ខេត្តព្រះសីហនុ៖ ពិធីកាត់ឬសខណ្ឌសីមាព្រះវិហារ និងសម្ពោធសមិទ្ធិផលនានាក្នុងមជ្ឈមណ្ឌលវិបស្សនាធុរៈគីរីនាគវ័ន (ភ្នំសមាធិ ) នៅព្រឹកថ្ងៃ ១៣កើត ខែខេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៩ ខែមីនា ឆ្នាំ២០១៨ ស្ថិតនៅឃុំរាម ស្រុកព្រៃនប់ ខេត្តព្រះសីហុន ក្រោមអធិបតីភាព ឯកឧត្ដម យន្ត មីន អភិបាល នៃគណៈអភិបាលខេត្ដព្រះសីហនុ។
តាមរបាយការណ៍គណៈកម្មការសាងសង់ឲ្យដឹងថា សមិទ្ធិផលមជ្ឈមណ្ឌលវិបស្សនាធុរគីរីនាគវ័ន (ភ្នំសមាធិ) បានសាងសង់ចាប់ពីឆ្នាំ២០០៣ រហូតដល់ឆ្នាំ២០១៨នេះ មានដូចជាព្រះវិហារ កុដិ សាលាបុណ្យ ព្រះពុទ្ធបដិមា ជណ្តើរ ផ្លូវ ក្លោងទ្វារ ស្រះទឹក ដែលចំណាយថវិកាអស់ ៤១១,៦២៤ដុល្លាសហរដ្ឋអាមេរិក ដែលជាការចូលរួមពីសប្បុរស ជនក្នុង និងក្រៅប្រទេសជាពិសេស លោកឧកញ៉ា លឹម ហ៊ុយឡេង និងលោកប៉ោ ទ្រី ព្រមទាំងពុទ្ធបរិស័ទចំណុះមជ្ឈមណ្ឌលវិបស្សនាធុរៈគីរីនាគវ័ន។
ឯកឧត្ដម យន្ត មីន អភិបាលខេត្ដព្រះសីហនុ បានមានប្រសាសន៍សំណេះសំណាលជា មួយប្រជាពលរដ្ឋដែលបានអញ្ជើញចូលរួម ព្រមទាំងកោតសរសើរគំនិតផ្តួចផ្តើមរបស់ព្រះចៅអធិការ និងពុទ្ធបរិស័ទ ដែលបានបរិច្ចាកធនធាន និងថវិកា ដើម្បីរួមសាមគ្គីកសាងសមិទ្ធិផលនានាក្នុងមជ្ឈមណ្ឌលវិបស្សនាធុរៈគីរីនាគវ័ន ហៅភ្នំសមាធិសម្រាប់ទុកជាទីសេនាសេនៈក្នុងវិស័យព្រះពុទ្ធសាសនា ។ ហើយសមិទ្ធិផលដែលបានសាង សង់មានដូចជាព្រះវិហារ កុដិ សាលាបុណ្យ ព្រះពុទ្ធបដិមា ជណ្តើរ ផ្លូវ ក្លោងទ្វារ ស្រះទឹក ។ល។ សមិទ្ធិផលនេះ ពិតជាមានអត្ថន័យ និងជាការប្រើប្រាស់ស្របតាមពុទ្ធានុ ញ្ញាតរបស់ព្រះពុទ្ធសាសនា ជាសាសនារបស់រដ្ឋ។
ឯកឧត្ដមអភិបាលខេត្តបានបន្តថា ក្រោមការដឹកនាំរបស់រាជរដ្ឋាភិបាលកម្ពុជា ប្រកបដោយគតិ បណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជា ណាចក្រកម្ពុជា ធ្វើឲ្យប្រទេសជាតិមានសុខសន្តិភាព កត្តាសុខសន្តិភាព ពិតជាមាន សារៈសំខាន់ណាស់សម្រាប់ការអភិវឌ្ឍប្រទេសជាតិឲ្យមានការអភិវឌ្ឍរីកចម្រើនលើគ្រប់វិស័យទាំងផ្នែកពុទ្ធិចក្រ និងអាណាចក្រ ដូចនេះយើងទាំងអស់គ្នាត្រូវរួមគ្នាថែរក្សាសន្តិភាពឲ្យនៅស្ថិតស្ថេរគង់វង្សយូអង្វែងសម្រាប់កូនចៅយើងបន្តទៀត ។
ក្នុងឱកាសនោះលោកអភិបាលខេត្តក៏បានផ្តាំផ្ញើដល់បងប្អូនប្រជាពលរដ្ឋ ពិសេសយុវជនចូលរួមអនុវត្តនូវគោលនយោបាយភូមិ ឃុំមានសុវត្ថិភាព ៩ចំណុច របស់រាជរដ្ឋាភិបាលកម្ពុជា ពិសេសចៀសឲ្យឆ្ងាយពីគ្រឿងញៀន ល្បែងស៊ីសងគ្រប់ប្រភេទ និងគោរពច្បាប់ចរាចរណ៍ ដែលជាដើមចមដែលធ្វើឲ្យយើងបាត់អាយុជីវិត និងខូចខាតទ្រព្យសម្បត្តិសាធារណ និងទ្រព្យសម្បត្តិផ្ទាល់ខ្លួន។ នៅក្នុងឱកាសនោះលោកអភិបាលខេត្ត ក៍បានផ្តល់អំណោយ និងថវិកាចែកជូនយាយ ជី តាជី ប្រជាពលរដ្ឋ សិស្សានុសិស្ស និងក្រុមកាយរិទ្ធ ដែលបានចូលរួមផងដែរ៕ រាយការណ៍ដោយ៖(ទុយ ហ៊ួត)ប្រចាំខេត្តព្រះសីហនុ
