពីថ្ងៃទី១៥ខែកុម្ភៈឆ្នាំ២០២០ ដែលកាលណោះឯកឩត្តមជាអភិបាលខេត្តកណ្តាលបានដឹកនាំធ្វើពិធីអបអរសាទរនិងរៀបចំដង្ហែជ័យលាភីទីក្រុងទេសចរណ៍ស្អាតអាស៊ាន ដែលក្រុងតាខ្មៅ ខេត្តកណ្ដាល ទទួលបាន ។
ឯកឩត្តមបណ្ឌិត ម៉ៅ ភិរុណ បានចាត់ទុកថា ព្រឹត្តិការណ៍នោះគឺជាព្រឹត្តិការណ៍ប្រកបដោយមានអត្ថន័យ មានមោទនភាព និងមានកិត្តិយសខ្លាំងណាស់សម្រាប់ប្រជាពលរដ្ឋក្នុងខេត្តកណ្ដាលទាំងមូល។ មិនតែប៉ុណ្ណោះ ថ្លែងក្នុងព្រឹត្តិការណ៍នោះ ឯកឩត្តមបណ្ឌិត ម៉ៅ ភិរុណ បានប្តេជ្ញាចិត្តថានឹងយកអោយបានផ្ការំដួល៣ទងទៀតផង ។ ប៉ុន្តែឥឡូវនេះ មោទនភាព និង កិត្តិយសដែលប្រជាពលរដ្ឋក្នុងខេត្តកណ្តាលទទួលបានពានរង្វាន់ទីក្រុងស្អាតអាស៊ាននោះត្រូវបានលុបបំផ្លាញដោយកំណកដីខ្សាច់និងបរិស្ថានទៅវិញ ។ នេះជាទស្សនៈលើកឡើងរបស់ប្រជាពលរដ្ឋក្នុងខេត្តកណ្តាល ។ ប្រជាពលរដ្ឋនៅបានរិះគន់យ៉ាងខ្លាំងថែមទៀតដល់អាជ្ញាធរដោយលើកឡើងថា អាជ្ញាធរខេត្តកណ្តាលមិនត្រឹមតែគ្មានសមត្ថភាពរក្សាមោទនភាពនិងកិត្តិយសពានរង្វាន់ទីក្រុងស្អាតអាស៊ានដែលទទួលនេះទេ គឺថែមទាំងគ្មានសមត្ថភាពបង្ក្រាបទប់ស្កាត់ក្រុមរថយន្តដែលមិនគោរពច្បាប់កំពុងដឹកបង្ហូរដីខ្សាច់បំផ្លាញបរិស្ថានទាំងនោះទៀតផង ។ ការរិះគន់នេះ ប្រជាពលរដ្ឋបានធ្វើឡើងក្រោយពេលដែលលោក នូ សុវណ្ណារ៉ាអភិបាលក្រុងតាខ្មៅបានធ្វើការព្រមានថា នឹងចាប់ផាកពិន័យទៅលើម្ចាស់ដេប៉ូខ្សាច់ណាដែលដឹកជញ្ជូនដីខ្សាច់មិនគោរពតាមបំរាមរបស់អាជ្ញាធរក្រុង ។ ពីព្រោះប្រជាពលរដ្ឋមើលឃើញថា បន្ទាប់ពីអភិបាលក្រុងតាខ្មៅរូបនេះធ្វើការព្រមានហើយនោះ ក្រុមរថយន្តដឹកខ្សាច់មួយចំនួននៅតែធ្វើការដឹកជញ្ជូនខ្សាច់ខុសបំរាមនិងមិនគោរពតាមការណែនាំរបស់អាជ្ញាធរក្រុងដដែល ។
ប្រជាពលរដ្ឋនៅបានលើឡើងទៀតថា ស្ទើរជារៀងរាល់ថ្ងៃពួកគាត់បានឃើញកម្លាំងបោសសំអាតដីខ្សាច់តាមដងផ្លូវក្នុងសង្កាត់តាខ្មៅ ក្រុងតាខ្មៅ ។ ការប្រើប្រាស់កម្លាំងបោសសំអាតខ្សាច់នេះ ប្រជាពលរដ្ឋដាក់ការសង្ស័យថា បានប្រើប្រាស់ថវិការបស់រដ្ឋទៀតផង ។ ចឹងទេ ក្រុមរថយន្តដឹកខ្សាច់អនាធិបតេយ្យគ្នានគោរពច្បាប់ដែលកំពុងដឹកជញ្ជូនខ្សាច់នៅក្នុងក្រុងតាខ្មៅនេះ មិនត្រឹមតែកំពុងចាក់លុបពានរង្វាន់ទីក្រុងស្អាតអាស៊ាននិងបំផ្លាញបរិស្ថានប៉ុណ្នោះទេ គឺថែមទាំងបានបំផ្លាញដល់ថវិកាជាតិទៀតផង ។
