ខេត្តព្រះសីហនុ៖ បញ្ហាទំនាស់ដីធ្លីតែងតែកើតមានឡើងគ្រប់ទីកន្លែង ជារឿយៗ ប៉ុន្តែអាជ្ញាធរលោកក៏មិនដែលព្រងើយកន្តើយនោះតែក្នុងការដោះស្រាយនិងទប់ស្កាត់ រាល់ទំនាស់ផ្សេងៗ យ៉ាងសកម្មផងដែរ រហូតបានសម្រេចជាបន្តបន្ទាប់។
ជាក់ស្ដែង លោក ស្រី ឡុច ទូច តំណាងប្រជាពលរដ្ឋសហគមន៏អូរខ្សាច់ព៥៦ គ្រួសារ កើតទុក្ខមិនសុខចិត្ត ស្នើសុំ ឯកឧត្តម យន្ត មីន អភិបាលខេត្តព្រះសីហនុជួយរកដំណោះស្រាយខណៈដីប្រជាសហគមន៏អូរខ្សាច់របស់គាត់នៅតែរងការគំរាមកំហែងដោយមានឈ្មោះ ជា សុខឡេង បានចេញមកអះអាងថាមានដីកាន់កាប់នៅលើដីរបស់ប្រជាសហគមន៍ដែលស្ថិតនៅភូមិ៤ ឃុំអូរត្រេះ សុក្រស្ទឹងហាវ ខេត្តព្រះសីហនុ តាមរយៈការលក់ទិញបុគ្គលមួយចំនួនដោយសង្ស័យថាមានការឃុបឃិតគ្នាធ្វើឯកសារស្ងាត់ៗជាមួយមន្ត្រីមួយចំនួនតូចនៅក្រោមឱវាទសាលាស្រុកស្ទឹងហាវ។
លោក ស្រី ឡុច ទូច បានបញ្ជក់ថា ទីតាំងដីដែល លោកស្រី ជា សុខឡេង អះអាងថាដីរបស់ខ្លួននោះគឺជាដីរបស់ប្រជាជនសហគមន៏អូរខ្សាច់បានកាប់ឆ្កាកាន់កាប់តាំងពីជំនាន់ខ្មែរក្រហម ១៩៩៣-១៩៩៤
នៅឈរជើងតំបន់នេះមកម្ល៉េះ។
តែត្រូវឈ្មោះ លីវ សុខា និងឈ្មោះ នូយ ណា លបលួចឃុបឃិតគ្នាជាមួយ លោក ឃី សារ៉ាន់ មានតួនាទីជាអនុភូមិ៤ និងមន្ត្រីឃុំអូរត្រេះខ្លះ រួមទាំងបុគ្គលមួយចំនួនទៀតធ្វើឯកសារបញ្ជក់លក់ដីនេះអោយទៅឈ្មោះ ជា សុខឡេង ទៅវិញ។
ចំណែក លោកស្រី ជា សុខឡេង បានបញ្ជាក់ថា ដីនេះលោកស្រី បានទិញពីឈ្មោះ លីវ សុខា ឈ្មោះ ជួន នី ឈ្មោះ នូយ ណា និងមានអាជ្ញាធរភូមិឃុំដឹងឮផងដែរ កាលពីឆ្នាំ ១៩៩៧-១៩៩៨ តែបើអ្នកទាំងនោះពិតជាបានធ្វើខុសច្បាប់សូមអោយអ្នកច្បាប់ចាត់ការពួកគាត់តាមនីតិវិធីចុះ។
បញ្ហានេះ លោក ឃី សារ៉ាន បានបញ្ជាក់ថា លោក បានចុះហត្ថលេខាលើលិខិតទិញលក់នេះតាមបញ្ជាលោកមេឃុំអូរត្រេះលោក ហាក់ ម៉េង ប៉ុណ្ណោះ។
ដោយឡែកលោក ហ៊ូ សុផាត មេភូមិ៤ បានបញ្ជាក់ថា លោកស្រី ជា សុខឡេង បានមកទិញដីនៅតំបន់នេះមែនតែគាត់មកយកដីខុសទីតាំងតាមការចង្អុលបង្ហាញរបស់ឈ្មោះ នូយ ណា និងបក្ខពួកមួយចំនួនទៀតដែលគ្រាន់តែជាអ្នកចាំដីអោយគេប៉ុណ្ណោះ។ រីឯដីដែលលោកស្រី ជា សុខឡេង បានទិញនៅកន្លែងផ្សេងគឺស្ថិតនៅខាងកើតផ្លូវលំចាស់មិនមែននៅចំណុចដែលកំពុងមានជំលោះគ្នានេះទេ។ លោកបានបន្តថា “ម្យ៉ាងទៀតលោកស្រី ជា សុខឡេង បានមិនបង្ហាញឯកសារទិញលក់ដីទំនាស់នេះទេ ដោយបាននិយាយថា ឯកសាររបស់លោកស្រី នៅឯតុលាការឯណោះ”។
ជាមួយគ្នានេះដែរ លោកស្រី ឈុន ដារី អភិបាលរងស្រុកស្ទឹងហាវ បានអញ្ជើញចុះក្នុង គោលបំណងសម្របសម្រួលដល់ទីតាំងជំលោះនេះដែរតែលោកស្រីសូមអោយភាគីជំលោះទាំងអស់ត្រូវដោះស្រាយវិវាទនេះតាមផ្លូវច្បាប់ដើម្បីចៀសវាងអំពើហិង្សាណាមួយកើតឡើង។លោកស្រីបន្តថាលោកស្រីនឹងធ្វើរបាយការណ៍ជូនថ្នាក់លើឲ្យបានជ្រាបដើម្បីជួយរកដំណោះស្រាយបន្តទៀត។
សូមបញ្ជាក់ថានៅក្នុងលិខិតបញ្ជាក់ដីធ្លីនេះដែរ ឃើញមានឈ្មោះ លោក សេង សុខណាក់ អតីតមន្ត្រីភូមិបាលនិងសុរិយោដីស្រុកស្ទឹងហាវ ,បច្ចុប្បន្នទើបតែត្រូវបានតំឡើងឋានៈទៅជាអនុប្រធានមន្ទីររៀបចំដែនដីនិងសុរិយោដីខេត្តព្រះសីហនុថ្មីៗនេះ បានវាស់វែងគំរូប្លង់ដី(PV)។
ជាចុងក្រោយនេះលោកស្រី ឡុច ទូច សំណូមពរយ៉ាងទទូចដល់រដ្ឋបាលខេត្ត ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ មេតាជួយពន្លឿនរកយុត្តិធម៌ជូនដល់ប្រជាសហគមន៍របស់ពួកគាត់ដែលរងគ្រោះអស់ជាយូរឆ្នាំកន្លងមកហើយនេះផង៕ រាយការណ៍ដោយ៖(ទុយ ហ៊ួត)ប្រចាំខេត្តព្រះសីហនុ
