ខេត្តព្រះសីហនុ៖ មន្ទីរការងារនិងបណ្តុះបណ្តាលវិជ្ចាជីវៈខេត្តព្រះសីហនុ បានរៀបចំពិធីអបអរសាទរខួបអនុស្សាវរីយ៍លើកទី១៣២ នៃទិវាពលកម្មអន្តជាតិ ១ឧសភា ឆ្នាំ២០១៨ បានរៀបចំកម្មវិធីប្រកួតសម្រស់ឯកវាយនភណ្ឌ ឆ្នាំ២០១៨ វគ្គជម្រុះមណ្ឌល ខេត្តព្រះសីហនុ ក្នុងបេក្ខភាពចំនួន ១៧៥នាក់ បានមកដាក់ពាក្យចូលរួមប្រកួត ដោយលទ្ធផលគណៈកម្មការបានជំរើសបេក្ខជន បេក្ខនារីចំនួន ២៤នាក់ ដើម្បីជម្រុះយកតែ ៦នាក់ សម្រាប់យកទៅប្រកួតវគ្គផ្តាច់ព្រាត់នៅរាជធានីភ្នំពេញនាពេលខាងមុខ កម្មវិធីនេះធ្វើឡើងនៅបរិវេណសាលាស្រុកព្រៃនប់ នារសៀលថ្ងៃអាទិត្យ ៩កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៥ ខែមីនា ឆ្នាំ២០១៨ ។
លោកយ៉ូវ ខេមរា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រះសីហនុបានមានប្រសាសន៍ថា ដើម្បីអបអរខួបអនុស្សាវរីយ៍លើកទី១៣២ ទិវាពលកម្មអន្តរជាតិ ១ឧសភា ក្រសួងការងារបណ្ដុះបណ្ដាលវិជ្ជាជីវៈ សហការជាមួយសមាគមរោងចក្រកាត់ដេរនៅកម្ពុជា GMAC សហភាពសហព័ន្ធយុវជនកម្ពុជា អង្គការសហជីព ប្រឡងជ្រើសរើសសម្រស់ឯកវាយនភណ្ឌឆ្នាំ២០១៨ ដើម្បីបង្កបរិយាកាសសប្បាយរីករាយជូនបងប្អូនកម្មករ និងការយល់ដឹងពាក់ព័ន្ធនឹងច្បាប់ ស្តីពីការងារ បង្កើនភាពសុខដុមរមនារវាងនិយោជក និងកម្មករ និយោជិក ក្នុងនោះកំណត់យកទីតាំង ៤មណ្ឌល ក្នុងការប្រឡងជ្រើសរើសសម្រស់ឯកវាយនភណ្ឌ គឺមណ្ឌលរាជធានីភ្នំពេញ ខេត្តព្រះសីហនុ ខេត្តស្វាយរៀង និងខេត្តបន្ទាយមានជ័យ សម្រាប់ការប្រឡងជ្រើសរើសសម្រស់ឯកវាយនភណ្ឌប្រចាំឆ្នាំ២០១៨ ។
លោកប្រធានមន្ទីរបន្តថា មណ្ឌលខេត្តព្រះសីហនុ មានខេត្តព្រះសីហនុ កោះកុង កំពត និងខេត្តកែប មានបេក្ខជន បេក្ខនារី ដាក់ពាក្យប្រឡងជ្រើសរើសសម្រស់ឯកវាយនភណ្ឌប្រចាំឆ្នាំ២០១៨សរុប ១៧៥នាក់ ស្រី ១២៣នាក់ ក្នុងនោះបេក្ខជនខេត្តព្រះសីហនុ មានចំនួន ១០៧នាក់ ស្រី៧៣នាក់, ខេត្តកោះកុង ៥០នាក់ ស្រី ៣៥នាក់, ខេត្តកំពត ១៨នាក់ ស្រី ០៣នាក់ ដោយឡែកខេត្តកែប មិនបានបញ្ជូនបេកជនចូលរួមប្រឡងសម្រស់ឯកវាយនភណ្ឌនោះទេ ។
ការប្រឡងសម្រស់ឯកវាយនភណ្ឌ ឆ្នាំ២០១៨ សម្រាប់មណ្ឌលខេត្តព្រះសីហនុនាពេលនេះ គឺជ្រើសរើសយកបេក្ខជន៣រូប និងបេក្ខនារី៣រូប ក្នុងចំណោមបេក្ខជន បេក្ខនារី ដែលបានដាក់ពាក្យចូលរួមប្រឡង ហើយការប្រឡងវគ្គផ្ដាច់ព្រ័ត្រនឹងប្រព្រឹត្តនៅថ្ងៃទី១ ខែឧសភា ឆ្នាំ២០១៨ នៅរាជធានីភ្នំពេញ ។
