ខេត្តព្រះសីហនុ៖ ខណៈវិស័យដឹកជញ្ជូនភ្ញៀវទេសចរណ៍ក្នុងខេត្តព្រះសីហនុកំពុងមានបន្ទុះកើនឡើងគួរឲ្យកត់សំគាល់ ដោយខេត្តបានចែកចេញជា ជលយានប្រភេទក្រុមហ៊ុនដឹកជញ្ជូនភ្ញៀវទេសចរណ៍ជាតិនិង អន្តរជាតិទៅកម្សាន្តក្នុងតំបន់ឬរមណីយដ្ឋានតាមកោះនានាក្នុងខេត្ត ពិសេស(កោះរុងនិងកោះរុងសន្លឹម) ជាក់ស្ដែងមានក្រុមហ៊ុនមួយឈ្មោះ (ស្ពិតបូត មិនឱមារ្ស) SPEED BOAT MIN ORMAX ដែលកំពុងរំលោភច្បាប់យ៉ាងធ្ងន់ធ្ងរ សាងសង់សំណងផែ លយចូលឆ្នេរសមុទ្ររាប់សិបម៉ែត្រ ដែលស្ថិតនៅ ភូមិ៣ សង្កាត់លេខ១ (រំដួលជើងភ្នំ) ខេត្ត-ក្រុងព្រះសីហនុ។
បើតាមម្ចាស់ការដ្ឋានសំណងឥតច្បាប់មួយនេះបានប្រាប់ទូរទស្សន៍យើងថា ពិតជាការដ្ឋានរបស់លោកពិតប្រាកដមែន តែការសាងសង់នេះលោកធ្វើជាផែជួសជុល អូប័រ តែប៉ុណ្ណោះ បើរដ្ឋត្រូវការដីនេះយកទៅអភិវឌ្ឍលោកមិនហាមឃាត់នោះទេ
ហើយចំពោះអ្នកសារព័ត៌មានចង់ចុះផ្សាយរឿងនេះក៏ផ្សាយចុះ ម៉ាសេរី លោកមិនខ្វល់ច្រើននោះទេ។
ជាក់ស្ដែងនៅព្រឹកថ្ងៃទី ០៨ កុម្ភៈ ឆ្នាំ ២០១៨ មានក្រុមការងារខេត្ត ដឹកនាំដោយ លោក លី ចិននិយម ប្រធានក្រុមការងារវិស័យសំណងខេត្តចុះដល់កន្លែងដែលកំពុងសាងសងើនោះ។
លោកបានថ្លែងប្រាប់ព័ត៌មានយើងតាមទូរស័ព្ទថា សំណង់ខាងលើលោកបានធ្វើការហាមឃាត់ហើយជាបណ្ដោះអាសន្នចាប់ពីថ្ងៃទី ០៨ ខែកុម្ភៈនេះទៅ ចំពោះផលប៉ះពាល់វិញនោះលោកថា ដោយរង់ចាំឲ្យក្រុមហ៊ុន (ស្ពិតបូត មិនឱមារ្ស) SPEED BOAT MIN ORMAX នេះរត់ការច្បាប់សិនទើបបន្តនិតិវិធីទៀត បើមិនដូច្នេះទេលោកនិងមានវិធានការណ៍តាមផ្លូវច្បាប់។
គួររំលឹកផងដែរថា កន្លងមក ឯកឧត្ដម យន្ត មីន អភិបាល នៃគណៈអភិបាលខេត្តព្រះសីហនុ ធ្លាប់បានថ្លែងជារឿយៗថា (ចំពោះសំណង់ណាដែលសាងសង់រំលោភលើឆ្នេរសមុទ្រ ទោះសំណង់នោះមានសភាពតូចតាច ឬ ធំ ដូចជាកន្លងមកនៅឆ្នេរអូរត្រេះជាដើម ត្រូវតែហាមឃាត់និងវាយកម្ទេចចោល ហើយច្បាប់ក៏មិនអនុវត្តន៍ចំពោះតែប្រជាពលរដ្ឋនោះតែ ត្រូវតែស្មើភាពគ្នា មិនថា អ្នកមានលុយនិងមានអំណាចនោះទេ)។
ឯកឧត្ដមក៏បានបន្ថែមថា សំណង់ដែលត្រូវបានថ្នាក់ដឹកនាំខេត្តទទួលស្គាល់ឲ្យសាងសង់មានតែមួយប៉ុណ្ណោះ ស្ថិតនៅ អូរឈើទាល សង្កាត់លេខ៤ ក្រុងព្រះសីហនុមានរួចមកហើយ ដោយមិនមានការអនុញ្ញាតឲ្យមានការសាងសង់ផែឬសំណង់រំលោភនៅចំណុចឆ្នេរណាទៀតនោះទេ។
ចំពោះបញ្ហាសំណង់រំលោភច្បាប់សង់លើឆ្នេរសមុទ្រនេះ ប្រជាពលរដ្ឋកំពុងរង់ចាំមើលពីការអនុវត្តន៍ច្បាប់របស់សាលាខេត្តព្រះសីហនុ បើទោះបីជាពេលនេះត្រូវបានកំណត់ឲ្យធ្វើការផ្អាកជាបណ្ដោះអាសន្នចំពោះការសាងសង់នេះហើយក៏ដោយ៕ រាយការណ៍ដោយ៖(ទុយ ហ៊ួត)ប្រចាំខេត្តព្រះសីហនុ
