ខេត្តតាកែវ៖ សំណង់ស្ថានីយប្រេងឥន្ធនៈ នៅចំណុច ភូមិព្រៃទទឹង ឃុំ-ស្រុកសំរោង ខេត្តតាកែវ ត្រូវបានគេមើលឃើញថាគ្មានច្បាប់ ដែលគេសង្ស័យថា មានការអនុញ្ញាតិពីអភិបាលស្រុកសំរោង គឺលោក កេត ម៉ៅ ។
លោក ហុង ឡាក់ ប្រធានការិយាល័យភូមិបាល និងសូរិយោដីស្រុកសំរោង បានអោយដឹងថា ស្ថានីយប្រេងនោះ ពិតជាមិនមានច្បាប់អនុញ្ញតិទេ ហើយលោកបានចេញលិខិតអោយផ្អាកការសាងសង់ តែម្ចាស់ស្ថានីយមិនព្រមស្ដាប់។
លោក កេត ម៉ៅ អភិបាលស្រុកសំរោងបានថ្លែងទទួលស្គាល់ថា លោកពិតជាបានអនុញ្ញាតិអោយសាងសង់ស្ថានីយប្រេងខាងលើមែន ដោយមានការឯកភាពពីមន្ទីរសូរិយោដីខេត្តតាកែវ។ លោកថា ម្ចាស់ស្ថានីយប្រេងខាងលើ មិនចាំបាច់ធ្វើច្បាប់ពីមន្ទីររ៉ែថាមពលទេ ព្រោះវាមិនពាក់ព័ន្ធអី នឹងមន្ទីរនេះផង, ហើយទាក់ទងទៅនឹងរឿងចោទថា លោកយកលុយជាថ្នូរ នឹងការសាងសង់នោះ លោក នឹងធ្វើការស្រាវជ្រាវ។
លោក ផេង វុធ ប្រធានមន្ទីររ៉ែ និងថាមពលខេត្តតាកែវ បានបញ្ជាក់ថា ការលើកឡើងរបស់លោក កេត ម៉ៅ គឺខុសយកតែរួចខ្លួន។ ដោយលោកថា តើស្ថានីយប្រេងណាដែលមិនមានច្បាប់អនុញ្ញតិពីក្រសួងរ៉ែ, ហើយថា លោក នឹងស្នើឲ្យបិទអាជីវកម្មស្ថានីយប្រេងនោះ៕