ក្នុងឱកាសនោះក៏មានការអញ្ជើញចូលរួមក្រោមអធិបតីភាពឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ និងលោកជំទាវ ហើយលោកបានមានប្រសាសន៍សំណេះសំណាលជាមួយបេក្ខជន បេក្ខនារីសម្រស់ឯកវាយនភណ្ឌមណ្ឌលខេត្តព្រះសីហនុ ដោយគូសបញ្ជាក់ថា ការប្រឡងជ្រើសរើសសម្រស់ឯកវាយនភណ្ឌលើកទី៤ នៅទូទាំងប្រទេសក៏ប៉ុន្តែសម្រាប់មណ្ឌលខេត្តព្រះសីហនុ ការប្រឡងជ្រើសរើសសម្រស់ឯកវាយនភណ្ឌលើកទី៣ ដោយមានការផ្ដួចផ្ដើមរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ហើយក្រសួងការងារបានផ្ដល់ឱកាសដល់ បងប្អូនកម្មករ កម្មការិនីរោងចក្រកាត់ដេរ ចូលរួមប្រកួតប្រជែងបញ្ចេញនូវសមត្ថភាពសម្រស់ឯកវាយនភណ្ឌឆ្នាំ២០១៨ ដើម្បីឈានទៅប្រឡងជ្រើសរើសនៅថ្នាក់ជាតិ នេះជាកិត្តិយសសម្រាប់ខេត្តព្រះសីហនុរបស់យើង ដើម្បីអភិវឌ្ឍការរស់នៅប្រកបដោយសុខដុមរមនា តាមសមត្ថភាពជំនាញរៀងៗខ្លួន ។ ជាចុងក្រោយឯកឧត្តមអភិបាលខេត្តព្រះសីហនុសង្ឃឹមថា ពេលនេះយើងនឹងជ្រើសរើសបានសម្រស់ឯកវាយនភណ្ឌឆ្នាំ២០១៨ ប្រចាំមណ្ឌលខេត្តព្រះសីហនុ ដើម្បីឈានទៅការប្រឡងជ្រើសរើសជ័យលាភីថ្នាក់ជាតិនៅពេលខាងមុខ ហើយរដ្ឋបាលខេត្តសូមជូនពរដល់សម្រស់ឯកវាយនភណ្ឌមណ្ឌលខេត្តព្រះសីហនុ ឲ្យទទួលបានជោគជ័យនៅថ្នាក់ជាតិបន្តទៀត ។
ចំពោះបេក្ខជន និងបេក្ខនារីម្ចាស់ជ័យលាភី “សម្រស់ឯកវាយនភណ្ទ ឆ្នាំ២០១៨” ត្រូវបានរកឃើញហើយគឺ៖ បេក្ខជនចំនួន ៣រូប និងបេក្ខនារី ៣រូបក្នុងចំណោមបេក្ខជន បេក្ខនារីចំនួន ២៤នាក់ លទ្ធផលជ័យលាភីផ្នែកបុរស លេខ១ បានទៅលើឈ្មោះ ជួប សុធារី. លេខ២ បានទៅលើ ឈ្នោះ ទូច ហ៊ុនហួរ និងលេខ៣ បានទៅលើឈ្មោះ ទីច ទិត្យា ចំណែកផ្នែកស្ត្រីលេខ១ បានទៅលើ ប៊ិន អ៊័ន .លេខ២ បានទៅលើឈ្មោះ លី ស្រីនិច និងលេខ៣ បានទៅលើឈ្មោះ សេ រិទ្ឋា ដោយបេក្ខជនទាំង៦នាក់ នោះទទួលបានទឹកប្រាក់៦០ម៉ឺនរៀល នឹងបានចូលរួមវគ្គផ្តាច់ព្រ័តនៅរាជធានីភ្នំពេញ។ឯបេក្ខជនមិនជាប់ទទួលបានរង្វាន់លួងចិត្តម្នាក់៤០ម៉ឺនរៀលចំនួន១៨នាក់ និង១២នាក់ទៀតបានទទួលស្បែកជើងម្នាក់មួយគូរ។ សូមរម្លឹកថា ការប្រឡងជ្រើសរើសសម្រស់ឯកវាយនភណ្ឌទូទាំងប្រទេស ឆ្នាំ២០១៧ជាមោទនភាពណាស់នៅខេត្តព្រះសីហនុ បេក្ខជនជ័យលាភីលេខ១ និងបេក្ខនារីជ័យលាភីលេខ២ ទូទាំងប្រទេស រួមទាំងបេក្ខជនជ័យលាភីញញឹមស្រស់ គឺខេត្តព្រះសីហនុ ជាអ្នកដណ្តើមពានបានដោយជោគជ័យ ៕ រាយការណ៍ដោយ៖(ទុយ ហ៊ួត)ប្រចាំខេត្តព្រះសីហនុ
